జీవో 317పై పోరాటం

ఫిబ్రవరి 5న హైదరాబాద్‌లో మహాధర్నా

ఈనాడు, హైదరాబాద్‌: జీవో 317 ద్వారా నష్టపోయిన ఉపాధ్యాయులకు న్యాయం చేయాలని కోరుతూ దశలవారీగా ఆందోళన చేయాలని ఉపాధ్యాయ సంఘాల పోరాట కమిటీ నిర్ణయించింది. ఈ జీవోతో ఉత్పన్నమైన సమస్యలను సీఎంకు వివరించడంలో అధికారులు, కొందరు సంఘాల నాయకులు విఫలం చెందారంది. తమ ప్రతినిధులకు అపాయింట్‌మెంట్‌ ఇస్తే సమస్యలను వివరించి వాటి పరిష్కారాలను సూచిస్తామంది. శనివారం స్టీరింగ్‌ కమిటీ జూమ్‌ సమావేశం జరిగింది. ‘‘దశలవారీ పోరాటాలలో భాగంగా సీఎం అపాయింట్‌మెంట్‌ కోసంఈనెల 23న లేఖరాస్తాం. 24న రాజకీయ పక్షాల నేతలతో ములాఖత్‌, 25, 26, 27 తేదీల్లో జిల్లాల్లో సన్నాహక సదస్సులు నిర్వహిస్తాం. 29న కలెక్టరేట్ల ఎదుట నిరసన ప్రదర్శనలుంటాయి. ఫిబ్రవరి 5న హైదరాబాద్‌లో మహాధర్నా చేపడతాం’’ అని కమిటీ పేర్కొంది.