పిక్సెల్‌ ఫోన్లలో లుకప్‌ ఫీచర్‌

గూగుల్‌ పిక్సెల్‌ ఫోన్‌ వాడేవారికి శుభవార్త. తెలియని నంబర్ల నుంచి కాల్‌ చేసే వారిని గుర్తించే లుకప్‌ ఫీచర్‌ అందుబాటులోకి రానుంది. దీన్ని ఇంతకుముందు జపాన్‌లో పరిచయం చేశారు గానీ ఇతర ప్రాంతాల్లో విడుదల చేయలేదు. ఇప్పుడు ప్రపంచవ్యాప్తంగా పిక్సెల్‌ ఫోన్లకు అందుబాటులోకి తేవాలని భావిస్తున్నారు. గూగుల్‌ ఫోన్‌ బీటా వర్షన్‌ 127.0.620688474 గలవారి పరికరంలో లుకప్‌ ఫీచర్‌ ఉన్నట్టు బయటపడింది. కాంటాక్ట్స్‌లో సేవ్‌ చేయని నంబర్ల నుంచి కాల్‌ వచ్చినప్పుడు ఆ నంబరు మీద తాకితే యాడ్‌ కాంటాక్ట్‌, మెసేజ్‌, హిస్టరీ ఆప్షన్ల పక్కన లుకప్‌ ఫీచర్‌ కనిపిస్తుంది. దీని మీద తాకితే ఆ నంబరు ఎవరిదో తెలుసుకోవచ్చు. ఇది ఆయా యాప్‌ల సాయంతో వెబ్‌లో శోధించి ఎవరి నంబరో గుర్తిస్తుంది. ఉదాహరణకు- గూగుల్‌ సెర్చ్‌ను ఎంచుకుంటే నేరుగా వెబ్‌లోనే వెదికి సమాచారాన్ని అందిస్తుంది. బ్యాంకుల వంటి వాణిజ్య సంస్థలకు చెందిన ఫోన్‌ నంబర్ల నుంచి వచ్చే కాల్స్‌ను గుర్తించటానికిది తోడ్పడుతుంది.