Feedback | E-PAPER | Pratibha

IND vs AUS Fourth Test: నాలుగో టెస్టు డ్రా.. 2-1తో భారత్‌దే సిరీస్‌

IND vs AUS Fourth Test: అహ్మదాబాద్‌ వేదికగా బోర్డర్ - గావస్కర్ ట్రోఫీలో (Border - Gavaskar Trophy) భారత్ - ఆసీస్ జట్ల మధ్య (IND vs AUS) నాలుగో టెస్టు మ్యాచ్‌ డ్రాగా ముగిసింది. దీంతో సిరీస్‌ 2-1తో భారత్‌ వశమైంది. టాస్‌ గెలిచిన ఆసీస్‌ తొలి ఇన్నింగ్స్‌లో 480 పరుగులు చేసింది. బదులుగా భారత్‌ 571 పరుగులు కొట్టింది. రెండో ఇన్నింగ్స్‌లో కంగారూలు 175/2 దగ్గర ఉండగా ఇరు జట్ల కెప్టెన్లు నిర్ణయం తీసుకొని మ్యాచ్‌ను డ్రాగా ముగించారు.

Updated : 13 Mar 2023 15:41 IST

వ

13/03/2023 15:22(IST)

నాలుగో టెస్టు డ్రా.. 2-1తో సిరీస్‌ గెలుచుకున్న భారత్‌

ఆస్ట్రేలియాతో జరుగుతున్న నాలుగో టెస్టు డ్రాగా ముగిసింది. ఫలితం తేలే అవకాశం లేకపోవడంతో ఇరు కెప్టెన్లు నిర్ణయం తీసుకుని మ్యాచ్‌ను నిర్ణీత సమయం కంటే ముందుగానే ముగించేశారు. అంపైర్లు ఈ టెస్టు డ్రా అయినట్లు ప్రకటించారు. దీంతో నాలుగు టెస్టుల బోర్డర్‌ - గావస్కర్‌ ట్రోఫీని భారత్ 2-1తో గెలుచుకుంది.

13/03/2023 14:14(IST)

టీ బ్రేక్‌.. ఆసీస్‌ 158/2

నాలుగో టెస్టు ఐదో రోజు ఆటలో రెండో సెషన్‌ ముగిసింది. టీ బ్రేక్ సమయానికి ఆస్ట్రేలియా 2 వికెట్ల నష్టానికి 158 పరుగులు చేసింది. క్రీజ్‌లో మార్నస్ లబుషేన్ (56*), స్మిత్ ఉన్నారు. ప్రస్తుతం ఆసీస్‌ 67 పరుగుల ఆధిక్యంలో కొనసాగుతోంది. అంతకుముందు సెంచరీకి చేరువగా వచ్చిన ట్రావిస్ హెడ్ (90)ను అక్షర్ పటేల్ క్లీన్‌బౌల్డ్‌ చేశాడు.

13/03/2023 13:56(IST)

అక్షర్‌ పటేల్‌కు వికెట్

కీలకమైన సమయంలో అక్షర్ పటేల్ వికెట్‌ తీశాడు. అద్భుతంగా ఆడిన ట్రావిస్‌ హెడ్‌ (90)ను క్లీన్‌బౌల్డ్‌ చేశాడు. దీంతో పది పరుగుల దూరంలో హెడ్‌ సెంచరీని మిస్‌ చేసుకున్నాడు. దీంతో 153 పరుగుల వద్ద ఆసీస్‌ రెండో వికెట్‌ను కోల్పోయింది. లబుషేన్‌ తో కలిసి 139 పరుగుల భాగస్వామ్యానికి తెరపడింది.

13/03/2023 13:47(IST)

లబుషేన్‌ కూడా ఫిఫ్టీ

వన్‌డౌన్‌లో వచ్చిన మార్నస్ లబుషేన్ (51*) కూడా హాఫ్ సెంచరీ పూర్తి చేశాడు. టెస్టుల్లో అతడికిది 15వ అర్ధశతకం. ట్రావిస్ హెడ్ (87*)తో కలిసి లబుషేన్‌ రెండో వికెట్‌కు 136 పరుగులు జోడించాడు. ప్రస్తుతం ఆసీస్ స్కోరు 150/1కి చేరింది. దీంతో 59 పరుగుల ఆధిక్యం సాధించింది.

13/03/2023 13:14(IST)

సెంచరీ కొట్టేశారు

రెండో వికెట్‌కు ట్రావిస్ హెడ్ (76*), మార్నస్ లబుషేన్ (37*) సెంచరీ భాగస్వామ్యం నిర్మించారు. ఆరంభంలో ఆచితూచి ఆడిన వీరిద్దరూ కుదురుకున్నాక బ్యాట్‌ను ఝుళిపించారు. ప్రస్తుతం 51 ఓవర్లు ముగిసేసరికి ఆసీస్‌ తన రెండో ఇన్నింగ్స్‌లో 123/1 స్కోరుతో కొనసాగుతోంది. దీంతో 32 పరుగుల ఆధిక్యం సాధించింది.

13/03/2023 12:51(IST)

హెడ్ దూకుడు

ఆసీస్‌ ఓపెనర్ ట్రావిస్ హెడ్ (69*) హాఫ్ సెంచరీ తర్వాత దూకుడు పెంచాడు. మరో బ్యాటర్ లబుషేన్ (36*) తో కలిసి రెండో వికెట్‌కు 97 పరుగులు జోడించాడు. ప్రస్తుతం ఆసీస్‌ 46 ఓవర్లలో 111/1 స్కోరుతో కొనసాగుతోంది. దీంతో 20 పరుగుల ఆధిక్యంలోకి వచ్చింది.

13/03/2023 12:26(IST)

WTC Finalకు భారత్

వరుసగా రెండోసారి టీమ్‌ఇండియా డబ్ల్యూటీసీ ఫైనల్‌కు చేరింది. శ్రీలంకపై న్యూజిలాండ్‌ విజయం సాధించడంతో భారత్‌కు ఇబ్బంది లేకుండా పోయింది. జూన్ 7 నుంచి లండన్‌ వేదికగా జరిగే ఫైనల్‌లో ఆస్ట్రేలియాతోనే భారత్‌ తలపడాల్సి ఉంటుంది.

13/03/2023 11:33(IST)

లంచ్‌ బ్రేక్‌.. ఆసీస్ 73/1

భారత్ - ఆసీస్‌ జట్ల మధ్య నాలుగో టెస్టు ఐదో రోజు ఆటలో తొలి సెషన్‌ ముగిసింది. లంచ్‌ బ్రేక్‌ సమయానికి ఆస్ట్రేలియా 36 ఓవర్లలో 73/1 స్కోరు చేసింది. క్రీజ్‌లో ట్రావిస్‌ హెడ్ (45*), మార్నస్‌ లబుషేన్ (22*) ఉన్నారు. వీరిద్దరూ రెండో వికెట్‌కు 59 పరుగులు జోడించారు. ఈ సెషన్‌లో (30 ఓవర్లు) ఆసీస్‌ ఒక్క వికెట్‌ను మాత్రమే కోల్పోయి 70 పరుగులు చేయడం విశేషం. భారత్‌ కంటే ఆసీస్ 18 పరుగుల వెనుకంజలో ఉంది.

