ట్రంప్‌ సెల్ఫ్‌గోల్ఫ్‌!

‘టోర్నమెంట్‌’ సమయంలో  స్టార్మీ డేనియల్స్‌తో పరిచయం
 ఎన్నికల వేళలో ఒప్పందం

వాషింగ్టన్‌: అగ్రరాజ్య చరిత్రలోనే తొలిసారిగా నేరాభియోగాలు ఎదుర్కొంటున్న మాజీ అధ్యక్షుడిగా ట్రంప్‌ నిలుస్తున్నారు. తనతో లైంగిక సంబంధాలున్నాయని ఆరోపించిన పోర్న్‌స్టార్‌ను డబ్బుతో ప్రలోభపెట్టారనేవి ఈ కేసులో ప్రధాన ఆరోపణలు. ఈ నేపథ్యంలో అసలు ట్రంప్‌-పోర్న్‌స్టార్‌ మధ్య ఏం జరిగిందనేది ఆసక్తికరంగా మారింది. స్టార్మీ డేనియల్స్‌ అసలు పేరు స్టిఫనీ క్లిఫర్డ్‌ (44). లూసియానాకు చెందిన ఆమె పలు చిత్రాల్లో నటించారు. 2006 జులైలో జరిగిన ఓ గోల్ఫ్‌ టోర్నమెంట్‌లో అమెరికా రియల్‌ ఎస్టేట్‌ దిగ్గజం డొనాల్డ్‌ ట్రంప్‌ను తొలిసారి కలుసుకున్నట్లు ఆమె పలు సందర్భాల్లో వెల్లడించారు. ‘ఆ టోర్నమెంట్‌ సమయంలో బాడీగార్డు ఆహ్వానం మేరకు.. ట్రంప్‌తో కలిసి భోజనం చేశా. అప్పుడే తన కవర్‌ ఫొటోతో ఉన్న ఓ గోల్ఫ్‌ మ్యాగజీన్‌ను ట్రంప్‌ చూపించారు. అప్పట్లో ఓ పాపులర్‌ టీవీ షోను నిర్వహిస్తున్న ఆయన.. అందులో కనిపించేందుకు ఆసక్తి ఉందా? అని అడిగారు. అనంతరం మేమిద్దరం ఏకాంతంగా గడిపాం’ అని 2018లో డేనియల్స్‌ వెల్లడించారు. అప్పట్లో ఆమె వయసు 27 ఏళ్లు కాగా ట్రంప్‌ వయసు 60 సంవత్సరాలు. అప్పటికే మెలానియాను ట్రంప్‌ మూడో పెళ్లి చేసుకుని ఏడాది అయింది. మెలానియా తన కుమారుడు బారెన్‌కు జన్మనిచ్చిన 4 నెలలకే ట్రంప్‌- డేనియల్స్‌ కలుసుకున్నట్లు సమాచారం.

2007లో మరోసారి..

రియాలిటీ షోలో పాల్గొనే అంశంపై చర్చించేందుకు 2007లోనూ ట్రంప్‌, డేనియల్స్‌ లాస్‌ ఏంజెలెస్‌లో కలుసుకున్నారు. ఆ సమయంలో ఏకాంతంగా గడపాలని ట్రంప్‌ కోరినప్పటికీ తాను అంగీకరించలేదని డేనియల్స్‌ తెలిపారు. ఇది జరిగిన నెల తర్వాత ట్రంప్‌ నుంచి ఫోన్‌ వచ్చిందని.. సెలబ్రిటీ షోలో తీసుకోలేకపోతున్నామని చెప్పినట్లు ఆమె వివరించారు.డేనియల్స్‌ ఆరోపణలను ట్రంప్‌ ఖండించారు. కేవలం డబ్బు కోసమే ఆమె ఈ ఆరోపణలు చేస్తోందని.. ఆమెతో ఎన్నడూ శృంగారంలో పాల్గొనలేదని స్పష్టం చేశారు.

వివాదానికి కారణమైన ఒప్పందం..

2016 నాటి అమెరికా అధ్యక్ష ఎన్నికల్లో ట్రంప్‌ విజయం సాధించారు. ఆ సమయంలోనే.. లైంగిక సంబంధాలను బయటకు పొక్కనీయకుండా డేనియల్స్‌ను డబ్బుతో ప్రలోభపెట్టారనేది ఆరోపణ. ఈ వ్యవహారంలో ట్రంప్‌ న్యాయవాది ఆమెకు 1.30 లక్షల డాలర్లు సమకూర్చి ఆమెతో (ఇరుపక్షాల న్యాయవాదుల సమక్షంలో) ఒప్పందం చేసుకున్నట్లు సమాచారం. ఇది చెల్లదంటూ డేనియల్స్‌ కోర్టును ఆశ్రయించారు. తాజాగా ఇవే ఆరోపణలను న్యూయార్క్‌లోని మన్‌హటన్‌ న్యాయస్థానం ధ్రువీకరించింది.