ప్రణయ్‌ శుభారంభం

సాత్విక్‌ జోడీ ముందంజ

కౌలాలంపూర్‌: మలేసియా ఓపెన్‌ ప్రపంచ టూర్‌ సూపర్‌ 750 బ్యాడ్మింటన్‌ టోర్నీలో భారత అగ్రశ్రేణి క్రీడాకారుడు హెచ్‌.ఎస్‌.ప్రణయ్‌ శుభారంభం చేశాడు. మంగళవారం పురుషుల సింగిల్స్‌ తొలి రౌండ్లో ప్రణయ్‌ 21-14, 17-21, 21-18తో డారెన్‌ ల్యూ (మలేసియా)పై గెలిచి ప్రిక్వార్టర్స్‌ చేరుకున్నాడు. 62 నిమిషాల పోరులో డారెన్‌ను చిత్తుచేసిన ప్రణయ్‌.. అతనిపై తన గెలుపోటముల రికార్డును 7-4తో మరింత మెరుగు పరుచుకున్నాడు. సాయి ప్రణీత్‌ 15-21, 21-19, 9-21తో ఆంథోనీ జింటింగ్‌ (ఇండోనేసియా) చేతిలో, సమీర్‌వర్మ 14-21, 21-13, 7-21తో జొనాథన్‌ క్రిస్టీ (ఇండోనేసియా) చేతిలో పోరాడి ఓడారు. పురుషుల డబుల్స్‌లో భారత స్టార్‌ జోడీ సాత్విక్‌ సాయిరాజు- చిరాగ్‌శెట్టి ముందంజ వేసింది. తొలి రౌండ్లో సాత్విక్‌- చిరాగ్‌ జోడీ 21-18, 21-11తో వీ చాంగ్‌- వున్‌ తీ (మలేసియా) జంటపై నెగ్గి ప్రిక్వార్టర్స్‌లో అడుగుపెట్టింది. మహిళల డబుల్స్‌ తొలి రౌండ్లో సిక్కిరెడ్డి- అశ్విని పొన్నప్ప 15- 21, 11-21తో మత్సుయామా- చిహరు చేతిలో, హరిత- ఆష్నా 7-21, 12-21తో జియాంగ్‌ యున్‌- కిమ్‌ జియాంగ్‌ (కొరియా) చేతిలో పరాజయం చవిచూశారు. మిక్స్‌డ్‌ డబుల్స్‌ తొలి రౌండ్లో వెంకట గౌరవ్‌ ప్రసాద్‌- జుహి 15-21, 9-21తో కిమ్‌ వాన్‌- జియాంగ్‌ యున్‌ (కొరియా) చేతిలో ఓటమి పాలయ్యారు.