Modi France Visit: ఫ్రాన్స్‌ చేరుకున్న ప్రధాని మోదీ.. రెడ్‌ కార్పెట్‌ స్వాగతం

పారిస్: భారత ప్రధాని నరేంద్ర మోదీ (Narendra Modi) ఫ్రాన్స్‌ (France)కు చేరుకున్నారు. రెండు రోజుల పర్యటనలో భాగంగా నేడు పారిస్‌ (Paris) విమానాశ్రయానికి చేరుకున్న ప్రధాని మోదీకి.. రెడ్‌ కార్పెట్‌ స్వాగతం పలికారు. ఫ్రాన్స్‌ ప్రధాని ఎలిజబెత్‌ బార్న్‌ ప్రధాని మోదీని రిసీవ్‌ చేసుకున్నారు. అనంతరం గౌరవ వందనం స్వీకరించారు. ప్రధాని మోదీ తాను ఫ్రాన్స్‌కు చేరుకున్నట్లు ట్వీట్‌ చేశారు. స్వాగత కార్యక్రమానికి సంబంధించిన ఫొటోలను పోస్ట్‌ చేశారు. ఈ పర్యటనలో భాగంగా భారత్- ఫ్రాన్స్‌ల పరస్పర సహకారాన్ని మరింత పెంపొందించేలా కృషి చేస్తానని పేర్కొన్నారు. ఇరుదేశాల మధ్య వ్యూహాత్మక భాగస్వామ్యానికి 25 ఏళ్లు పూర్తయిన వేళ మోదీ ఈ పర్యటన చేపడుతున్నారు.

• ఇదీ చదవండి: భారత్‌ లేకపోతే.. భద్రతా మండలి పరిపూర్ణం కాదు: మోదీ

ప్రధాని మోదీ తొలుత ఫ్రాన్స్‌ ప్రధాని ఎలిజబెత్ బార్న్‌తో సమావేశమవుతారు. అనంతరం సెనేట్‌ను సందర్శించి.. సెనేట్ అధ్యక్షుడు గెరాడ్ లార్చర్‌తో భేటీ కానున్నారు. భారత కాలమానం ప్రకారం రాత్రి 11 గంటల సమయంలో.. ప్రవాస భారతీయుల సమావేశంలో పాల్గొని ప్రసంగించనున్నారు. ఆ తర్వాత.. ఎలీసీ ప్యాలెస్‌లో ఫ్రాన్స్‌ అధ్యక్షుడు ఇమాన్యుయేల్‌ మెక్రాన్‌ ఏర్పాటు చేసిన ప్రైవేట్‌ విందులో పాల్గొననున్నారు. ఇదిలా ఉండగా.. మెక్రాన్‌ ఆహ్వానం మేరకు ప్రధాని మోదీ.. ఆ దేశ ‘నేషనల్‌ డే’ వేడుకలకు ముఖ్య అతిథిగా హాజరు కానున్న విషయం తెలిసిందే. పారిస్‌లో శుక్రవారం జరగనున్న నేషనల్‌ డే పరేడ్‌లో మోదీ పాల్గొననున్నారు. ఇందులో భారత త్రివిధ దళాలూ భాగస్వామ్యం కానున్నాయి.