Vande Bharat Express: సికింద్రాబాద్‌కు ఆలస్యంగా వందేభారత్‌

ఈ రైలు వచ్చే పట్టాలపైకి విశాఖ ఎల్‌టీటీ
ప్లాట్‌ఫాం నిర్వహణలో ద.మ.రైల్వే నిర్లక్ష్యం

ఈనాడు, హైదరాబాద్‌: విశాఖపట్నం నుంచి వచ్చే వందేభారత్‌ ఎక్స్‌ప్రెస్‌(Vande Bharat Express) శనివారం ఆలస్యంగా సికింద్రాబాద్‌ స్టేషన్‌కు చేరుకుంది. విశాఖపట్నం నుంచి శనివారం ఉదయం బయల్దేరిన ఈ రైలు మధ్యాహ్నం 2.15కి సికింద్రాబాద్‌ స్టేషన్‌కు చేరుకోవాలి. అయితే మధ్యాహ్నం 12.30 గంటలకు వచ్చి వెళ్లాల్సిన ఎల్‌టీటీ ఎక్స్‌ప్రెస్‌ 1.58 గంటలకు పదో నంబరు ప్లాట్‌ఫాం మీదకు వచ్చింది. దీంతో ఆ ప్లాట్‌ఫాం మీదకు రావాల్సిన వందేభారత్‌ అరగంటపాటు ఔటర్‌లో నిరీక్షించి ఆ రైలు వెళ్లాక సికింద్రాబాద్‌ స్టేషన్‌కు చేరుకుంది. అధిక ఛార్జీలు తీసుకుంటూ రైలును ఆలస్యంగా నడపడంపై ప్రయాణికులు ఆగ్రహం వ్యక్తం చేశారు. ఈ అంశంపై సికింద్రాబాద్‌ స్టేషన్‌ మేనేజర్‌ రాజనర్సు మాట్లాడుతూ.. ఎల్‌టీటీ ఎక్స్‌ప్రెస్‌ను మధ్యాహ్నం 2.12 గంటలకు పంపించామని, ఆ వెంటనే వందేభారత్‌ వచ్చిందని పేర్కొన్నారు.