వరంగల్‌ నిట్‌ ఆధ్వర్యంలో వైజ్ఞానిక వారోత్సవాలు

ఈనాడు, వరంగల్‌: ఆజాదీకా అమృతోత్సవాల సందర్భంగా ఉభయ తెలుగు రాష్ట్రాల్లో వైజ్ఞానిక వారోత్సవాలను తెలుగులో నిర్వహించే బాధ్యతను వరంగల్‌ ఎన్‌ఐటీకి అప్పగించారు. హైదరాబాద్‌లోని నేషనల్‌ ఇనిస్టిట్యూట్‌ ఆఫ్‌ న్యూట్రిషన్‌, వరంగల్‌ ఎన్‌ఐటీలలో, విజయవాడ, విశాఖపట్నంలలో వీటిని కోలాహలంగా నిర్వహించేందుకు విజ్ఞాన్‌ప్రసార్‌ వారు ప్రణాళిక రూపొందించారు. దేశానికి స్వాతంత్య్రం వచ్చి 75 ఏళ్లు పూర్తవుతున్న సందర్భాన్ని పురస్కరించుకొని చేపడుతున్న ఈ కార్యక్రమంలో ఆయా ప్రాంతాల్లోని పాఠశాల విద్యార్థులను భాగస్వామ్యం చేయనున్నారు. 75 మంది శాస్త్రవేత్తల గురించి వివరిస్తారు. పలు పోటీలు నిర్వహిస్తారు.ఈ కార్యక్రమాన్ని వచ్చేనెల 22న దిల్లీ నుంచి ప్రధాని మోదీ వర్చువల్‌గా ప్రారంభించి.. 75 కేంద్రాల వారితో ముచ్చటిస్తారు.