రెండేళ్లలోపు చిన్నారుల దత్తతకు నూతన నిబంధనలు

ఈనాడు, హైదరాబాద్‌: చిన్నారులను దత్తత తీసుకోవాలనుకున్న దంపతుల ఉమ్మడి వయసులో కేంద్ర ప్రభుత్వం మార్పులు చేసింది. ఇప్పటివరకు 0-4 ఏళ్లలోపు వయసున్న పిల్లలను దత్తత తీసుకోవాలంటే దంపతుల ఉమ్మడి వయసు గరిష్ఠంగా 90 ఏళ్లలోపు ఉండేది. సింగిల్‌ పేరెంట్‌ అయితే 45 ఏళ్లుగా ఉండేది. ఇప్పుడు చిన్నారుల వయసును రెండు కేటగిరీలుగా వర్గీకరించింది. 0-2 ఏళ్లలోపు పిల్లలను దత్తత తీసుకోవాలంటే ఉమ్మడి వయసు 85 ఏళ్లుగా ఉండాలని, సింగిల్‌ పేరెంట్‌ వయసు 40 ఏళ్లుగా ఉండాలని పేర్కొంది. 2-4 ఏళ్లలోపు పిల్లల దత్తతకు గతంలో నిబంధనలు అమలవుతాయని వెల్లడించింది. ఇప్పటివరకు అమల్లో ఉన్న నిబంధనల్లో కొన్ని మార్పులు చేస్తూ ‘‘చిన్నారుల దత్తత నిబంధనలు- 2022’’ జారీ చేసింది.

నిబంధనలివీ

* దత్తతకు ఆసక్తి చూపిన దంపతులు రిజిస్ట్రేషన్‌ చేసుకున్న తరువాత మూడేళ్లలోపు సీనియారిటీ రిఫరల్‌ రాకుంటే.. ఆ దంపతుల ఉమ్మడి వయసు గరిష్ఠంగా 110 ఏళ్లు దాటితే రిజిస్ట్రేషన్‌ నాటి వయసును పరిగణనలోకి తీసుకుంటారు.

* దత్తతకిచ్చే పిల్లల వయసు ఆధారంగా 0-2 ఏళ్లలోపు, 2-4 ఏళ్లు, 4-8 ఏళ్లు, 8-18 ఏళ్లలోపు నాలుగు కేటగిరీలుగా ఖరారయ్యాయి. సింగిల్‌ మహిళా పేరెంట్‌కు ఆడపిల్లను దత్తతకు ఇచ్చేలా నిబంధనలు చేర్చాయి. అయితే మగ పేరెంట్‌కు మాత్రం ఆడపిల్లను ఇవ్వరు.

* చిన్నారి, దత్తత తీసుకునే దంపతుల మధ్య 25 ఏళ్ల కన్నా వయసు వ్యత్యాసం తక్కువగా ఉండకూడదు. రక్త సంబంధీకుల దత్తతలో దంపతుల గరిష్ఠ వయసును పరిగణనలోకి తీసుకోరు. దత్తత తీసుకున్న తరువాత ప్రతి మూడేళ్లకోసారి హోంస్టడీ నివేదికల్ని మహిళా శిశు సంక్షేమశాఖ తీసుకుంటుంది.

* దత్తత కోరుకున్న దంపతులకు మూడుసార్లు చిన్నారులను ఎంపిక చేసుకునే అవకాశమిస్తారు. ఆ సమయంలో ఎంపిక చేసుకోకుంటే వారిని ఏడాది పాటు డిబార్‌ చేస్తారు. అనంతరం ఆ రిజిస్ట్రేషన్‌ను కొత్త రిజిస్ట్రేషన్‌గా పరిగణిస్తారు. విదేశీ దంపతులకు రెండుసార్లు మాత్రమే పిల్లల్ని ఎంపిక చేసుకునే అవకాశమిచ్చి, ఏడాది పాటు డిబార్‌ చేస్తారు.

* దంపతుల మధ్య విభేదాలుంటే వారికి చిన్నారుల్ని దత్తతకు ఇవ్వకుండా తిరస్కరించడంతో పాటు డిబార్‌ చేస్తారు. దత్తత తీసుకున్న చిన్నారిని న్యాయపరమైన నిబంధనలు పూర్తిచేసిన తరువాత పదిరోజుల పాటు ప్రీఅడాప్షన్‌కు అనుమతిస్తారు.