13/03/2023 11:08(IST)

పాతుకుపోయిన బ్యాటర్లు

ఆసీస్‌ బ్యాటర్లు క్రీజ్‌లో పాతుకుపోయారు. భారత బౌలర్లు కట్టుదిట్టంగా బంతులను సంధిస్తున్నా ఏమాత్రం అవకాశం దొరకడం లేదు. ప్రస్తుతం 30 ఓవర్లు ముగిసేసరికి ఆసీస్‌ స్కోరు 57/1. ట్రావిస్‌ హెడ్ (32*), మార్నస్‌ లబుషేన్ (19*) ఉన్నారు. వీరిద్దరూ రెండో వికెట్‌కు 43 పరుగులు జోడించారు. ఇప్పటికీ భారత్ కంటే ఇంకా 34 పరుగుల దూరంలోనే ఉంది.

13/03/2023 10:43(IST)

దూకుడుగా బ్యాటింగ్‌

ఆరంభంలో నిదానంగా ఆడిన ఆసీస్‌ బ్యాటర్లు క్రమంగా దూకుడు పెంచుతున్నారు. జడేజా, అశ్విన్‌ బౌలింగ్‌లో బౌండరీలు కొట్టారు. ప్రస్తుతం 23 ఓవర్లలో వికెట్ నష్టానికి 42 పరుగులు చేసింది. క్రీజ్‌లో ట్రావిస్ హెడ్ (23*), మార్నస్ లబుషేన్ (13*) ఉన్నారు. భారత్‌ కంటే ఇంకా49 పరుగులు వెనుకబడి ఉంది.

13/03/2023 10:21(IST)

కట్టుదిట్టంగా బౌలింగ్‌

టీమ్‌ఇండియా బౌలింగ్ కట్టుదిట్టంగా ఉండటంతో ఆసీస్‌ బ్యాటర్లు క్రీజ్‌లో పాతుకుపోయేందుకే ప్రయత్నిస్తున్నారు. మార్నస్ లబుషేన్ (3*), ట్రావిస్ హెడ్ (12*) రిస్క్‌ తీసుకోవడం లేదు. ప్రస్తుతం ఆసీస్‌ స్కోరు 18 ఓవర్లలో 21/1. భారత్‌ కంటే ఆసీస్‌ ఇంకా 70 పరుగుల వెనుకబడి ఉంది.

13/03/2023 09:52(IST)

తొలి వికెట్ పడింది

భారత బౌలర్లు వికెట్ల వేట ప్రారంభించారు. ఐదో రోజు తొలి సెషన్‌ ప్రారంభమైన ఐదో ఓవర్‌లోనే ఫలితం రాబట్టారు. తన బ్యాటింగ్‌తో విసిగించిన కునెమన్ (6)ను రవిచంద్రన్ అశ్విన్‌ ఎల్బీ చేశాడు. డీఆర్ఎస్‌కు వెళ్లకుండానే కునెమన్‌ నిరాశగా పెవిలియన్‌ బాట పట్టాడు. దీంతో 14 పరుగుల (10.4వ ఓవర్) వద్ద ఆసీస్‌ తొలి వికెట్‌ను కోల్పోయింది. అయితే రిప్లేలో మాత్రం వికెట్లను తాకకుండానే బంతి వెళ్లినట్లు కనిపించింది. దీంతో ఆసీస్‌ శిబిరం నిరుత్సాహానికి గురైంది. ప్రస్తుతం 11 ఓవర్లు ముగిసేసరికి ఆసీస్ స్కోరు 14/1. క్రీజ్‌లో హెడ్ (8*), లబుషేన్ ఉన్నారు.

13/03/2023 09:39(IST)

టెస్టుకు శ్రేయస్ దూరం

గాయం కారణంగా టీమ్‌ఇండియా బ్యాటర్ శ్రేయస్‌ అయ్యర్ టెస్టులోని మిగతా ఆటకు దూరమైనట్లు బీసీసీఐ వెల్లడించింది. దీంతో భారత్‌ తన రెండో ఇన్నింగ్స్‌లో కేవలం పదిమంది బ్యాటర్లతోనే బరిలోకి దిగాల్సి ఉంటుంది. ఆసీస్‌తో వన్డే సిరీస్‌కూ దూరమయ్యే అవకాశాలు ఉన్నట్లు సమాచారం. గాయానికి సంబంధించి వైద్యబృందం పర్యవేక్షిస్తోందని బీసీసీఐ తెలిపింది. వెన్ను నొప్పి తిరగబెట్టడంతో శ్రేయస్‌ తొలి ఇన్నింగ్స్‌లో బ్యాటింగ్‌కు కూడా రాలేదు.

13/03/2023 09:31(IST)

చివరి రోజు ఆట ప్రారంభం

భారత్ - ఆస్ట్రేలియా జట్ల మధ్య నాలుగో టెస్టు చివరి రోజు ఆట ప్రారంభమైంది. ఓవర్‌నైట్‌ 3/0 స్కోరుతో ఆసీస్‌ తన రెండో ఇన్నింగ్స్‌ను కొనసాగిస్తోంది. క్రీజ్‌లోకి కునెమన్‌, ట్రావిస్‌ హెడ్ వచ్చారు. ఇవాళ తొలి ఓవర్‌ను రవిచంద్రన్ అశ్విన్‌ వేస్తున్నాడు.

13/03/2023 09:27(IST)

ఎన్నాళ్లకెన్నాళ్లకు.. ఒక్కో ఫార్మాట్లో సెంచరీ కరవు తీర్చుకుంటూ..

ఒకప్పుడు సెంచరీల మోత మోగించిన కోహ్లి.. రెండున్నర ఏళ్లుగా ఏ ఫార్మాట్లోనూ ఒక్క శతకం సాధించలేకపోయాడు. కానీ 2022 ఏడాది మళ్లీ అతడిలోని ‘కింగ్‌’ను నిద్రలేపింది. గత సంవత్సరం రెండో అర్ధభాగం నుంచి ఒక్కో ఫార్మాట్లో సెంచరీ కరవును తీర్చుకుంటూ వస్తున్నాడు. 2022 సెప్టెంబర్‌లో ఆసియాకప్‌ టీ20 టోర్నీలో అఫ్గానిస్థాన్‌పై 122 పరుగులతో అజేయంగా నిలిచి రెండున్నర ఏళ్ల శతక నిరీక్షణకు తెరదించిన కోహ్లి.. ఆ తర్వాత వన్డేల్లో చెలరేగాడు. చివరి ఏడు వన్డేల్లో అతడు మూడుసార్లు మూడంకెల స్కోరు అందుకున్నాడు. పూర్తి వార్త కోసం క్లిక్‌ చేయండి

13/03/2023 09:26(IST)

IND Vs AUS: కింగ్‌ కొట్టాడు.. కసితీరా!

తెల్లటి దుస్తుల్లో కింగ్‌ హెల్మెట్‌ తీసి.. చేతులు రెండూ చాచి అభిమానులకు అభివాదం చేసి ఎంత కాలమైందో! ఎప్పుడో 2019 నవంబరులో చూశాం ఆ దృశ్యం! మూడేళ్లు గడిచిపోయాయి. 41 ఇన్నింగ్స్‌లు అయిపోయాయి. ఎట్టకేలకు అతను టెస్టు మ్యాచ్‌లో మళ్లీ మూడంకెల ముచ్చట తీర్చుకున్నాడు. ఆస్ట్రేలియా సాధించిన కొండంత స్కోరు ముందుండగా రెండో రోజు ఒత్తిడి మధ్య క్రీజులో అడుగు పెట్టి, కష్టపడి అర్ధశతకం సాధించిన విరాట్‌.. మూడో రోజు దాన్ని భారీ శతకంగా మలిచాడు. జట్టుకు ముప్పు తప్పించి, కీలకమైన ఆధిక్యం కూడా సాధించి పెట్టాడు. పూర్తి వార్త కోసం క్లిక్‌ చేయండి

