నికార్సైన మార్కెట్‌!

విడ్డూరం-ఆశ్చర్యం

నికార్సైన మార్కెట్‌!

ఉల్లిపాయలు.. కిలో రూ.50. టమాటాలు.. రూ.15. అక్కడ బోర్డుపై మాత్రమే రాసి ఉంటుంది. తూకం వేసి ఇవ్వడానికి దుకాణాదారుడు ఉండడు. కనీసం డబ్బులూ తీసుకోడు. కొనుగోలుదారే సరకులు తూకం వేసుకోవాలి. దానికి సరిపడా డబ్బులు గల్లాపెట్టెలో వేయాలి. అవసరమైతే చిల్లర మార్చుకోవాలి. ‘చేతివాటం చూపేవాళ్లకి ఇది భలే అవకాశం కదా.. ఈరోజుల్లో అంత నిజాయతీగా ఉండేవాళ్లెవరూ?’ అనే అనుమానం మీకొస్తుంది కదా! కానీ ఉంటున్నారు. అదీ ఏళ్లకేళ్లుగా. నిజాయతీ అంతరించిపోతున్న ఈరోజుల్లోనూ నిఖార్సైన ఈ వ్యాపారం నిరాటంకంగా కొనసాగుతోంది. మిజోరం రాజధాని ఐజ్వాల్‌కు 65 కిలోమీటర్ల దూరంలో ఉండే సీలింగ్‌లో ఈ ఆదర్శవంతమైన వ్యాపారం జరుగుతోంది.
సాధారణంగా బేరం ఆడనిదే ఏ వస్తువునూ కొనుగోలు చేయడానికి ఆసక్తి చూపరు సామాన్య ప్రజలు. అక్కడ మాత్రం అంతా భిన్నం. అన్నదాతలు తాము పండించిన పండ్లు, కూరగాయలు, పండ్లరసాలు, ఎండు చేపలను వెదురు బుట్టల్లో సర్ది, అక్కడి పాకల్లో పెడతారు. వాటి ధర ఎంతో బోర్డుపై రాసి వెళ్లిపోతారు. తమతమ పనుల్లో నిమగ్నమవుతారు. కొనుగోలుదారులు తమకు నచ్చిన, అవసరమైన నిత్యావసర వస్తువులను తీసుకుని పక్కనే ఉండే డబ్బాలో డబ్బులు వేస్తుంటారు. మిగతా ప్రపంచానికి ఇది ఆశ్చర్యంగా, ఆదర్శంగా అనిపించినా అక్కడి రైతులు, కొనుగోలుదారులకి మామూలు విషయమే. ఏళ్లకొద్దీ ఈ విధానం, దుకాణాల నిర్వహణ కొనసాగిస్తున్నా అక్కడి రైతులు ఏనాడూ నష్టపోయింది లేదు. వాళ్ల నమ్మకం వమ్ము కాలేదు. ఈనోటా ఆనోటా పాకి ఈ ప్రాంతం ఇప్పుడు ఒక పర్యటక ప్రదేశంగా, నిజాయతీకి చిరునామాగా మారిపోయింది.

Tags :

మరిన్ని

జిల్లా వార్తలు

చదువు సుఖీభవ ఈ-నాడు మకరందం రయ్.. రయ్ సిరి ఈ తరం హాయ్! ఆహా హాయ్ బుజ్జీ స్థిరాస్తి రుచులు

విడ్డూరం-ఆశ్చర్యం

మరిన్ని

రుచులు

App