చేతనైతే ‘జాకీ’ని వెనక్కి తీసుకురండి

రాప్తాడు ఎమ్మెల్యేపై సుమోటో కేసు నమోదు చేయాలని డీఎస్పీకి సీపీఐ నేతల ఫిర్యాదు

అనంతపురం నేరవార్తలు, న్యూస్‌టుడే: చేతనైతే జాకీ పరిశ్రమను వెనక్కి తీసుకురండని సీపీఐ రాష్ట్ర కార్యదర్శి వర్గ సభ్యుడు జగదీష్‌ హెచ్చరించారు. ఆయన, ఆ పార్టీ జిల్లా కార్యదర్శి జాఫర్‌, ఇతర నాయకులతో కలిసి శుక్రవారం అనంతపురం జిల్లా రాప్తాడు ఎమ్మెల్యే తోపుదుర్తి ప్రకాశ్‌రెడ్డిపై సుమోటో కేసు నమోదు చేయాలని కోరుతూ అనంతపురం డీఎస్పీ ప్రసాదరెడ్డికి ఫిర్యాదు చేశారు. అనంతరం ఆయన మీడియాతో మాట్లాడారు. ‘జాకీ పరిశ్రమ ఏర్పాటయ్యే సందర్భంలో రాప్తాడు ఎమ్మెల్యే రూ.10కోట్లు ఇవ్వాలంటూ తన అనుచరుల చేత దౌర్జన్యానికి, బెదిరింపులకు పాల్పడటంతో అది వెనక్కి పోయింది. దీనిపై కథనం రావడంతో సీపీఐ రాష్ట్ర కార్యదర్శి రామకృష్ణ జాకీ స్థలాన్ని సందర్శించారు. దాన్ని జీర్ణించుకోలేని ఎమ్మెల్యే, ఆయన సోదరుడు విమర్శలు చేయడం సరికాదు’ అని జగదీష్‌ అన్నారు. సీపీఐ జిల్లా సహాయ కార్యదర్శులు నారాయణస్వామి, మల్లికార్జున తదితరులు పాల్గొన్నారు.