కరోనాతో కుమారుడి మృతి.. కోడలికి దగ్గరుండి రెండో పెళ్లి

కరోనాతో భర్తను పోగొట్టుకున్న మహిళకు.. ఆమె అత్తామామలే తల్లిదండ్రులుగా మారి మరో వివాహం జరిపించారు. మధ్యప్రదేశ్‌లోని ధార్‌ జిల్లాలో ఇది చోటుచేసుకుంది. పెళ్లి చేయించడమే కాకుండా మరణించిన తమ కుమారుడి ఇంటినీ కోడలికి రాసి ఇచ్చేశారు. ధార్‌ జిల్లాకు చెందిన రిటైర్డ్‌ బ్యాంక్‌ ఉద్యోగి యుగ్‌ప్రకాశ్‌ తివారి కుమారుడు ప్రియాంక్‌ తివారి కరోనాతో ప్రాణాలు కోల్పోయాడు. ప్రియాంక్‌ తివారికి భార్య ప్రియాంక, తొమ్మిదేళ్ల వయసున్న కుమార్తె ఉన్నారు. ప్రియాంక్‌ మృతితో వీరంతా తీవ్ర దుఃఖంలో మునిగిపోయారు. కోడలి జీవితం ఇక్కడితో ఆగిపోవద్దని ఆమె అత్త,మామ ఆలోచించారు. ఆమెను తమ సొంత కూతురిలా భావించి.. మరో వ్యక్తితో వివాహం జరిపించారు. అక్షయతృతియ రోజున నాగ్‌పుర్‌లో ప్రియాంకకు వివాహం చేశారు. కోడలికి తల్లిదండ్రులుగా మారి దగ్గరుండి వేడుకలో పాల్గొన్నారు.