చేతులూ కాళ్లూ కట్టేసి సిగరెట్లతో భర్తకు వాతలు.. వీడియోతో పోలీస్‌స్టేషన్‌కు బాధితుడు!

Crime news | ఇంటర్నెట్‌ డెస్క్‌: ‘‘నా భార్య మత్తు పదార్థాలు తీసుకుని నన్ను హింసిస్తోంది. సిగరెట్లతో రోజూ వాతలు పెడుతోంది. నా భార్య నుంచి నన్ను రక్షించండి మహాప్రభో!’’ అంటూ ఓ వ్యక్తి తన భార్యపై పోలీసులకు ఫిర్యాదు చేశాడు. ఏదో చిన్న కేసే అనుకొని పోలీసులు లైట్‌గా తీసుకున్నారు. ఓ రోజు వీడియో ఆధారాలతో పోలీస్‌స్టేషన్‌కు వచ్చాడు ఆ బాధితుడు. తీరా ఆ వీడియోల్లో ఆమె టార్చర్‌ చూశాక.. పోలీసులే ముక్కున వేలేసుకున్నారు. భర్త ఫిర్యాదు మేరకు ఆమెను అదుపులోకి తీసుకున్నారు.

ఉత్తర్‌ప్రదేశ్‌లోని (UP) బిజ్నోర్‌ జిల్లాకు చెందిన మనన్‌ జైదీకి.. మెహర్‌ జహాన్‌తో వివాహమైంది. మత్తు పదార్థాలకు బానిససైన మెహర్‌.. భర్తను నిత్యం హింసిస్తుండేది. దీనిపై పోలీసులకు ఫిర్యాదు చేసినా పట్టించుకోకపోవడంతో... భార్య దారుణాలను తెలియజెప్పేందుకు ఆ భర్త ఇంట్లోనే ఆమెకు తెలియకుండా సీసీ కెమెరాలు అమర్చాడు. అనుకున్నట్లుగానే మత్తు పదార్థాలు తీసుకున్న ఆమె.. రోజూలానే  అర్ధరాత్రి అతడి కాళ్లూ, చేతులు కట్టేసింది. సిగరెట్‌ తాగుతూ ఒంటిపై వాతలు పెట్టింది. మర్మాంగంపైనా చురకలు పెట్టింది. 

ఆ రాత్రి భార్య దారుణాలను భరించిన ఆ భర్త.. ఉదయాన్నే వీడియో ఆధారాలతో పోలీస్‌స్టేషన్‌కు వెళ్లాడు. ఇలానే రోజూ తనపై దాడి చేస్తోందంటూ జరుగుతున్న దారుణాలను వివరించాడు. దీంతో భర్త ఫిర్యాదు మేరకు మెహర్‌ను పోలీసులు అరెస్ట్‌ చేశారు. ఐపీసీలోని వివిధ సెక్షన్ల కింద కేసు నమోదు చేశారు. తదుపరి చర్యలు తీసుకుంటామని బిజ్నోర్‌ జిల్లా అదనపు ఎస్పీ మీడియాకు వెల్లడించారు. సంబంధిత వీడియోలు ప్రస్తుతం సోషల్‌మీడియాలో వైరల్‌గా మారాయి.