నూనె నాణ్యత నిర్ధారణకు నమూనాల సేకరణ

ఈనాడు, హైదరాబాద్‌: ఆహార పరిరక్షణ, నాణ్యత ప్రమాణాల కొనసాగింపులో భాగంగా కమిషనర్‌ శ్వేతామహంతి ఆదేశాలను అనుసరించి.. రాష్ట్రంలో వేర్వేరు నూనె ఉత్పత్తుల్లో నాణ్యతను నిర్ధారించడానికి నమూనాలను సేకరిస్తున్నట్లు ఇన్‌స్టిట్యూట్‌ ఆఫ్‌ ప్రివెంటివ్‌ మెడిసిన్‌(ఐపీఎం) సంచాలకురాలు శివలీల తెలిపారు. జీహెచ్‌ఎంసీ పరిధిలో 60, మిగిలిన 32 జిల్లాల్లో ఒక్కో జిల్లాలో రెండు చొప్పున 64 నమూనాలను.. మొత్తంగా రాష్ట్ర వ్యాప్తంగా 124 రకాల ఆహారంలో వినియోగించే నూనెల నమూనాలను సేకరిస్తున్నామని ఆమె పేర్కొన్నారు. శుక్రవారం నాటికి 108 నూనె నమూనాలను సేకరించామని, మరో రెండు రోజుల పాటు ఈ కార్యక్రమం కొనసాగుతుందని వివరించారు. సేకరించిన నమూనాలను నిర్ధారణ పరీక్షల కోసం ప్రయోగశాలకు పంపించినట్లు తెలిపారు.