జనవరి 27 నుంచి పాదయాత్ర

తెదేపా ప్రధాన కార్యదర్శి లోకేశ్‌

మంగళగిరి, న్యూస్‌టుడే: కుప్పం నుంచి ఇచ్ఛాపురం వరకు తన పాదయాత్ర జనవరి 27న ప్రారంభించనున్నట్లు తెలుగుదేశం పార్టీ ప్రధాన కార్యదర్శి నారా లోకేశ్‌ వెల్లడించారు. నూతక్కిలో గురువారం రాత్రి జరిగిన బాదుడే బాదుడు కార్యక్రమంలో ఆయన మాట్లాడుతూ... ‘400 రోజులు 4వేల కిలోమీటర్లు పాదయాత్ర చేస్తున్నా. అందువల్ల నియోజకవర్గంలో ఉండటం లేదు. ఆ తర్వాత మిగిలిన మొత్తం రోజులు నియోజకవర్గంలోనే ఉంటాను. మంగళగిరిని కంచుకోటగా మార్చానని అనుకుంటున్నాను...’ అని పేర్కొన్నారు.  తాను వచ్చే వరకు మంగళగిరికి కాపలా కాయాలని కార్యకర్తలకు లోకేశ్‌ సూచించారు. తనను ఓడించేందుకు జగన్‌మోహన్‌రెడ్డి అనే వ్యక్తి అన్ని ఆయుధాలు వాడతారని, ఇందులో ఎలాంటి అనుమానం అవసరం లేదన్నారు. అందుకే నియోజకవర్గాన్ని తాను వచ్చే వరకు చూసుకోవాలని ఆయన చెప్పారు.