డీఈఈసెట్‌కు 79% మంది హాజరు

ఈనాడు, హైదరాబాద్‌: రెండేళ్ల డీఈడీ కోర్సులో చేరేందుకు రాష్ట్రవ్యాప్తంగా గురువారం నిర్వహించిన డీఈఈసెట్‌కు 79.40 శాతం మంది అభ్యర్థులు హాజరయ్యారు. దీనికి మొత్తం 6,485 మంది దరఖాస్తు చేసుకోగా.. వారిలో 5,144 మంది పరీక్ష రాశారని కన్వీనర్‌ శ్రీనివాసాచారి తెలిపారు. పరీక్ష ప్రాథమిక ‘కీ’ను ఈ నెల 5వ తేదీలోపు విడుదల చేస్తామని చెప్పారు. ఫలితాలను 10 రోజుల్లోపు వెల్లడిస్తామన్నారు.

పీజీఈసెట్‌కు 90 శాతం..

ఎంటెక్‌, ఎంఫార్మసీ తదితర కోర్సుల్లో చేరేందుకు తెలంగాణలో నిర్వహించిన పీజీఈసెట్‌కు 89.85 శాతం మంది అభ్యర్థులు హాజరయ్యారు. ఈ పరీక్షకు 16,563 మంది దరఖాస్తు చేసుకోగా 14,882 మంది రాశారని కన్వీనర్‌ రవీంద్రారెడ్డి తెలిపారు.

తెలంగాణ వర్సిటీ సెలవులు రద్దు

డిచ్‌పల్లి గ్రామీణం, న్యూస్‌టుడే: తెలంగాణ విశ్వవిద్యాలయం పరిధిలోని మెయిన్‌ క్యాంపస్‌, సౌత్‌ క్యాంపస్‌, సారంగపూర్‌ కళాశాలల విద్యార్థులకు బుధవారం ప్రకటించిన సెలవులను రద్దు చేస్తున్నట్లు వీసీ రవీందర్‌ గురువారం ఒక ప్రకటనలో తెలిపారు.విద్యార్థులకు యథావిధిగా హాస్టల్‌ సౌకర్యం అందుబాటులో ఉంటుందన్నారు.