ఏబీ వెంకటేశ్వరరావుపై సస్పెన్షన్‌ ఎత్తివేత

పోస్టింగ్‌ కోసం రిపోర్టు చేయాలని ఆదేశం

ఈనాడు, అమరావతి: సీనియర్‌ ఐపీఎస్‌ అధికారి ఏబీ వెంకటేశ్వరరావుపై విధించిన సస్పెన్షన్‌ను ఏపీ ప్రభుత్వం ఎట్టకేలకు ఎత్తేసింది. నిఘా విభాగాధిపతిగా పని చేసిన సమయంలో అవకతవకలకు పాల్పడ్డారని ఆరోపిస్తూ 2020 ఫిబ్రవరి 8న రాష్ట్ర ప్రభుత్వం ఆయనను సస్పెండు చేసింది. ప్రతి 6 నెలలకు ఒకసారి దానిని పొడిగిస్తూ వచ్చింది. ఆయనపై వేటు వేసి ఈ ఏడాది ఫిబ్రవరి 8 నాటికి రెండేళ్లు పూర్తయింది. ఈ నేపథ్యంలో ఆయన సస్పెన్షన్‌ను రద్దు చేస్తూ ఏప్రిల్‌ 22న సుప్రీంకోర్టు తీర్పు ఇచ్చింది. దాని గడువు ఈ ఏడాది ఫిబ్రవరి 7వ తేదీతో ముగిసినందున సస్పెన్షన్‌ చెల్లదని పేర్కొంది. ఫిబ్రవరి 7 నుంచి ఆయన సర్వీసులో ఉన్నట్లు పరిగణించాలని ఆదేశించింది. ఈ నేపథ్యంలో రాష్ట్ర ప్రభుత్వం ఆయనపై విధించిన సస్పెన్షన్‌ను తొలగించి సర్వీసులోకి తీసుకుంది. ఈ మేరకు ఈ నెల 16న ఉత్తర్వులు జారీ చేయగా అవి బుధవారం వెలుగుచూశాయి. పోస్టింగ్‌ కోసం సాధారణ పరిపాలనశాఖలో రిపోర్టు చేయాలని ఆ ఉత్తర్వుల్లో ప్రభుత్వం సూచించింది.