దిల్లీ: కరోనా కొత్త వేరియంట్‌ ఒమిక్రాన్‌ భయంతో విదేశాల నుంచి వస్తోన్న ప్రయాణికులకు అధికారులు కొవిడ్‌ పరీక్షలు నిర్వహిస్తున్నారు. అయితే, ఆర్టీపీసీఆర్‌ పరీక్షల చేయడానికి, ఫలితాలు రావడానికి చాలా సమయం పడుతోంది. దీంతో విమానాశ్రయాల్లో రద్దీ పెరుగుతోంది. ఈ నేపథ్యంలో కొవిడ్‌ ఫలితాలు త్వరగా వచ్చేలా ఇండియన్‌ కౌన్సిల్‌ ఆఫ్‌ మెడికల్‌ రీసెర్చ్‌(ఐసీఎంఆర్‌)లోని నేషనల్‌ ఇన్‌స్టిట్యూట్‌ ఆఫ్ వైరాలజీ విభాగం ఆర్‌టీ-లాంప్‌(RT-LAMP)కొవిడ్‌ కిట్‌ను ఆవిష్కరించింది. నిపుణుల అవసరం లేకుండా సులభంగా ఈ కిట్‌తో కరోనా పరీక్షలు నిర్వహించవచ్చని.. ఫలితాలు అరగంటలోపే వస్తాయని ఐసీఎంఆర్‌ పేర్కొంది.

ఆర్‌టీ-లాంప్‌ వందశాతం సమర్థంగా పనిచేస్తుందని.. కచ్చితమైన ఫలితాలను ఇస్తుందని ఐసీఎంఆర్‌ ప్రతినిధులు వెల్లడించారు. ఇతర కొవిడ్‌ పరీక్షల కంటే ఈ ఆర్‌టీ-లాంప్‌ పరీక్షకు 40శాతం తక్కువ ఖర్చవుతుందని తెలిపారు. వీటిని భారీ సంఖ్యలో ఉత్పత్తి చేయడం కోసం దిల్లీ, చెన్నైలోని పలు కంపెనీలకు నమూనాలు పంపించామని, మరో రెండు వారాల్లో ఈ కొత్త కొవిడ్‌ కిట్‌ అందుబాటులోకి వస్తుందని వివరించారు. ఇవి విమానాశ్రయాలతోపాటు, ఓడరేవులు, రైల్వేస్టేషన్‌, బస్టాండ్‌లలో ప్రయాణికులకు పరీక్షలు చేసేందుకు ఉపయుక్తంగా ఉంటాయని ఐసీఎంఆర్‌ తెలిపింది. 

► Read latest National - International News and Telugu News