12/03/2023 18:46(IST)

బ్యాటర్‌ సెట్‌ అయితే కష్టమే: అక్షర్‌ పటేల్‌

‘‘వీలైనంత ఎక్కువసేపు క్రీజులో నిలిచి ఆడటమే ఆలోచనగా పెట్టుకున్నాను. అదే చేసి చూపించాను’’ అని అన్నాడు ఆల్‌రౌండర్‌ అక్షర్‌ పటేల్‌. నాలుగో టెస్టు తొలి ఇన్నింగ్స్‌లో అక్షర్‌ పటేల్‌ అర్ధశతకం (79)తో రాణించాడు. ఈ క్రమంలో తన ఆటతీరు గురించి మాట్లాడాడు. ‘‘నా బ్యాటింగ్‌ విషయంలో నేను చాలా ఆనందంగా ఉన్నాను. జట్టుకు అవసరమైన సమయంలో పరుగులు అందిస్తున్నాను. గతేడాది నా పరుగులు జట్టును గెలిపించాయి. ఆ ఆత్మవిశ్వాసాన్నే ఇప్పుడూ కొనసాగిస్తూ ఆడుతున్నాను. ఈ పిచ్‌ మీద బ్యాటర్లు సెట్‌ అయ్యాక.. బౌలర్లకు వికెట్‌ పడగొట్టడం కష్టంగా మారింది అని చెప్పాడు.

12/03/2023 18:43(IST)

రోహిత్, పుజారా నిరాశ చెందాలి: గావస్కర్‌

బ్యాటింగ్‌కు అనుకూలిస్తున్న పిచ్‌పై రోహిత్‌, పుజారా తక్కువ స్కోరుకే పెవిలియన్‌ చేరడం గురించి భారత మాజీ ఆటగాడు సునీల్‌ గావస్కర్‌ ఓ టీవీ ఛానల్‌లో మాట్లాడాడు. బ్యాటర్లకు పూర్తిగా అనుకూలించిన పిచ్‌ను సరిగ్గా ఉపయోగించుకోనందుకు రోహిత్ శర్మ, పుజారా చాలా నిరాశ చెందాలని గావస్కర్ అన్నాడు. తొలి ఇన్నింగ్స్‌లో రోహిత్‌ (35), పుజారా (42) పరుగులకే ఔటైన విషయం తెలిసిందే.

12/03/2023 17:06(IST)

నాలుగో రోజు ఆట పూర్తి.. ఆధిక్యంలో భారత్

భారత్‌, ఆస్ట్రేలియాతో మధ్య జరుగుతున్న నాలుగో టెస్టులో టీమ్‌ఇండియా భారీ స్కోరు సాధించి ఆధిక్యంలోకి దూసుకెళ్లింది. ఓవర్‌నైట్ స్కోరు 289/3తో ఆటను ప్రారంభించిన టీమ్‌ఇండియా 571 పరుగులకు ఆలౌటై 91 పరుగుల ఆధిక్యం సంపాదించింది. గాయం కారణంగా శ్రేయస్ అయ్యర్‌ బ్యాటింగ్‌కు దిగలేదు. అనంతరం రెండో ఇన్నింగ్స్‌ను ప్రారంభించిన ఆస్ట్రేలియా.. ఆట ముగిసే సమయానికి 6 ఓవర్లకు 3/0 స్కోరుతో నిలిచింది. ట్రావిస్‌ హెడ్ (3 బ్యాటింగ్‌), కునెమన్‌ పరుగుల ఖాతా తెరవలేదు. ఆసీస్‌ ఇంకా 88 పరుగుల వెనుకంజలో ఉంది. ఐదో రోజు కంగారులను ఎంత తక్కువ స్కోరుకు ఆలౌట్ చేస్తామనే దానిపైనే భారత్ విజయావకాశాలు ఆధారపడి ఉన్నాయి. ఒకవేళ, ఆస్ట్రేలియా బ్యాటర్లు క్రీజులో నిలదొక్కుకుంటే మ్యాచ్‌ డ్రా అయ్యే అవకాశాలు ఎక్కువగా ఉన్నాయి.

12/03/2023 16:34(IST)

కోహ్లీ డబుల్ మిస్‌.. తొలి ఇన్నింగ్స్‌ పూర్తి

విరాట్ కోహ్లీ (186) డబుల్ సెంచరీ మిస్‌ చేసుకున్నాడు. మర్ఫీ వేసిన 178.5 బంతికి లబుషేన్‌కు క్యాచ్‌ ఇచ్చి పెవిలియన్ చేరాడు. దీంతో భారత్ తొమ్మిదో వికెట్ కోల్పోయింది. గాయం కారణంగా శ్రేయస్ అయ్యర్‌ బ్యాటింగ్‌కు దిగలేదు. దీంతో మొదటి ఇన్నింగ్స్‌లో టీమ్‌ఇండియా 571 పరుగులకు ఆలౌటై 91 పరుగుల ఆధిక్యం సంపాదించింది.

12/03/2023 16:18(IST)

ఏడో వికెట్

రవిచంద్రన్‌ అశ్విన్‌ (7) ఔటయ్యాడు. నాథన్‌ లైయన్‌ వేసిన 176 ఓవర్‌లో చివరి బంతికి కునెమన్‌కి క్యాచ్‌ ఇచ్చి పెవిలియన్‌ చేరాడు. దీంతో 568 పరుగుల వద్ద టీమ్‌ఇండియా ఏడో వికెట్‌ కోల్పోయింది. 176 ఓవర్లకు స్కోరు 568/7. కోహ్లీ (183) డబుల్‌ సెంచరీ దిశగా సాగుతున్నాడు.

12/03/2023 15:54(IST)

ప్చ్‌.. అక్షర్‌ పటేల్ ఔట్‌

టీమ్‌ఇండియా ఆరో వికెట్ కోల్పోయింది. దూకుడుగా ఆడుతున్న ఆల్‌రౌండర్‌ అక్షర్‌ పటేల్ (79) ఔటయ్యాడు. మిచెల్ స్టార్క్‌ వేసిన 172.3 ఓవర్‌కు క్లీన్‌బౌల్డ్ అయ్యాడు. దీంతో కోహ్లీ, అక్షర్‌ల 162 పరుగుల భాగస్వామ్యానికి తెరపడింది. 173 ఓవర్లకు టీమ్‌ఇండియా స్కోరు 557/6. విరాట్‌ కోహ్లీ (178), అశ్విన్‌ (1) క్రీజులో ఉన్నారు. ప్రస్తుతం భారత్ 77 పరుగుల ఆధిక్యంలో ఉంది.

12/03/2023 15:47(IST)

దూకుడు పెంచిన అక్షర్‌ పటేల్

అర్ధ శతకం సాధించిన తర్వాత అక్షర్‌ పటేల్ మరింత దూకుడుగా ఆడుతున్నాడు. కునెమన్‌ 169 ఓవర్‌లో ఒక సిక్స్‌ బాదిన అతడు.. కునెమన్‌ వేసిన 171 ఓవర్‌లో రెండు సిక్సర్లు కొట్టాడు. టాడ్‌ మార్ఫీ వేసిన 170 ఓవర్‌లో ఓ ఫోర్‌ బాదాడు. దీంతో ఈ మూడు ఓవర్లలో భారత్ 32 పరుగులు రాబట్టింది. 171 ఓవర్లకు టీమ్‌ఇండియా స్కోరు 551/5. విరాట్‌ కోహ్లీ (174), అక్షర్‌ పటేల్ (78) క్రీజులో ఉన్నారు. టీమ్‌ఇండియా 91 పరుగుల ఆధిక్యం సంపాదించింది.

