CM Jagan: కోర్టుకు హాజరు నుంచి ఏపీ సీఎం జగన్‌కు మినహాయింపు

ఎన్నికల నియమావళి కేసులో హైకోర్టు ఉత్తర్వులు

ఈనాడు, హైదరాబాద్‌: ఎన్నికల నియమావళి ఉల్లంఘన కేసులో ప్రజాప్రతినిధుల కోర్టుకు హాజరు నుంచి ఏపీ ముఖ్యమంత్రి  జగన్‌మోహన్‌రెడ్డికి మినహాయింపు లభించింది. ఈ మేరకు తెలంగాణ హైకోర్టు ఉత్తర్వులిచ్చింది. 2014లో హుజూర్‌నగర్‌ పోలీసులు నమోదు చేసిన కేసును కొట్టివేయాలంటూ జగన్‌ తెలంగాణ హైకోర్టులో పిటిషన్‌ వేశారు. దీనిపై మంగళవారం జస్టిస్‌ ఉజ్జల్‌ భూయాన్‌ విచారణ చేపట్టారు. వాదనలను విన్న న్యాయమూర్తి పోలీసులకు నోటీసులిస్తూ తదుపరి విచారణను ఏప్రిల్‌ 26కు వాయిదా వేశారు. అప్పటివరకు కేసు విచారణలో జగన్‌కు హాజరు మినహాయింపునిస్తూ ఉత్తర్వులిచ్చారు.