Ongole: విషెష్‌ చెప్పేందుకు అవకాశం ఇవ్వలేదని మంత్రి సురేశ్‌పై వైకాపా నేతల అసహనం

ఒంగోలు: నూతన సంవత్సర వేడుకల్లో భాగంగా మంత్రి ఆదిమూలపు సురేశ్‌ను కలిసి శుభాకాంక్షలు తెలిపేందుకు అవకాశం ఇవ్వకపోవడంపై వైకాపాలోని ఓ వర్గానికి చెందిన నేతలు అసహనానికి గురయ్యారు. కొత్త సంవత్సరం సందర్భంగా ప్రకాశం జిల్లా ఒంగోలులోని క్యాంపు ఆఫీసులో వేడుకలు నిర్వహించారు. వేడుకల్లో పాల్గొన్న మంత్రిని కలిసి శుభాకాంక్షలు తెలిపేందుకు కొండెపి, యర్రగొండపాలెం నుంచి పలువురు వైకాపా కార్యకర్తలు పెద్ద ఎత్తున తరలివచ్చారు. కొండెపి నియోజకవర్గ పరిధిలోని సింగరాయకొండ మండలం అధ్యక్షుడు రవికుమార్ రెడ్డి తన వర్గంతో కలిసి క్యాంపు ఆఫీస్‌కు చేరుకున్నారు. అయితే, మంత్రిని కలిసేందుకు వారికి అవకాశం కల్పించలేదు. దీంతో ఆగ్రహించిన రవికుమార్ రెడ్డి వర్గం.. మంత్రి తీరును తీవ్రంగా తప్పుపడుతూ.. అక్కడి నుంచి వెళ్లిపోయారు. కొండెపి నియోజకవర్గానికి ఇన్‌ఛార్జిగా వచ్చిన మంత్రి సురేశ్‌.. పార్టీకి చెందిన అన్ని వర్గాలకు సమప్రాధాన్యత ఇవ్వడం లేదని ఆగ్రహం వ్యక్తం చేశారు.