ఆవుల కోసం లోన్‌ తీసుకుంది..!

మహిళా జయహో

ఆవుల కోసం లోన్‌ తీసుకుంది..!

ఎవరైనా ఇల్లు కట్టుకోవడానికో.. పిల్లల ఉన్నత చదువుల కోసమో లోన్‌ తీసుకుంటారు. కానీ గాయత్రి మాత్రం ఆవులను బతికించడం కోసం లోన్‌ తీసుకుంది..

గాయత్రివాళ్ల అమ్మమ్మది ఒంగోలులోని సింగరాయకొండకు దగ్గరగా ఉండే చాకిచర్ల గ్రామం. హైదరాబాద్‌లోని ఓ ప్రముఖ బ్యాంక్‌లో పనిచేస్తున్న రెండేళ్ల క్రితం గాయత్రి తన ఊరు వచ్చింది. అక్కడ కరవు పరిస్థితులు ఆమెను కలచివేశాయి. మేత కూడా లేక రైతులు ఆవులను కబేళాలకు తరలిస్తుండడం మరింత బాధించింది. దీంతో గ్రామంలో గోశాలను ప్రారంభించాలని నిర్ణయించింది. దీనికి మధుసూధన్‌రెడ్డి అనే దాత స్థలాన్ని ఇచ్చారు. ఇతర ఏర్పాట్ల కోసం బ్యాంకు నుంచి రూ. 15 లక్షలు లోన్‌ తీసుకుంది. తన అవసరాలకు దాచుకున్న మరో రూ.10 లక్షలనూ దీనికి వెచ్చించింది. మొదట ఎనిమిది ఆవులతో గోశాలను ప్రారంభించింది గాయత్రి. ఇప్పుడు వాటి సంఖ్య ఎనభైఐదుకు చేరింది.

ప్రస్తుతం గోశాలలో నలుగురు పనివాళ్లు ఆవుల బాగోగులు చూస్తున్నారు. ఆస్ట్రేలియాలో ఇంజినీర్‌గా పనిచేసి ఇక్కడకు వచ్చి స్థిరపడిన ఆమె అన్నయ్య నాగేంద్ర కూడా ఇక్కడే ఉంటారు. ఇప్పుడు చుట్టుపక్కల గ్రామాల వాళ్లూ గోవులను తీసుకొచ్చి ఇస్తున్నారు. పశువుల గడ్డీ, దాణా, వైద్య ఖర్చుల కోసం నెలకు సుమారు రూ.2 లక్షల వరకు ఖర్చవుతోంది. దాతలు నగదు, గడ్డి రూపంలో సాయం అందిస్తున్నారు. అంతేకాదు చుట్టుపక్కల గ్రామాలు, స్కూళ్లకు వెళ్లి గోవుల ప్రాముఖ్యాన్ని వివరిస్తుంది గాయత్రి.

Tags :