Biden: జీ20పై జిన్‌పింగ్ నిర్ణయం నిరాశపర్చింది: బైడెన్‌

ఇంటర్నెట్‌డెస్క్‌: జీ20కి హాజరుకాకూడదని చైనా అధ్యక్షుడు జిన్‌పింగ్‌ (Xi Jinping) తీసుకున్న నిర్ణయంపై అమెరికా అధ్యక్షుడు జోబైడెన్‌ (Joe Biden) నిరాశ వ్యక్తం చేశారు. ఈ వారంలో జరగనున్న సదస్సుకు తన ప్రతినిధిగా చైనా ప్రీమియర్‌ లి కియాంగ్‌ను పంపాలని జిన్‌పింగ్‌ నిర్ణయించుకున్న సంగతి తెలిసిందే. ఈ పరిణామాలపై తాజాగా డేలావేర్‌లో రిపోర్టర్లు అడిగిన ప్రశ్నకు  బైడెన్‌ స్పందిస్తూ.. ‘‘నేను నిరుత్సాహనికి గురయ్యాను.. కానీ, నేను ఆయనను కలిసేందుకు వెళుతున్నాను’’ అని ముక్తసరిగా పేర్కొన్నారు. కానీ, వీరి సమావేశం ఎక్కడ జరుగుతుందనే సమాచారం మాత్రం వెల్లడించలేదు. ఈ ఏడాది సెప్టెంబర్‌ 7-10 మధ్యలో బైడెన్‌ జీ20 సదస్సు పర్యటన జరుగుతుంది. అనంతరం వియత్నాంలో పర్యటించనున్నారు. ఈ పర్యటనలపై బైడెన్‌ స్పందిస్తూ.. ఆయా దేశాలతో మరింత సమన్వయం చేసుకోవాల్సి ఉందన్నారు. అదే సమయంలో భారత్‌, వియత్నాం కూడా అమెరికాతో సంబంధాలను బలపర్చుకోవడానికి ఆసక్తి చూపుతున్నాయన్నారు.  

ఎలిజబెత్‌-2కు శాశ్వత స్మారకం

వాస్తవానికి గతంలో తాను భారత్‌ వెళతానని జిన్‌పింగ్‌ వెల్లడించారు. కానీ, గురువారం చైనా విదేశాంగ శాఖ నిర్వహించిన సాధారణ ప్రెస్‌మీట్‌లో ఈ పర్యటనపై విలేకర్లు ప్రశ్నించగా.. కచ్చితంగా అధికారులు చెప్పలేకపోయారు. అదే సమయంలో జిన్‌పింగ్‌ ఈ ఏడాది జీ20కి హాజరుకాకూడదని నిర్ణయించుకున్నట్లు పత్రికల్లో కథనాలు వచ్చాయి.

భారత్‌-చైనా సంబంధాలు బాగా ఇబ్బందికర పరిస్థితిలో ఉన్న సమయంలో జిన్‌పింగ్‌ గైర్హాజరు.. పరిస్థితిని మరింత దిగజారుస్తుంది. గత వారం చైనా సరికొత్త మ్యాప్‌ను జారీ చేయడం ఇరు దేశాల మధ్య మరో వివాదాన్ని రాజేసింది. 

బైడెన్‌-జిన్‌పింగ్‌ గతేడాది బాలిలో జరిగిన సదస్సులో భేటీ అయ్యారు. వీరు ఈ ఏడాది నవంబర్‌లో కూడా భేటీ అయ్యే అవకాశాలున్నాయి. ఆ నెలలో శాన్‌ఫ్రాన్సిస్కోలో ఆసియా-పసిఫిక్‌ ఎకనామిక్‌ కోపరేషన్‌ సదస్సు నిర్వహించనున్నారు. ఈ భేటీకి జిన్‌పింగ్‌ హాజరయ్యే అవకాశం ఉంది.