White House: వైట్‌హౌస్‌ గేటును ఢీకొన్న కారు.. డ్రైవర్‌ మృతి

వాషింగ్టన్‌: అమెరికా అధ్యక్ష భవనం వైట్‌హౌస్‌ (White House) వద్ద ప్రమాదం చోటుచేసుకుంది. కాంప్లెక్స్‌ బయట గేటును ఓ కారు బలంగా ఢీకొంది. ఆ ఘటనలో వాహన డ్రైవర్‌ అక్కడిక్కడే మృతి చెందినట్లు అమెరికా సీక్రెట్‌ సర్వీస్‌ వెల్లడించింది.

‘రాత్రి పదిన్నర గంటల ప్రాంతంలో ఓ కారు వేగంగా దూసుకొచ్చింది. కాంప్లెక్స్‌ బయట గేటును బలంగా ఢీకొట్టింది’ అని వైట్‌ హౌస్‌ కార్యాలయం వెల్లడించింది. ఇది గమనించిన భద్రతా సిబ్బంది ఘటనా స్థలానికి చేరుకొని సహాయం చేసే ప్రయత్నం చేయగా.. డ్రైవర్‌ అప్పటికే మృతి చెందినట్లు గుర్తించారని తెలిపింది.

ఈ ఘటనపై పోలీసులు, స్థానిక యంత్రాంగంతో కలిసి దర్యాప్తు చేస్తున్నట్లు సీక్రెట్‌ సర్వీస్‌ విభాగం వెల్లడించింది. భద్రతకు సంబంధించి ఎటువంటి ముప్పు లేదని పేర్కొంది. ఇదిలా ఉంటే, వైట్‌హౌస్‌ వద్ద ఈ తరహా ఘటన జనవరిలోనూ చోటుచేసుకుంది. ఇదే గేటును ఓ వాహనం ఢీ కొట్టింది. ఇలా కొంతకాలంగా వైట్‌హౌస్‌ వద్ద జరుగుతోన్న చొరబాట్ల నేపథ్యంలో భారీ ఫెన్సింగ్‌ను ఇటీవల ఏర్పాటు చేశారు.