Ukraine: రష్యాలో జిన్‌పింగ్‌.. ఉక్రెయిన్‌లో ప్రత్యక్షమైన జపాన్‌ ప్రధాని

ఇంటర్నెట్‌ డెస్క్‌: జపాన్‌ ప్రధానమంత్రి ఫ్యుమియో కిషిదా(Fumio Kishida) ఉక్రెయిన్‌(Ukraine)లో ఆకస్మిక పర్యటన చేపట్టారు. చైనా(China) అధినేత షీ జిన్‌పింగ్‌(Xi Jinping) రష్యా(Russia)లో పర్యటిస్తోన్న వేళ.. కిషిదా కీవ్‌లో ప్రత్యక్షం కావడం ప్రాధాన్యం సంతరించుకుంది. భారత్‌ పర్యటనలో ఉన్న కిషిదా ఇక్కడినుంచి నేరుగా ఉక్రెయిన్‌కు చేరుకున్నారు. రష్యా సైనిక చర్య కొనసాగుతోన్న తరుణంలో కిషిదా ఉక్రెయిన్‌ పర్యటన.. ఆ దేశానికి సంఘీభావంతోపాటు ఇరుదేశాల మధ్య బలమైన సహకారానికి సంకేతంగా నిలుస్తుందని విశ్లేషకులు చెబుతున్నారు. ఈ క్రమంలోనే కిషిదా.. ఉక్రెయిన్‌ అధ్యక్షుడు జెలెన్‌స్కీతో భేటీ కానున్నారు. ఉక్రెయిన్‌పై రష్యా దాడులను జపాన్‌ ఖండిస్తోన్న విషయం తెలిసిందే.

రష్యాలో జిన్‌పింగ్‌ రెండో రోజు..

మాస్కో పర్యటనలో భాగంగా చైనా అధ్యక్షుడు జిన్‌పింగ్‌.. రెండో రోజు మంగళవారం రష్యా ప్రధాని మిఖాయిల్‌ మిషుస్తిన్‌తో సమావేశమయ్యారు. రష్యాతో వ్యూహాత్మక సంబంధాలకు తమ దేశం ప్రాధాన్యం ఇస్తుందని జిన్‌పింగ్‌ పేర్కొన్నారు. మరోవైపు.. పుతిన్‌ను ఈ ఏడాది చివర్లో చైనాలో పర్యటించాల్సిందిగా జిన్‌పింగ్‌ ఆహ్వానించినట్లు సమాచారం. అంతకుముందు.. ఉక్రెయిన్‌ సంక్షోభం విషయంలో చైనా ‘శాంతి ప్రతిపాదన’పై రష్యా అధినేత పుతిన్‌, జిన్‌పింగ్‌లు సుదీర్ఘ చర్చ చేపట్టినట్లు క్రెమ్లిన్‌ అధికార ప్రతిధిని పెస్కొవ్‌ వెల్లడించారు. ఉక్రెయిన్‌ అధ్యక్షుడు జెలెన్‌స్కీతోనూ జిన్‌పింగ్‌ టెలిఫోన్‌ సంభాషణకు ప్రయత్నాలు జరుగుతున్నట్లు తెలుస్తోంది.