అందుకే ‘నవ్వుతూ’ యోగా చేసేద్దాం!

ఎలాంటి అనారోగ్యాన్నైనా, మానసిక సమస్యనైనా దూరం చేసే శక్తి యోగాకు ఉందనడం అతిశయోక్తి కాదు. అందుకే చాలామంది తాము చేసే రోజువారీ వ్యాయామాల్లో భాగంగా యోగాను చేర్చుకుంటారు. అయితే ఇందులోనూ ఎన్నో యోగా పద్ధతులు అందుబాటులో ఉన్నాయి. 'హాస్య యోగా' (Laughter Yoga) అలాంటిదే! పేరుకు తగ్గట్లే ఇది నవ్వుతూ చేసే ఓ సరదా యోగా పద్ధతి. ఈ యోగా ఫన్‌ మాత్రమే కాదు.. సంపూర్ణ ఆరోగ్యాన్ని సైతం అందిస్తుందంటున్నారు నిపుణులు. మరి, ఇంతకీ ఈ యోగా ఎలా చేయాలి? దానివల్ల కలిగే ప్రయోజనాలేంటో తెలుసుకుందాం రండి..

పేరుకు తగినట్లుగానే నవ్వుతూ వివిధ యోగాసనాలు వేయడమే దీని ముఖ్యోద్దేశం. కొంతమంది వ్యక్తులు ఒక బృందంగా ఏర్పడి లేదంటే వర్క్‌షాపుల్లో/శిక్షణ తరగతుల్లో ఇన్‌స్ట్రక్టర్‌ చెప్పినట్లు.. ఉద్దేశపూర్వకంగా నవ్వుతూ సరదాగా కొన్ని ఆసనాలు వేయాల్సి ఉంటుంది. చాలావరకు ఇలాంటి యోగా సెషన్స్‌ లయబద్ధంగా చప్పట్లు కొడుతూ, ‘హొ-హొ’ లేదా ‘హ-హ-హ’.. అనే శబ్దం వచ్చేలా నవ్వుతూనే ప్రారంభమవుతాయి. ఆ తర్వాత నెమ్మదిగా వివిధ రకాల యోగాసనాలు, శ్వాస సంబంధిత వ్యాయామాలు, ధ్యానం.. వంటివి నేర్పిస్తారు. అయితే ఇది సరదాగా నవ్వుతూ చేసే యోగా ప్రక్రియే అయినప్పటికీ సొంతంగా కాకుండా నిపుణుల సలహా మేరకు చేస్తే మరింత మెరుగైన ఫలితం ఉంటుందంటున్నారు.. అలాగే ఆసనాల వల్ల శరీరంపై గాయాలు కాకుండానూ జాగ్రత్తపడచ్చు.

ఒత్తిడి తగ్గుతుంది.. ఇమ్యూనిటీ పెరుగుతుంది!

⚛ నవ్వుతూ యోగా చేయడం వల్ల ఒత్తిడి కలిగించే హార్మోన్లు తగ్గి, రోగనిరోధక శక్తి పెరుగుతుంది. అలాగే ఇన్ఫెక్షన్లతో పోరాడే యాంటీబాడీలు శరీరంలో విడుదలవుతాయి. ఈ యోగాతో రోగనిరోధక వ్యవస్థ పనితీరు సుమారు 40 శాతం పెరుగుతుందని ఓ అధ్యయనంలో తేలింది.

⚛ లాఫ్టర్ యోగా వల్ల శరీరంలో ఒత్తిడిని కలిగించే కార్టిసాల్‌ హార్మోన్ల ఉత్పత్తి తగ్గి, డోపమైన్‌, సెరటోనిన్‌.. వంటి హ్యాపీ హార్మోన్లు ఎక్కువగా విడుదలవుతాయి. ఫలితంగా ఒత్తిడి, ఆందోళనలు తగ్గి మానసిక ప్రశాంతత సొంతమవుతుంది. తద్వారా బీపీ కూడా అదుపులోకొస్తుంది.

⚛ ఈ యోగా పద్ధతి అన్ని శరీర అవయవాలకు చక్కటి మసాజ్‌లా పని చేస్తుందంటున్నారు నిపుణులు.

⚛ లాఫ్టర్ యోగా చేసే క్రమంలో ఎక్కువసార్లు గాలి పీల్చుతూ, వదులుతూ ఉంటాం. ఈ క్రమంలో శరీరంలోని అన్ని అవయవాలకు ఆక్సిజన్‌ సరఫరా పెరుగుతుంది. ఫలితంగా మెదడు చురుగ్గా పనిచేయడంతో పాటు ఏకాగ్రత కూడా మెరుగుపడుతుంది.

⚛ నవ్వడం వల్ల రక్తనాళాలు కాస్త వ్యాకోచిస్తాయి. తద్వారా రక్తప్రసరణ బాగా జరిగి గుండె ఆరోగ్యం మెరుగుపడుతుంది.

⚛ ఎంత నవ్వితే నొప్పిని భరించే శక్తి అంతగా పెరుగుతుందని కొన్ని అధ్యయనాల్లో రుజువైంది. నవ్వే క్రమంలో న్యాచురల్‌ పెయిన్‌ కిల్లర్స్‌గా భావించే ఎండార్ఫిన్లు మన శరీరంలో విడుదలవడమే ఇందుకు కారణం!

వీటితో పాటు క్యాలరీలు కరిగించుకోవడానికి, ఆత్మవిశ్వాసాన్ని పెంచుకోవడానికి ఈ యోగా పద్ధతి చక్కగా దోహదం చేస్తుందంటున్నారు నిపుణులు. అయితే కొత్తగా మొదలుపెట్టే వారు మాత్రం నిపుణుల పర్యవేక్షణలోనే చేయడం ఉత్తమం. అలాగే ఒంటరిగా కాకుండా బృందంతో కలిసి చేస్తే మరింత సరదాను, దీనివల్ల కలిగే ఆరోగ్య ప్రయోజనాలన్నింటినీ సొంతం చేసుకోవచ్చు. ఇక గర్భిణులు, వయసు మళ్లిన వారు ఈ యోగా చేసే విషయంలో నిపుణుల సలహాలు తీసుకున్నాకే చేయాలా? వద్దా? అనేది నిర్ణయించుకోవాల్సి ఉంటుంది.