రష్యా గతే మీకూ పడుతుంది.. చైనాకు అమెరికా హెచ్చరిక

బ్రసెల్స్‌: రష్యాకు మద్దతివ్వడం మానుకోవాలని చైనాకు తీవ్రస్థాయిలో అమెరికా హెచ్చరికలు జారీ చేసింది. లేకపోతే మాస్కోకు పట్టిన గతే బీజింగ్‌కూ పడుతుందని పరోక్షంగా క్రెమ్లిన్‌పై విధించిన ఆంక్షలను ప్రస్తావించింది. పుతిన్‌కు సహకారం ఆపకపోతే ఆంక్షలు విధించడానికి వెనుకాడబోమని స్పష్టం చేసింది. ‘‘ఉక్రెయిన్‌పై యుద్ధాన్ని ఖండించడంలో చైనా విఫలమైంది. మానవ హక్కుల మండలి నుంచి రష్యాను తప్పించాలని తెచ్చిన తీర్మానానికి వ్యతిరేకంగా ఓటు వేసింది. పరిస్థితిని మెరుగుపరచడానికి ఎలాంటి ప్రయత్నాలు చేయలేదు. మాస్కోపై ఎలాంటి ఆంక్షలు, ఎగుమతి నియంత్రణలు విధించామో చైనా చూసింది. రష్యాకు బీజింగ్‌ భౌతికపరమైన మద్దతిస్తే ఆ ఆంక్షల్లో కొన్నింటి రుచి చైనాకూ చూపిస్తాం’’ అని అమెరికా డిప్యూటీ సెక్రటరీ ఆఫ్‌ స్టేట్‌ వెండీ షెర్మన్‌  తెలిపారు.