విశాఖ నుంచి తరలిన మ్యాచ్‌

దిల్లీ: వెస్టిండీస్‌తో టీ20 మ్యాచ్‌ను ఆస్వాదిద్దామనుకున్న తెలుగు రాష్ట్రాల ప్రజలకు బీసీసీఐ చేదువార్త చెప్పింది. కరోనా విజృంభణ నేపథ్యంలో విశాఖపట్నంలో జరగాల్సిన మ్యాచ్‌ను తరలించింది. వచ్చే నెలలో వెస్టిండీస్‌తో జరిగే పరిమిత ఓవర్ల సిరీస్‌ను రెండు నగరాలకే పరిమితం చేసింది. వైరస్‌ నేపథ్యంలో జట్లకు ప్రయాణ భయం ఉండకూడదనే కారణంతో నిర్ణయం తీసుకున్నట్లు శనివారం ప్రకటించింది. సవరించిన షెడ్యూల్‌ ప్రకారం విండీస్‌తో టీమ్‌ఇండియా ఆడాల్సిన మూడు వన్డేలు అహ్మదాబాద్‌లో, టీ20లు కోల్‌కతాలో జరుగుతాయి. వచ్చే నెల 6, 9, 11 తేదీల్లో వన్డేలు, 16, 18, 20 తేదీల్లో టీ20లను బీసీసీఐ నిర్వహిస్తుంది. మొదట ప్రకటించిన షెడ్యూల్‌ ప్రకారం వన్డేలు వరుసగా అహ్మదాబాద్‌, జైపుర్‌, కోల్‌కతాలో.. టీ20లు కటక్‌, విశాఖపట్నం, తిరువనంతపురంలో జరగాల్సింది. 18న విశాఖలో టీ20 ఉండాల్సింది. కానీ మహమ్మారి వల్ల మ్యాచ్‌లను రెండు వేదికలకే పరిమితం చేయక తప్పలేదు.