ఉచిత వై-ఫైతో ఏసీ స్లీపర్‌ బస్సులు

నేడు ప్రారంభించనున్న మంత్రి పువ్వాడ

ఈనాడు, హైదరాబాద్‌: టీఎస్‌ఆర్టీసీ తొలిసారి ప్రవేశపెడుతున్న 16 ఏసీ స్లీపర్‌ బస్సులకు హైటెక్‌ హంగులు జోడించింది. ప్రయాణికులకు ఉచిత వై-ఫై సౌకర్యాన్ని అందిస్తున్నట్లు తెలిపింది. ఈ బస్సులను రవాణాశాఖ మంత్రి పువ్వాడ అజయ్‌కుమార్‌ సోమవారం హైదరాబాద్‌ ఎల్బీనగర్‌లో ప్రారంభించనున్నారు. టీఎస్‌ఆర్టీసీ ఛైర్మన్‌ బాజిరెడ్డి గోవర్ధన్‌, ఎండీ సజ్జనార్‌, ఉన్నతాధికారులు హాజరుకానున్నారు. ఇటీవల ప్రారంభించిన 12 నాన్‌ ఏసీ స్లీపర్‌ బస్సుల మాదిరిగానే వీటికీ ‘లహరి- అమ్మఒడి అనుభూతి’గా సంస్థ నామకరణం చేసింది. ప్రయాణికులకు సోమవారం నుంచే ఇవి అందుబాటులోకి వస్తాయి. విశాఖపట్నం, తిరుపతి, చెన్నై, బెంగళూరు, హుబ్బళ్లి మార్గాల్లో నడపనున్నట్లు సంస్థ తెలిపింది.

ఇవీ సదుపాయాలు

* ప్రయాణికుల భద్రతకు బస్సు ట్రాకింగ్‌ సిస్టంతో పాటు బస్సులో ‘పానిక్‌ బటన్‌’ సదుపాయం కల్పించారు. ప్రతి బస్సుకు రివర్స్‌ పార్కింగ్‌ అసిస్టెన్స్‌ కెమెరా ఉంటుంది.

* బస్సు లోపల సెక్యూరిటీ కెమెరాలు, ఫైర్‌ డిటెక్షన్‌- అలారం సిస్టం (ఎఫ్‌డీఏఎస్‌) ఏర్పాటు చేశారు. ప్రమాదవశాత్తు బస్సులో మంటలు చెలరేగితే ఫైర్‌ డిటెక్షన్‌ అప్రమత్తం చేస్తుంది. ప్రయాణికులకు సమాచారం అందించేందుకు పబ్లిక్‌ అడ్రస్‌ సిస్టం ఉంటుంది.

* 12 మీటర్ల పొడవుండే ఈ బస్సుల్లో లోయర్‌ 15, అప్పర్‌ 15 కలిపి 30 చొప్పున బెర్తులు ఉంటాయి. ప్రతి బెర్త్‌కు మొబైల్‌ ఫోన్‌ ఛార్జింగ్‌ సౌకర్యం, రీడింగ్‌ ల్యాంప్‌ ఉంటాయి.