Australia: ఇక ఆస్ట్రేలియా వీసా నిబంధనలు కఠినతరం.. సగానికి తగ్గనున్న విద్యార్థి వీసాలు!

ఇంటర్నెట్‌ డెస్క్‌: ఆస్ట్రేలియాకు వచ్చే అంతర్జాతీయ విద్యార్థులు, తక్కువ నైపుణ్యం కలిగిన వ్యక్తుల వీసా నిబంధనలు కఠినతరం చేయనున్నట్లు ఆస్ట్రేలియా (Australia visa) వెల్లడించింది. తద్వారా వచ్చే రెండేళ్లలో వీరి వలసలను సగానికి తగ్గించవచ్చని అంచనా వేస్తోంది. కుప్పకూలిన వలస వ్యవస్థను కొత్త విధానం (Migration Policy) ద్వారా తిరిగి గాడిలో పెట్టవచ్చని ఆస్ట్రేలియా ప్రభుత్వం ఆశిస్తోంది.

ఆస్ట్రేలియా గణాంకాల ప్రకారం.. దేశంలో 2022-23 ఆర్థిక సంవత్సరంలో వలసల సంఖ్య రికార్డు స్థాయిలో 5,10,000గా నమోదైంది. ఒకే ఏడాది ఈ సంఖ్యలో రావడం దేశ చరిత్రలో ఇదే తొలిసారి. వీరిలో ఎక్కువగా అంతర్జాతీయ విద్యార్థులే ఉన్నట్లు ప్రభుత్వం పేర్కొంది. ఈ సంఖ్యను సగానికి తగ్గించే లక్ష్యంతో తాజా సంస్కరణలకు సిద్ధమైంది. తద్వారా 2024-25, 2025-26 నాటికి వలసల సంఖ్య 2.5లక్షలకు పడిపోవచ్చని అంచనా వేస్తోంది. ఇది కొవిడ్‌కు ముందున్న స్థాయికి సమానం. ఇక కొత్త వీసా నిబంధనల ప్రకారం.. అంతర్జాతీయ విద్యార్థులు ఇంగ్లిష్‌ నైపుణ్య పరీక్షల్లో అధిక రేటింగ్‌ పొందాల్సి ఉంటుంది. దీంతోపాటు వసతికి సంబంధించి విద్యార్థి దరఖాస్తును ఆస్ట్రేలియా మరింత నిశితంగా పరిశీలించనుంది.

హెచ్‌-1బీ వీసాదారులకు గుడ్‌న్యూస్‌.. ఇక అమెరికాలోనే వీసా రెన్యువల్‌!

కొత్త విధానంలో అనుసరిస్తోన్న వ్యూహంతో వలసల సంఖ్య సాధారణ స్థితికి వస్తుందని భావిస్తున్నట్లు ఆస్ట్రేలియా హోంశాఖ మంత్రి క్లేర్‌ ఓనీల్‌ పేర్కొన్నారు. నూతన వలస విధానంపై మీడియా సమావేశంలో మాట్లాడిన ఆమె.. ఇది ఆస్ట్రేలియా భవిష్యత్తుకు సంబంధించిన విషయమన్నారు. తాజా నిర్ణయం విదేశీ వలసలపై ఒత్తిడి పెంచుతుందని.. తద్వారా వలసదారుల సంఖ్య తగ్గుదలకు దోహదపడుతుందన్నారు. మరోవైపు దేశంలో వలస విధానంపై ఆస్ట్రేలియా ప్రధాని ఆంథోని ఆల్బనీస్‌ ఇటీవల మాట్లాడుతూ.. దేశంలో వలసలు ఆందోళన స్థాయికి చేరుకున్నాయని, వీటి సంఖ్య స్థిరమైన స్థాయికి తీసుకురావాల్సిన అవసరముందన్నారు.

ఇదిలాఉంటే, కొవిడ్‌ సమయంలో ఏర్పడిన కార్మికుల కొరతను భర్తీ చేసేందుకు ఆస్ట్రేలియా ప్రభుత్వం ఇటీవల భారీ స్థాయిలో వలసలను ప్రోత్సహించింది. దీంతో విదేశీ విద్యార్థులు, నిపుణులు ఆస్ట్రేలియా వైపు దృష్టి సారించారు. అప్పటికే గృహ సంక్షోభం ఎదుర్కొంటున్న ఆస్ట్రేలియాపై ఈ పరిణామం మరింత ఒత్తిడి పెంచింది. ఆస్ట్రేలియా గణాంక విభాగం ప్రకారం దేశవ్యాప్తంగా ఇటీవల ఇంటి అద్దెలు 7.6శాతం పెరిగాయి. 2009 తర్వాత ఈ స్థాయిలో పెరగడం ఇదే తొలిసారి. ఇలా గృహ సంక్షోభం వేళ భారీ స్థాయిలో వలసలు రావడం స్థానికంగా మౌలిక సదుపాయాల కల్పనకు మరింత ఇబ్బందిగా మారింది. ఈ నేపథ్యంలోనే విద్యార్థి, నిపుణుల వలసలను సగానికి తగ్గించి.. కేవలం అత్యంత నైపుణ్యం కలిగిన వారికే శాశ్వత నివాసం కల్పిస్తూ దేశంలోకి అనుమతించేందుకు ఆస్ట్రేలియా ప్రయత్నాలు చేస్తోంది.