Andhra News: సినీ ప్రముఖుల్ని అవమానించాల్సిన అవసరం జగన్‌కు లేదు: అలీ

ఈనాడు, అమరావతి: ‘చిరంజీవి ఇతర తెలుగు సినీ పరిశ్రమ ప్రముఖులను పిలిచి అవమానించాల్సిన అవసరం ఏపీ సీఎం జగన్‌కు ఏముంటుంది?’ అని సినీ నటుడు అలీ అన్నారు. ‘సామాన్యుడికీ సినిమా టికెట్‌ ధర అందుబాటులో ఉండాలని ప్రభుత్వం భావిస్తోంది. సినిమా పెద్దలు కలిసినప్పుడు పరిశ్రమకు మంచి జరిగేలా చూస్తామని సీఎం మాటిచ్చారు. ఆయన కచ్చితంగా చేస్తారు’ అని పేర్కొన్నారు. అలీ తన భార్యతో కలిసి మంగళవారం సీఎం జగన్‌ను కలిశారు. తర్వాత సీఎం క్యాంపు కార్యాలయం వద్ద విలేకరులతో మాట్లాడారు. ‘నీకో శుభవార్త ఉంది.. రెండు వారాల్లో పార్టీ కార్యాలయం నుంచి ప్రకటన వస్తుందని సీఎం జగన్‌ చెప్పారు. ఆ శుభవార్త ఏమిటో నాకు తెలియదు’ అని తెలిపారు.  రాజ్యసభకు అవకాశంపై సీఎం నుంచి సంకేతం అందిందా అని విలేకరులు ప్రశ్నించగా.. ‘ఏమీ అందలేదు’అని అలీ చెప్పారు.