12/03/2023 15:23(IST)

అక్షర్‌ పటేల్‌ అర్ధ శతకం..

అక్షర్‌ పటేల్‌ అర్ధ శతకం నమోదు చేశాడు. ఈ సిరీస్‌లో అతడికిది మూడో అర్ధ శతకం. మరోవైపు కోహ్లీ దూకుడు పెంచాడు. 168 ఓవర్లు ముగిసే సరికి భారత స్కోరు 519/5. క్రీజులో కోహ్లీ (169*), అక్షర్‌ పటేల్‌ (51*) ఉన్నారు. ప్రస్తుతం భారత ఆధిక్యం 39 పరుగులు

12/03/2023 15:07(IST)

500 దాటిన భారత్‌ తొలి ఇన్నింగ్స్‌ స్కోరు

నాలుగో టెస్టు తొలి ఇన్నింగ్స్‌లో భారత్‌ స్కోరు 500 పరుగులు దాటింది. క్రీజులో కోహ్లీ 155 పరుగులతో ఉండగా.. మరో ఎండ్‌లో అక్షర్‌ పటేల్‌ అర్ధ శతకానికి చేరువలో ఉన్నాడు. టీమ్‌ఇండియా ప్రస్తుతానికి 22 పరుగుల ఆధిక్యంలో కొనసాగుతోంది. 165 ఓవర్లకు భారత్‌ స్కోరు 502/5.

12/03/2023 14:50(IST)

ఆధిక్యంలోకి భారత్‌

నాలుగో టెస్టు తొలి ఇన్నింగ్స్‌లో భారత్‌ 6 పరుగుల ఆధిక్యంలోకి వచ్చింది. ప్రస్తుతం టీమ్ఇండియా స్కోరు 162 ఓవర్లకు 486/5కి చేరింది. క్రీజ్‌లో విరాట్ కోహ్లీ (144*), అక్షర్ పటేల్ (43*) ఉన్నారు. వీరిద్దరూ ఆరో వికెట్‌కు ఇప్పటి దాకా 93 పరుగులు జోడించారు. అంతకుముందు ఆస్ట్రేలియా తమ మొదటి ఇన్నింగ్స్‌లో 480 పరుగులు చేసిన విషయం తెలిసిందే.

12/03/2023 14:33(IST)

మూడో సెషన్ ఆట ప్రారంభం

నాలుగో రోజు ఆటలో కీలకమైన మూడో సెషన్‌ ప్రారంభమైంది. ఇంకా 31 ఓవర్లపాటు ఆట మిగిలి ఉంది. ఈ సెషన్‌లో కనీసం వంద పరుగులు చేస్తే ఆసీస్‌పై భారత్‌ ఆధిపత్యం ప్రదర్శించేందుకు అవకాశంఉంది. ప్రస్తుతం భారత్ స్కోరు 472/5. క్రీజ్‌లో విరాట్ కోహ్లీ, అక్షర్ పటేల్ ఉన్నారు.

12/03/2023 14:15(IST)

టీ బ్రేక్.. భారత్ స్కోరు 472/5

నాలుగో టెస్టు నాలుగో రోజు రెండో సెషన్‌ ఆట ముగిసింది. టీ బ్రేక్‌ సమయానికి భారత్‌ 158 ఓవర్లలో 472/5 స్కోరుతో ఉంది. క్రీజ్‌లో విరాట్ కోహ్లీ (135*), అక్షర్ పటేల్ (38*) ఉన్నారు. వీరిద్దరూ ఆరో వికెట్‌కు ఇప్పటి వరకు 79 పరుగులను జోడించారు. ఆసీస్‌ తొలి ఇన్నింగ్స్‌ స్కోరుకు భారత్ కేవలం 8 పరుగుల దూరంలోనే ఉంది. చివరి సెషన్‌లో వీలైనన్ని ఎక్కువ పరుగులు సాధిస్తే ఆసీస్‌పై ఆధిక్యం దక్కించుకోవచ్చు.

12/03/2023 13:46(IST)

ఆరో వికెట్‌కూ ఫిఫ్టీ+

మర్ఫీ వేసిన ఇన్నింగ్స్‌ 148వ ఓవర్‌లో అక్షర్ పటేల్ (30*) సిక్స్‌ కొట్టగా.. విరాట్ కోహ్లీ (130*) ఫోర్ బాదాడు. ఈ క్రమంలో ఆరో వికెట్‌కూ అర్ధశతక (54) భాగస్వామ్యం నిర్మించారు. ఇలా ఒక టెస్టులో వరుసగా ఆరు వికెట్‌కూ ఫిఫ్టీ + పరుగులు సాధించిన మూడో మ్యాచ్‌ ఇదే కావడం విశేషం. అంతకుముందు వెస్టిండీస్‌పై ఆసీస్ (1960), బంగ్లాదేశ్‌పై (2015) పాక్‌ సాధించాయి. ప్రస్తుతం భారత్ 152 ఓవర్లలో ఐదు వికెట్ల నష్టానికి 447 పరుగులు చేసింది.

12/03/2023 13:20(IST)

అడపాదడపా బౌండరీలు

విరాట్ కోహ్లీ (110*), అక్షర్ పటేల్ (14*) నిలకడగా ఆడుతూనే.. అడపాదడపా బౌండరీలు సాధించారు. స్టార్క్‌ బౌలింగ్‌లో విరాట్ రెండు బౌండరీలు, అక్షర్ పటేల్ ఒక ఫోర్ బాదారు. ప్రస్తుతం 146 ఓవర్లు ముగిసేసరికి భారత్ స్కోరు 424/5కి చేరింది. ఆసీస్ కంటే ఇంకా 56 పరుగుల వెనుకంజలో ఉంది. ఆసీస్‌ తన తొలి ఇన్నింగ్స్‌లో 480 పరుగులకు ఆలౌటైన విషయం తెలిసిందే.

12/03/2023 12:45(IST)

విరాట్ కోహ్లీ సెంచరీ (Virat Century)

ఎప్పుడో 2019 నవంబర్‌లో బంగ్లాదేశ్‌పై టెస్టుల్లో సెంచరీ సాధించిన విరాట్ కోహ్లీ.. ఎట్టకేలకు సుదీర్ఘ నిరీక్షణకు తెరదించాడు. నాలుగో టెస్టులో ఆసీస్‌పై 241 బంతుల్లో 100 పరుగుల మార్క్‌ను తాకాడు. అంతర్జాతీయ టెస్టు క్రికెట్‌లో విరాట్‌కిది 28వది కాగా.. అన్ని ఫార్మాట్లు కలిపి 75వ శతకం. ప్రస్తుతం భారత్‌ స్కోరు 139 ఓవర్లలో 400/5. క్రీజ్‌లో విరాట్‌తోపాటు అక్షర్ పటేల్ (5*) ఉన్నాడు. ఆసీస్‌ కంటే ఇంకా తొలి ఇన్నింగ్స్‌లో 80 పరుగుల వెనుకంజలో ఉంది.

12/03/2023 12:38(IST)

భరత్‌ ఔట్

కేఎస్ భరత్ (44) అర్ధశతకం సాధించే అవకాశం చేజారింది. లయన్ బౌలింగ్‌లో (136.4వ ఓవర్) డిఫెన్స్‌ ఆడబోయిన భరత్‌.. బంతి ఎడ్జ్‌తీసుకొని ప్యాడ్లకు తాకి షార్ట్‌ లెగ్‌లో ఉన్న హ్యాండ్స్‌కాంబ్‌ చేతికి చిక్కాడు. దీంతో భారత్ 393 పరుగుల వద్ద ఐదో వికెట్‌ను నష్టపోయింది. ప్రస్తుతం క్రీజ్‌లో విరాట్ కోహ్లీ (98*), అక్షర్ పటేల్ ఉన్నారు.

