Israel-Hamas: బందీల పిల్లలను ఆడిస్తున్న హమాస్‌ మిలిటెంట్లు.. వీడియో వైరల్‌

ఇంటర్నెట్‌ డెస్క్‌: ఇటీవల ఇజ్రాయెల్‌ (Israel)పై దాడి చేసిన హమాస్‌ మిలిటెంట్లు.. అక్కడ్నుంచి కొంతమంది పౌరులను బందీలుగా తీసుకొచ్చిన విషయం తెలిసిందే. ఆ బందీలకు సంబంధించిన ఓ వీడియో ఒకటి తాజాగా సామాజిక మాధ్యమాల్లో వైరల్‌ (Viral Video) అవుతోంది. అందులో హమాస్‌ (Hamas) మిలిటెంట్లు బందీల పిల్లలను ఆడిస్తూ, వారితో ఆడుకుంటూ కన్పించారు.

ఓ మిలిటెంట్‌ ఒక చేతిలో ఏకే-47 తుపాకీ పట్టుకుని మరో చేత్తో చంటిబిడ్డను ఎత్తుకుని ఆడించారు. ఓ పిల్లాడ్ని ఉయ్యాలో వేసి ఊపుతూ కన్పించారు. ఈ వీడియోను హమాస్‌ తొలుత తమ టెలిగ్రామ్‌ ఛానల్‌లో పోస్ట్ చేయగా.. హమాస్‌ మద్దతుదారులు సామాజిక మాధ్యమాల్లో షేర్‌ చేశారు. ప్రస్తుతం ఇది వైరల్‌గా మారింది. ఇజ్రాయెల్‌ పౌరులపై హమాస్‌ మిలిటెంట్లు అనేక అకృత్యాలకు పాల్పడినట్లు అంతర్జాతీయ మీడియాలో కథనాలు వస్తున్న వేళ.. ఈ వీడియో రావడం చర్చనీయాంశంగా మారింది. తమపై వ్యతిరేకత పెరుగుతున్న వేళ.. బందీలను తాము క్షేమంగానే చూసుకుంటున్నామనే సందేశాన్నిచ్చేందుకే హమాస్‌ ఈ వీడియోను విడుదల చేసినట్లు అభిప్రాయాలు వినిపిస్తున్నాయి.

యుద్ధ నియమాలు పాటిస్తున్నారా?

అయితే, ఇదే వీడియోను ఇజ్రాయెల్ డిఫెన్స్‌ ఫోర్సెస్‌ తమ అధికారిక ఎక్స్‌ ఖాతాలో షేర్‌ చేసింది. ‘‘హమాస్‌ చెరలో బందీ అయిన ఈ పిల్లలకు గాయాలయ్యాయి. వారు ఏడుస్తున్నారు. భయపడుతున్నారు. ఈ ఉగ్రవాదులనే మేం ఓడించబోతున్నాం’’ అని రాసుకొచ్చింది.