కుర్రాళ్ల మోత...భారత్‌ 405/5

తరౌబా: భారత కుర్రాళ్లు ఏం కొట్టారు.. బంతి పడితే బౌండరీ వచ్చేలా.. గాల్లోకి ఎగిరితే స్టాండ్స్‌లో పడేలా.. ఎడాపెడా బాదేశారు. అండర్‌-19 ప్రపంచకప్‌లో ఇప్పటికే క్వార్టర్స్‌ చేరిన యువ భారత్‌ తమ చివరి గ్రూప్‌- బి మ్యాచ్‌లో అదరగొట్టింది. ఉగాండాతో శనివారం మ్యాచ్‌లో భారత బ్యాటర్లు వీరవీహారం చేశారు. రాజ్‌ బవా (162 నాటౌట్‌, 108 బంతుల్లో 14×4, 8×6), రఘువంశీ (144; 120 బంతుల్లో 22×4, 4×6) సెంచరీలతో రెచ్చిపోయారు. దీంతో మొదట బ్యాటింగ్‌ చేసిన టీమ్‌ఇండియా 50 ఓవర్లలో 5 వికెట్లకు 405 పరుగుల భారీ స్కోరు చేసింది. మరో ఓపెనర్‌ హర్నూర్‌ (15)తో పాటు కెప్టెన్‌ (15) నిశాంత్‌  విఫలమైనప్పటికీ.. జట్టుపై ఆ ప్రభావం పడకపోవడానికి ప్రధాన కారణం రఘువంశీ, రాజ్‌ జోడీనే. ప్రత్యర్థి బౌలర్లను ఏ మాత్రం లక్ష్య పెట్టకుండా వీళ్లు చెలరేగారు. ఒకరితో మరొకరు పోటీపడుతూ స్కోరుబోర్డును ఉరకలెత్తించారు. ఆ క్రమంలో సెంచరీలు పూర్తి చేసుకున్నారు. మూడో వికెట్‌కు ఈ జోడీ 206 పరుగులు జతచేసింది. ఆ తర్వాత రఘువంశీ ఔటైనా.. రాజ్‌ విధ్వంసాన్ని కొనసాగించాడు. ప్రత్యర్థి బౌలర్లలో పాస్కల్‌ (3/72) ఆకట్టుకున్నాడు. అనంతరం బ్యాటింగ్‌ ఆరంభించిన ఉగాండా 19.4 ఓవర్లలో 79 పరుగులకై ఆలౌటైంది. దీంతో భారత జట్టు 326 పరుగుల తేడాతో భారీ విజయం సాధించింది. ఈ గెలుపుతో గ్రూప్‌-బీలో అగ్ర స్థానానికి చేరింది. కెప్టెన్‌ నిషాంత్‌ సింధు నాలుగు వికెట్లు తీశాడు. రాజ్‌ బవాకు ‘ప్లేయర్‌ ఆఫ్‌ ది మ్యాచ్‌’ అవార్డు దక్కింది.