12/03/2023 12:26(IST)

రెండు సిక్స్‌లు, ఫోర్ (Two Sixes)

కామెరూన్ గ్రీన్‌వేసిన ఇన్నింగ్స్‌ 134వ ఓవర్‌లో కేఎస్ భరత్ (42*) రెండు సిక్స్‌లు, ఫోర్ కొట్టాడు. దీంతో ఈ ఓవర్‌లో ఏకంగా 21 పరుగులు వచ్చాయి. దీంతో భారత్ స్కోరు 386/4కి చేరింది. క్రీజ్‌లో భరత్‌తోపాటు విరాట్ కోహ్లీ (92*) శతకం దిశగా సాగుతున్నాడు. ప్రస్తుతం ఆసీస్‌ కంటే భారత్‌ 94 పరుగుల వెనుకంజలో మాత్రమే ఉంది.

12/03/2023 11:41(IST)

ప్రతి వికెట్‌కూ 50+ భాగస్వామ్యం

ఆసీస్‌తో జరుగుతున్న నాలుగో టెస్టులో అరుదైన ఘనతను భారత్ సొంతం చేసుకుంది. తొలి ఐదు వికెట్లకు అర్ధశతకం కంటే ఎక్కువ భాగస్వామ్యం నమోదైన మూడో మ్యాచ్‌గా నిలిచింది. ఇంతకుముందు బంగ్లాదేశ్‌ మీద 2007లో, ముంబయి వేదికగా 1993లో ఇంగ్లాండ్‌పై ఈ ఘనతను సాధించింది. ఈ మ్యాచ్‌లో ఇలా..

* రోహిత్ శర్మ - శుభ్‌మన్‌ గిల్ : 74 పరుగులు (తొలి వికెట్‌)

* గిల్‌ - పుజారా: 113 పరుగులు (రెండో వికెట్‌)

* గిల్ - విరాట్ కోహ్లీ: 58 పరుగులు (మూడో వికెట్‌కు)

* విరాట్ కోహ్లీ - జడేజా: 64 పరుగులు (నాలుగో వికెట్‌కు)

* విరాట్ కోహ్లీ - కేఎస్ భరత్ : 53* పరుగులు (ఐదో వికెట్‌కు)

12/03/2023 11:33(IST)

లంచ్‌ బ్రేక్‌.. భారత్ 362/4

నాలుగో టెస్టు నాలుగో రోజు తొలి సెషన్‌ ముగిసింది. లంచ్‌ బ్రేక్‌ సమయానికి టీమ్‌ఇండియా 131 ఓవర్లలో నాలుగు వికెట్ల నష్టానికి 362 పరుగులు చేసింది. క్రీజ్‌లో శ్రీకర్ భరత్ (25*), విరాట్ కోహ్లీ (88*) ఉన్నారు. వీరిద్దరూ ఐదో వికెట్‌కు ఇప్పటి వరకు 53 పరుగులను జోడించారు. ఆసీస్‌ కంటే భారత్ ఇంకా 118 పరుగుల వెనుకంజలో ఉంది.

12/03/2023 11:07(IST)

కట్టుదిట్టంగా ఆసీస్ బౌలింగ్‌

ఆసీస్‌ బౌలర్లు కట్టుదిట్టంగా బంతులను సంధిస్తున్నారు. దీంతో పరుగులు రాబట్టడం భారత బ్యాటర్లకు కాస్త కష్టంగా మారింది. అయినా, ఎలాంటి రిస్క్‌కు పోకుండా ఆడుతున్నారు. ప్రస్తుతం 125 ఓవర్లు ముగిసేసరికి భారత్‌ స్కోరు 341/4కి చేరింది. క్రీజ్‌లో భరత్ (18*), విరాట్ కోహ్లీ (79*) ఉన్నారు. వీరిద్దరూ ఇప్పటి వరకు 108 బంతుల్లో 32 పరుగులను మాత్రమే జోడించారు. పిచ్‌ కఠినంగా మారుతుందనేదానికి ఇదే సంకేతం. ఇంకాస్త ఓపికగా ఆడితేనే భారత్‌ గట్టేందుకు అవకాశం ఉంటుంది.

12/03/2023 10:33(IST)

ఆచితూచి ఆడుతూ..

రవీంద్ర జడేజా ఔటైన తర్వాత క్రీజ్‌లోకి వచ్చిన శ్రీకర్ భరత్ (8*)తో కలిసి విరాట్ కోహ్లీ (70*) ఆచితూచి ఆడుతున్నాడు. ప్రత్యర్థి బౌలర్లకు ఏమాత్రం అవకాశం ఇవ్వకుండా క్రీజ్‌లో పాతుకుపోయారు. ప్రస్తుతం 116 ఓవర్లలో భారత్ నాలుగు వికెట్ల నష్టానికి 323 పరుగులు చేసింది. ఇంకా ఆసీస్‌ కంటే 157 పరుగుల వెనుకంజలో ఉంది. ఈ సెషన్‌ పూర్తి కావడానికి ఇంకా గంట సమయం ఉంది.

12/03/2023 10:28(IST)

శ్రేయస్‌కు గాయం..?

టీమ్‌ఇండియా మిడిలార్డర్ బ్యాటర్ శ్రేయస్‌ అయ్యర్‌కు గాయమైందా..? అవుననే అంటున్నాయి బీసీసీఐ వర్గాలు. లోయర్‌ బ్యాక్ పెయిన్‌ రావడంతో అతడిని స్కానింగ్‌ కోసం పంపినట్లు సమాచారం. అందుకే, రవీంద్ర జడేజా ఔటైన తర్వాత శ్రీకర్ భరత్‌ను మేనేజ్‌మెంట్ బ్యాటింగ్‌కు పంపింది. అయితే, పూర్తి సమాచారం ఇంకా తెలియాల్సి ఉంది. బీసీసీఐ నుంచి ఎలాంటి అధికారిక ప్రకటన లేదు.

12/03/2023 10:01(IST)

జడేజా ఔట్

టీమ్‌ఇండియా ఆల్‌రౌండర్ రవీంద్ర జడేజా (28) అనవసర షాట్‌కు యత్నించి పెవిలియన్‌కు చేరాడు. మర్ఫీ బౌలింగ్‌లో చెత్త షాట్‌ను కొట్టి మరీ మిడాన్‌లో ఖావాజా చేతికి చిక్కాడు. దీంతో 309 పరుగుల వద్ద భారత్ నాలుగో వికెట్‌నునష్టపోయింది. ప్రస్తుతం 107 ఓవర్లలో భారత్ స్కోరు 309/4. క్రీజ్‌లో విరాట్ కోహ్లీ (67*), శ్రీకర్‌ భరత్‌ ఉన్నారు.

12/03/2023 09:48(IST)

హాఫ్‌ సెంచరీ..

విరాట్ కోహ్లీ (65*), రవీంద్ర జడేజా (23*) నిలకడగా ఆడుతున్నారు. వీరిద్దరూ కలిసి అర్ధశతక (57) భాగస్వామ్యం నిర్మించారు. ఆసీస్‌ బౌలర్లు కట్టుదిట్టంగా బంతులను సంధిస్తున్నా ఏమాత్రం రిస్క్‌ తీసుకోవడం లేదు. ప్రస్తుతం 104 ఓవర్లలో భారత్‌ స్కోరు 302/3కి చేరింది. ఆసీస్ కంటే టీమ్‌ఇండియా ఇంకా 178 పరుగుల వెనుకంజలో ఉంది.

