అమెరికాలో నర్సుకు 760 ఏళ్ల జైలు శిక్ష

17 మంది రోగుల హత్య కేసులో...

ఇంటర్‌నెట్‌ డెస్క్‌: అధిక మోతాదులో ఇన్సులిన్‌ను ఇచ్చి 17 మంది మరణానికి కారణమైన ఓ నర్సుకు అమెరికాలోని ఓ కోర్టు 700 ఏళ్లకు పైగా శిక్షను శనివారం విధించింది. 2020-2023 సంవత్సరాల్లో అయిదు ఆసుపత్రులు మారిన ఆమె.. 22 మందికి అధిక మోతాదులో ఇన్సులిన్‌ ఇచ్చి హత్యాయత్నానికి పాల్పడిందని, వీరిలో 17 మంది మరణించారని కోర్టు ధ్రువీకరించింది. దీంతో ఆమెకు 380 నుంచి 760 ఏళ్ల వరకు జైలు శిక్షను విధిస్తున్నట్లు ప్రకటించింది. అమెరికాలోని పెన్సిల్వేనియాకు చెందిన హీథర్‌ ప్రెస్‌డీ(41) అధికంగా ఇన్సులిన్‌ ఇవ్వడం వల్లే ఇద్దరు రోగులు మరణించారంటూ గతేడాది మేలో ఓ ఆసుపత్రి యాజమాన్యం పోలీసులకు ఫిర్యాదు చేసింది. దీంతో రంగంలోకి దిగిన పోలీసులు.. తీగ లాగడంతో డొంకంతా కదిలింది. చుట్టూ ఉన్నవారన్నా, రోగులు అన్నా తనకు నచ్చరని.. వారికి హాని కలిగించాలని ఉందని ఆమె తన తల్లికి చేసే మెసేజ్‌లలో తరచుగా చెబుతుండేదని అధికారులు పేర్కొన్నారు.