Chess Olympaid: అగ్రస్థానంలోనే అమ్మాయిలు

చెస్‌ ఒలింపియాడ్‌

మహాబలిపురం: చెస్‌ ఒలింపియాడ్‌లో ఏడో రౌండ్లో భారత జట్లకు మెరుగైన ఫలితాలే దక్కాయి. మహిళల విభాగంలో కోనేరు హంపి, ద్రోణవల్లి హారిక సభ్యులైన భారత్‌-1 జట్టు చక్కటి ప్రదర్శనను కొనసాగిస్తూ అగ్రస్థానాన్ని నిలబెట్టుకుంది. శుక్రవారం ఈ బృందం 2.5-1.5తో అజర్‌బైజాన్‌ను ఓడించింది. హంపి.. మమంజాదా చేతిలో ఓటమి పాలైనప్పటికీ.. ఉల్వియాపై తానియా సచ్‌దేవ్‌, గోహర్‌పై వైశాలి విజయాలు సాధించడం.. ఖనిమ్‌తో గేమ్‌ను హారిక డ్రాగా ముగించడంతో భారత్‌ పైచేయి సాధించింది. భారత్‌-3 జట్టు 3-1తో స్విట్జర్లాండ్‌పై నెగ్గింది. తెలుగమ్మాయి బొడ్డా ప్రత్యూషతో పాటు విశ్వ తమ గేమ్‌లను డ్రా చేసుకోగా.. ఈషా కరవాడె, నందిదా విజయాలు సాధించారు. భారత్‌-2 బృందం 1.5-2.5 తేడాతో గ్రీస్‌ చేతిలో ఓడింది. దివ్య దేశ్‌ముఖ్‌ మాత్రమే నెగ్గగా.. మేరీఆన్‌గోమ్స్‌ డ్రా చేసుకుంది. వంతిక, సౌమ్య ఓటమి పాలయ్యారు. భారత్‌-3, 2 జట్లు వరుసగా 11, 31 స్థానాల్లో ఉన్నాయి. పురుషుల విభాగంలో ఏడో రౌండ్లో భారత్‌-1, 3 జట్ల మధ్య పోరు సాగింది. ఇందులో భారత్‌-1 3-1తో విజయం సాధించింది. హరికృష్ణ-సూర్యశేఖర్‌, విదిత్‌-సేతురామన్‌ గేమ్‌లు డ్రా కాగా.. అభిజిత్‌పై అర్జున్‌, అభిమన్యుపై నారాయణన్‌ నెగ్గారు. భారత్‌-2 జట్టు 3.5-0.5తో క్యూబాను ఓడించింది. గుకేశ్‌, సరీన్‌, ప్రజ్ఞానంద విజయాలు సాధించగా.. అధిబన్‌ తన గేమ్‌ను డ్రా చేసుకున్నాడు. అర్మేనియా, అమెరికా తొలి రెండు స్థానాల్లో ఉండగా.. భారత్‌-2, 1 జట్లు వరుసగా 3, 4 స్థానాల్లో కొనసాగుతున్నాయి.