బీఎస్పీ పీఠమెక్కితే పోడు భూములకు పట్టాలు

ఆర్‌.ఎస్‌. ప్రవీణ్‌కుమార్‌ వెల్లడి

డోర్నకల్‌, కురవి - న్యూస్‌టుడే: బీఎస్పీ అధికారంలోకి వస్తే పోడు భూములకు పట్టాలిస్తామని ఆ పార్టీ రాష్ట్ర ముఖ్య సమన్వయకర్త ఆర్‌.ఎస్‌.ప్రవీణ్‌కుమార్‌ తెలిపారు. ఆయన చేపట్టిన బహుజన రాజ్యాధికార యాత్ర బుధవారం మహబూబాబాద్‌ జిల్లా డోర్నకల్‌, కురవి మండలాల్లో కొనసాగింది. ఈ సందర్భంగా డోర్నకల్‌ మండలం గొల్లచర్లలో ఆయన విలేకరులతో మాట్లాడారు. ఉద్యోగుల బదిలీల ప్రక్రియను రాష్ట్ర ప్రభుత్వం గాలికి వదిలేసిందని దుయ్యబట్టారు. అబద్ధపు హామీలివ్వడంలో కేసీఆర్‌ ఆరితేరిన వ్యక్తి అని ఎద్దేవా చేశారు. ఉపాధి హామీ క్షేత్రసహాయకులను ఉద్యోగాల్లోకి తీసుకుంటామని శాసనసభ సాక్షిగా చెప్పి.. మాట నిలుపుకోవడం లేదని మండిపడ్డారు.