12/03/2023 09:14(IST)

‘కోహ్లీ డబుల్ సెంచరీ చేస్తే భారత్‌ విజయం సాధించే అవకాశం’

టీమ్‌ఇండియా బ్యాటర్ విరాట్ కోహ్లీ (Virat Kohli) గత కొంతకాలంగా టెస్టుల్లో ఫామ్‌లేమితో ఇబ్బంది పడుతున్నాడు. ఆస్ట్రేలియాతో జరుగుతున్న మూడు టెస్టుల్లో విఫలమైన అతడు నాలుగో టెస్టులో మాత్రం రాణిస్తున్నాడు. మొదటి ఇన్నింగ్స్‌లో అర్ధశతకం బాదాడు. మూడో రోజు ఆట ముగిసే సమయానికి 59 పరుగులతో నాటౌట్‌గా ఉన్నాడు. దాదాపు 14 నెలల తర్వాత సుదీర్ఘ ఫార్మాట్‌లో కోహ్లీ హాఫ్ సెంచరీ చేశాడు. ఈ నేపథ్యంలో కోహ్లీ ఆటతీరు గురించి భారత మాజీ ఆటగాడు సునీల్ గావస్కర్‌ (Sunil Gavaskar) మాట్లాడాడు. పూర్తి వార్త కోసం క్లిక్‌ చేయండి

12/03/2023 09:13(IST)

IND vs AUS: నిలిచారు.. ఇంకా నిలవాలి!

టాస్‌ గెలిచిన జట్టు బ్యాటింగ్‌ ఎంచుకుని ఒకటిన్నర రోజుకు పైగా ఆడి భారీ స్కోరు సాధిస్తుంది. తర్వాత బ్యాటింగ్‌కు వచ్చిన జట్టు కూడా దీటుగా స్పందిస్తుంది. మూడు రోజుల ఆట ముగిసేసరికి ఏ జట్టుదీ పైచేయిగా అనిపించదు. మ్యాచ్‌ డ్రా అవుతుందా.. లేక ఏదో ఒక జట్టు పైచేయి సాధించి విజయం వైపు అడుగులేస్తుందా అన్నది నాలుగో రోజు ఆటతోనే తేలుతుంది. సంప్రదాయ భారత పిచ్‌లపై టెస్టు మ్యాచ్‌ అంటే ఇలాగే ఉండేది ఒకప్పుడు! చాన్నాళ్ల తర్వాత ఇప్పుడు అలాంటి పిచ్‌, ఆ తరహా ఆట చూస్తున్నాం భారత్‌-ఆస్ట్రేలియా చివరి టెస్టులో. 480 పరుగుల భారీ స్కోరు చేసిన ఆస్ట్రేలియాకు దీటుగా బదులిస్తున్న టీమ్‌ఇండియా.. మూడో రోజు ఆట ఆఖరుకు 289/3తో నిలిచింది. పూర్తి వార్త కోసం క్లిక్‌ చేయండి

11/03/2023 17:05(IST)

మూడో రోజు ఆట పూర్తి

భారత్, ఆస్ట్రేలియా (IND vs AUS) మధ్య జరుగుతున్న నాలుగో టెస్టులో మూడో రోజు ఆట ముగిసింది. ఆట ముగిసే సమయానికి మొదటి ఇన్నింగ్స్‌లో టీమ్‌ఇండియా మూడు వికెట్ల నష్టానికి 289 పరుగులు చేసింది. విరాట్ కోహ్లీ (59; 128 బంతుల్లో 5 ఫోర్లు బ్యాటింగ్‌), రవీంద్ర జడేజా (16; 54 బంతుల్లో 1 సిక్స్‌ బ్యాటింగ్‌) క్రీజులో ఉన్నారు. తొలి ఇన్నింగ్స్‌లో భారత్ ఇంకా 191 పరుగుల వెనుకంజలో ఉంది.

11/03/2023 16:41(IST)

14 నెలల తర్వాత కోహ్లీ హాఫ్‌ సెంచరీ..

విరాట్ కోహ్లీ అర్ధ శతకం పూర్తి చేసుకున్నాడు. లైయన్‌ వేసిన 93 ఓవర్లో రెండు పరుగులు చేసి హాఫ్‌ సెంచరీ మార్కును అందుకున్నాడు. దాదాపు 14 నెలల తర్వాత కోహ్లీ అర్ధ శతకం బాదాడు. టెస్టుల్లో గత 16 ఇన్సింగ్స్‌ల్లో అతడికి మొదటి హాఫ్‌ సెంచరీ కావడం గమనార్హం. 95 ఓవర్లకు స్కోరు 273/3. కోహ్లీ (53), జడేజా (6) క్రీజులో ఉన్నారు.

11/03/2023 16:30(IST)

అర్ధ శతకానికి చేరువలో

ఆస్ట్రేలియా బౌలర్లు కట్టుదిట్టంగా బంతులేస్తుండటంతో భారత్ బ్యాటర్లు నెమ్మదిగా ఆడుతున్నారు. లైయన్‌ వేసిన 87 ఓవర్‌లో చివరి బంతికి కోహ్లీ ఓ ఫోర్‌ బాదాడు. మార్ఫీ వేసిన తర్వాతి ఓవర్‌లో ఒక్క పరుగూ రాలేదు. 91 ఓవర్లకు భారత్ 263/3. కోహ్లీ (46) అర్ధ శతకానికి చేరువలో ఉండగా.. జడేజా (4) నెమ్మదిగా ఆడుతున్నాడు.

11/03/2023 15:39(IST)

అయ్యో.. గిల్ ఔట్

అద్భుతమైన ఇన్నింగ్స్‌ ఆడిన టీమ్‌ఇండియా యువ బ్యాటర్ శుభ్‌మన్‌ గిల్ (128) పెవిలియన్‌కు చేరాడు. లయన్ బౌలింగ్‌లో ఎల్బీగా ఔటయ్యాడు. డీఆర్‌ఎస్ వెళ్లినా.. సమీక్షలోనూ ఔట్‌గా తేలడంతో పెవిలియన్‌ బాట పట్టాడు. దీంతో 245 పరుగుల వద్ద భారత్‌ మూడో వికెట్‌ను నష్టపోయింది. గిల్‌ ఔటైన అనంతరం బ్యాటింగ్‌కు రవీంద్ర జడేజా వచ్చాడు. ప్రస్తుతం 79 ఓవర్లు ముగిసేసరికి భారత్‌ స్కోరు 245/3. క్రీజ్‌లో జడేజాతోపాటు విరాట్ కోహ్లీ (32*) ఉన్నాడు. ఆసీస్‌కు ఇంకా భారత్ 235 పరుగుల దూరంలో ఉంది.

11/03/2023 15:33(IST)

విరాట్ దూకుడు

ఆరంభంలో ఆచితూచి ఆడిన విరాట్ కోహ్లీ (31*) బ్యాట్‌ను ఝుళిపించాడు. స్టార్క్, మర్ఫీ వేసిన వరుస ఓవర్లలో బౌండరీలు బాదాడు. ప్రస్తుతం 78 ఓవర్లలో భారత్‌ రెండు వికెట్ల నష్టానికి 243 పరుగులు చేసింది. ఆసీస్‌ కంటే ఇంకా 237 పరుగుల వెనుకంజలో భారత్‌ ఉంది. మరోవైపు శుభ్‌మన్‌ గిల్ (127*) కూడా దూకుడు ప్రదర్శిస్తున్నాడు. వీరిద్దరూ మూడో వికెట్‌కు ఇప్పటి వరకు 56 పరుగులు జోడించారు.

11/03/2023 14:58(IST)

200 దాటిన స్కోరు

భారత స్కోరు 200 మార్క్‌ను దాటింది. శుభ్‌మన్‌ గిల్ (117*)తోపాటు విరాట్ కోహ్లీ (8*) ఆచితూచి ఆడుతూ పరుగులు రాబడుతున్నాడు. పుజారా ఔటైన తర్వాత క్రీజ్‌లోకి వచ్చిన విరాట్.. నిదానంగా ఇన్నింగ్స్‌ను ప్రారంభించాడు. ప్రస్తుతం 71 ఓవర్లలో 2 వికెట్ల నష్టానికి 210 పరుగులు చేసింది. ఇంకా 270 పరుగులు వెనుకంజలో ఉంది.

11/03/2023 14:33(IST)

చివరి సెషన్‌ ఆట ప్రారంభం

నాలుగో టెస్టు మూడో రోజు చివరి సెషన్ ఆట ప్రారంభమైంది. భారత బ్యాటర్లు శుభ్‌మన్‌ గిల్‌ (103*), విరాట్ కోహ్లీ క్రీజ్‌లోకి వచ్చారు. ఈ సెషన్‌ మొదటి ఓవర్‌ను టాడ్‌ మర్ఫీ వేస్తున్నాడు. ప్రస్తుతం భారత్‌ స్కోరు 188/2 (63). చివరి సెషన్‌లో వీలైనన్ని ఎక్కువ పరుగులు సాధిస్తేనే భారత్‌కు ప్రయోజనం చేకూరుతుంది.

11/03/2023 14:29(IST)

దిగ్గజాల సరసన పుజారా

ఆసీస్‌తో నాలుగో టెస్టు తొలి ఇన్నింగ్స్‌లో 42 పరుగుల వద్ద ఛెతేశ్వర్‌ పుజారా పెవిలియన్‌కు చేరాడు. అయితే అరుదైన ఘనతను తన ఖాతాలో వేసుకున్నాడు. బోర్డర్ - గావస్కర్ ట్రోఫీలో (Border - Gavaskar Trophy) ఆసీస్‌పై టెస్టుల్లో 2వేలకుపైగా పరుగులు సాధించిన నాలుగో బ్యాటర్‌గా అవతరించాడు. ఇంతకుముందు సచిన్‌, వీవీఎస్‌ లక్ష్మణ్‌, రాహుల్‌ ద్రవిడ్‌ ఈ జాబితాలో ఉన్నారు.

11/03/2023 14:10(IST)

టీ బ్రేక్‌.. పుజారా ఔట్

శుభ్‌మన్‌ గిల్ (102*) సెంచరీ సాధించాడనే ఆనందం భారత్‌కు క్షణాల్లోనే మాయమైపోయింది. క్రీజ్‌లోకి వచ్చినప్పటి నుంచి నిలకడగా ఆడుతున్న సీనియర్‌ బ్యాటర్ ఛెతేశ్వర్ పుజారా (42) పెవిలియన్‌కు చేరాడు. టాడ్‌ మర్ఫీ బౌలింగ్‌లో వికెట్ల ముందు దొరికిపోయాడు. దీంతో గిల్‌తో కలిసి నిర్మించిన 113 పరుగుల భాగస్వామ్యానికి తెరపడింది. పుజారా డీఆర్‌ఎస్‌కు వెళ్లినా భారత్‌కు అనుకూలంగా ఫలితం రాలేదు. దీంతో భారత్‌ 187 పరుగుల వద్ద రెండో వికెట్‌ను నష్టపోయింది. ప్రస్తుతం టీ బ్రేక్‌ సమయానికి భారత్‌ స్కోరు 63 ఓవర్లలో 188/2. క్రీజ్‌లో గిల్‌తోపాటు కోహ్లీ ఉన్నాడు. భారత్ ఇంకా ఆసీస్‌ కంటే 292 పరుగులు వెనుకంజలో ఉంది. ఈ సెషన్‌లో భారత్‌ కేవలం 59 పరుగులను మాత్రమే చేసింది.

11/03/2023 14:03(IST)

గిల్‌ సెంచరీ (Gill Century)

టీమ్‌ఇండియా యువ బ్యాటర్ శుభ్‌మన్ గిల్ (101*) శతకం పూర్తి చేశాడు. ఇది అతడి టెస్టు కెరీర్‌లో రెండోది కావడం విశేషం. గిల్‌ 194 బంతుల్లో సెంచరీ మార్క్‌ను అందుకొన్నాడు. ప్రస్తుతం భారత్ స్కోరు 186/1. క్రీజ్‌లో గిల్‌తోపాటు పుజారా (42*) ఉన్నాడు. స్వదేశంలో గిల్‌కు ఇదే తొలి సెంచరీ.

11/03/2023 13:52(IST)

సెంచరీ.. హాఫ్ సెంచరీ దిశగా..

భారత బ్యాటర్లు కాస్త దూకుడు పెంచారు. గత పది ఓవర్ల నుంచి చప్పగా సాగుతున్న మ్యాచ్‌ను పరుగులు పెట్టించారు. కామెరూన్ గ్రీన్‌ వేసిన ఇన్నింగ్స్‌ 57వ ఓవర్‌లో రెండు ఫోర్లతో సహా 12 పరుగులు రాబట్టారు. రెండు బౌండరీలు శుభ్‌మన్ (91*) ఖాతాలో పడ్డాయి. ఇక తర్వాత మర్ఫీ వేసిన బౌలింగ్‌లోనూ పుజారా (41*) ఫోర్ కొట్టాడు. దీంతో వీరిద్దరు కలిసి శతక (101*) భాగస్వామ్యం నిర్మించారు. భారత్ 58 ఓవర్లలో వికెట్ నష్టానికి 175 పరుగులు చేసింది. ఇంకా ఆసీస్‌ కంటే 305 పరుగుల వెనుకంజలో ఉంది.

11/03/2023 13:10(IST)

7 ఓవర్లలో 9 పరుగులు

ఆసీస్‌ బౌలర్లు కట్టుదిట్టంగా బంతులను వేస్తున్నారు. దీంతో గత 7 ఓవర్లలో కేవలం 9 పరుగులను మాత్రమే భారత బ్యాటర్లు రాబట్టారు. రెండు మెయిడిన్లు ఉండటం గమనార్హం. ప్రస్తుతం 51 ఓవర్లు ముగిసేసరికి టీమ్‌ఇండియా స్కోరు 152/1కి చేరింది. క్రీజ్‌లో పుజారా (34*), గిల్ (76*) ఉన్నారు.

11/03/2023 12:38(IST)

నిదానంగా బ్యాటింగ్‌..

రెండో సెషన్‌ను భారత్‌ నిదానంగా ప్రారంభించింది. బ్యాటర్లు శుభ్‌మన్‌ గిల్ (73*), ఛెతేశ్వర్ పుజారా (28*) ఎలాంటి రిస్క్‌ తీసుకోకుండా బ్యాటింగ్‌ చేస్తున్నారు. దీంతో పరుగులు రావడం కష్టంగా మారినప్పటికీ.. వికెట్‌ ఇవ్వకుండా ఆడుతున్నారు. ప్రస్తుతం 44 ఓవర్లు ముగిసేసరికి భారత్ స్కోరు 143/1కి చేరింది. ఇంకా ఆసీస్‌ కంటే 337 పరుగుల వెనుకంజలో ఉంది.

11/03/2023 11:33(IST)

లంచ్‌ బ్రేక్.. భారత్ 129/1

నాలుగో టెస్టు మూడో రోజు లంచ్‌ బ్రేక్ సమయానికి భారత్‌ వికెట్ నష్టానికి 129 పరుగులు చేసింది. క్రీజ్‌లో శుభ్‌మన్‌ గిల్ (65*), ఛెతేశ్వర్ పుజారా (22*) ఉన్నారు. వీరిద్దరూ రెండో వికెట్‌కు ఇప్పటికే అర్ధశతక (55) భాగస్వామ్యం నిర్మించారు. అంతకుముందు ఓపెనర్‌, కెప్టెన్ రోహిత్ శర్మ (35) వికెట్‌ను భారత్‌ కోల్పోయింది. ఇంకా ఆసీస్‌ కంటే భారత్ 351 పరుగులు లోటులో ఉంది. తొలి సెషన్‌లో భారత్‌ వికెట్‌ నష్టానికి 93 పరుగులు చేసింది.

11/03/2023 10:56(IST)

గిల్ హాఫ్ సెంచరీ (Gill Half Century)

టీమ్‌ఇండియా యువ బ్యాటర్ శుభ్‌మన్‌ గిల్ (51*) అర్ధశతకం సాధించాడు. ఇది కెరీర్‌లో ఐదో హాఫ్ సెంచరీ. కెప్టెన్ రోహిత్ శర్మ ఔటైన తర్వాత క్రీజ్‌లోకి వచ్చిన పుజారా (12*)తో కలిసి గిల్‌ ఇన్నింగ్స్‌ను నడిపిస్తున్నాడు. ప్రస్తుతం 29 ఓవర్లు ముగిసేసరికి భారత్‌ వికెట్‌ నష్టానికి 100 పరుగులు చేసింది.

11/03/2023 10:19(IST)

రోహిత్ ఔట్

భారత్‌కు షాక్ తగిలింది. నిలకడగా ఆడుతూ వచ్చిన కెప్టెన్ రోహిత్ శర్మ (35) పెవిలియన్‌కు చేరాడు. కునెమన్‌ బౌలింగ్‌లో షాట్‌ ఆడేందుకు యత్నించి షార్ట్‌ కవర్‌ పాయింట్‌లోని లబుషేన్‌ చేతికి చిక్కాడు. దీంతో 74 పరుగుల వద్ద భారత్‌ తొలి వికెట్‌ను నష్టపోయింది. ప్రస్తుతం భారత్‌ స్కోరు 74/1. క్రీజ్‌లో శుభ్‌మన్‌ గిల్ (38*), పుజారా ఉన్నారు.

11/03/2023 10:15(IST)

నిలకడగా రోహిత్ - గిల్ బ్యాటింగ్‌ (Rohit - Gill)

భారత ఓపెనర్లు రోహిత్ శర్మ (34*), శుభ్‌మన్‌ గిల్ (37*) నిలకడగా బ్యాటింగ్‌ చేస్తున్నారు. ఆసీస్‌ బౌలర్లకు ఏమాత్రం అవకాశం ఇవ్వకుండా ఆడుతున్నారు. రిస్క్‌ తీసుకోకుండా ఆచితూచి ఆడుతూ పరుగులు రాబడుతున్నారు. ప్రస్తుతం 20 ఓవర్లలో వికెట్ నష్టపోకుండా భారత్ 72 పరుగులు చేసింది.

11/03/2023 09:49(IST)

అర్ధశతక భాగస్వామ్యం

ఆసీస్‌ భారీ స్కోరుకు భారత బ్యాటర్లు ధీటుగానే బదులిస్తున్నారు. తొలి వికెట్‌కు కెప్టెన్ రోహిత్ శర్మ (20*), శుభ్‌మన్‌ గిల్ (33*) అర్ధశతక భాగస్వామ్యం నిర్మించారు. ప్రస్తుతం 14 ఓవర్లు ముగిసేసరికి టీమ్‌ఇండియా వికెట్‌ నష్టపోకుండా 54 పరుగులు చేసింది. ఇంకా 426 పరుగులు వెనుకబడి ఉంది.

11/03/2023 09:31(IST)

మూడో రోజు ఆట ప్రారంభం

భారత్ - ఆస్ట్రేలియా జట్ల మధ్య నాలుగో టెస్టు మూడో రోజు ఆట ప్రారంభమైంది. ఓవర్‌నైట్ 36/0 స్కోరుతో భారత్‌ తన తొలి ఇన్నింగ్స్‌ను కొనసాగిస్తోంది. క్రీజ్‌లోకి రోహిత్ శర్మ, గిల్‌ వచ్చారు. ఇవాళ తొలి ఓవర్‌ను స్టార్క్‌ ప్రారంభించాడు.

11/03/2023 09:12(IST)

IND vs AUS: కొండంత కొట్టారు

ఇక ఈ పర్యటనలో ఆస్ట్రేలియాను ఓడించడం గురించి టీమ్‌ఇండియా దాదాపుగా మరిచిపోవచ్చు! రోహిత్‌ సేన ఇక పోరాడాల్సింది డ్రా కోసమే కావచ్చు! మూడో టెస్టులో బంతితో భారత్‌ను దెబ్బ కొట్టి మ్యాచ్‌ను ఎగరేసుకుపోయిన కంగారూలు.. ఈసారి బ్యాటుతో రెచ్చిపోయారు. తొలి రోజు జోరును కొనసాగిస్తూ ఏకంగా 480 పరుగుల భారీ స్కోరు సాధించారు. ఉస్మాన్‌ ఖవాజా, కామెరూన్‌ గ్రీన్‌ జోడీ 200 పైచిలుకు భాగస్వామ్యంతో భారత బౌలర్లకు చుక్కలు చూపించింది. కొంచెం ఆలస్యంగా అయినా అశ్విన్‌ మాయ చేయబట్టి సరిపోయింది కానీ.. లేదంటే మ్యాచ్‌ దాదాపుగా కంగారూల చేతుల్లోకి వచ్చేసేదే. పూర్తి వార్త కోసం క్లిక్‌ చేయండి

10/03/2023 16:56(IST)

ముగిసిన ఆట.. భారత్ 36/0

భారత్ - ఆస్ట్రేలియా (IND vs AUS) నాలుగో టెస్టు రెండో రోజు ఆట ముగిసింది. ప్రస్తుతం ఆట ముగిసేసమయానికి భారత్‌ తన తొలి ఇన్నింగ్స్‌లో వికెట్ నష్టపోకుండా 36 పరుగులు చేసింది. క్రీజ్‌లో శుభ్‌మన్‌ గిల్ (18*), రోహిత్ శర్మ (17*) ఉన్నారు. అంతకుముందు ఆసీస్‌ మొదటి ఇన్నింగ్స్‌లో 480 పరుగులకు ఆలౌటైంది.

10/03/2023 16:32(IST)

నిదానంగా ఆడుతూ..

భారత తన తొలి ఇన్నింగ్స్‌ను నిదానంగా ప్రారంభించింది. రెండో రోజు ఆట చివర్లో బ్యాటింగ్ చేస్తుండంతో భారత బ్యాటర్లు రిస్క్‌ తీసుకోవడం లేదు. దీంతో 5 ఓవర్లు ముగిసేసరికి భారత్ స్కోరు 19/0. క్రీజ్‌లో రోహిత్ (8*), గిల్ (10*) ఉన్నారు. ఇంకా టీమ్‌ఇండియా ఆసీస్‌ కంటే 461 పరుగులు వెనుకబడి ఉంది.

10/03/2023 15:53(IST)

మర్ఫీ ఔట్.. అశ్విన్‌కు 5

దూకుడుగా ