‘బీసీ కులగణనకు కేంద్రాన్ని ఒప్పించాలి’

ఈనాడు, హైదరాబాద్‌: దేశవ్యాప్తంగా త్వరలో చేపట్టబోయే జనగణనలో బీసీ కులగణన కూడా జరగాలని బీసీ సంఘాలు డిమాండ్‌ చేశాయి. ఈ మేరకు కేంద్ర ప్రభుత్వాన్ని ఒప్పించాలని భాజపా ఓబీసీ మోర్చా జాతీయ అధ్యక్షుడు కె.లక్ష్మణ్‌ను కోరాయి. బీసీ సంక్షేమ సంఘం రాష్ట్రాధ్యక్షుడు జాజుల శ్రీనివాస్‌గౌడ్‌ ఆధ్వర్యంలో బీసీ ప్రతినిధుల బృందం గురువారమిక్కడ భాజపా రాష్ట్ర కార్యాలయంలో ఆయన్ను కలిసింది. 13, 14, 15 తేదీల్లో దిల్లీలో జరిగే బీసీ ఉద్యమానికి మద్దతివ్వాలని శ్రీనివాస్‌గౌడ్‌ కోరారు. లక్ష్మణ్‌ స్పందిస్తూ- కేంద్ర ప్రభుత్వం 27 మంది ఓబీసీలకు కేంద్ర మంత్రులుగా అవకాశం కల్పించిందని నవోదయ విద్యాలయాలు, నల్సార్‌ యూనివర్సిటీ, సైనిక పాఠశాలల్లో ఓబీసీలకు 27 శాతం రిజర్వేషన్లు కల్పించిందని వివరించారు. బీసీ సంఘాల ప్రతినిధి బృందంలో కనకాల శ్యాం, జాజుల లింగం, మాదేశి రాజేందర్‌, గూడూరు భాస్కర్‌, బండిగారి రాజు, నాగరాజు, రాంప్రసాద్‌, సాయిపవన్‌, రాజేశ్‌, సాయితేజ, శివకుమార్‌ ఉన్నారు.