virat kohli: నా ఫిట్‌నెస్‌ సీక్రెట్‌ ఏంటంటే?: విరాట్‌

దిల్లీ: ఫామ్‌ కోల్పోయాడన్న విమర్శలకు చెక్‌ పెడుతూ ఇటీవల తన బ్యాటింగ్‌తో అదరగొడుతున్న విరాట్‌ కోహ్లీ టీ20 ప్రపంచకప్‌ కోసం అప్పుడే కసరత్తులు మొదలుపెట్టాడు. తనకు దొరికిన విరామాన్ని ఫిట్‌నెస్‌ కోసం వినియోగించుకుంటున్నాడు. సరికొత్త ఉత్సాహంతో కనపడుతున్న ఈ స్టార్‌ బ్యాట్స్‌మెన్‌ తాజాగా తన ఫిట్‌నెస్‌ రహస్యాన్ని అభిమానులతో పంచుకున్నాడు. 

‘‘ నా ఫిట్‌నెస్‌లో అత్యంత ముఖ్యమైనవి, తక్కువగా చేసేవి ఇప్పుడు రొటీన్‌ అయ్యాయి. అవే ఫోమ్‌ రోలింగ్‌, ట్రిగ్గర్‌ పాయింట్‌ రిలీజ్‌. ఈ రెండూ గేమ్‌ఛేంజర్స్‌’’ అంటూ జిమ్‌లో చెమటోడుస్తున్న ఫొటోను ఇన్‌స్టాగ్రామ్‌లో పంచుకున్నాడు. ఈ రెండు వ్యాయామాలు తనకు ఎంతగానో ఉపయోగపడుతున్నాయని తెలిపాడు. కొంత కాలం ఆట నుంచి విరామం తీసుకున్న కోహ్లీ ఆ తర్వాత ఆసియా కప్‌లో రెట్టింపు ఉత్సాహంతో కనిపించాడు. సెంచరీ కొట్టి తానేంటో నిరూపించాడు. హైదరాబాద్‌ వేదికగా ఆసీస్‌తో   జరిగిన కీలక పోరులో అర్ధసెంచరీతో  చెలరేగి భారత్‌ విజయంలో కీలక పాత్ర పోషించాడు.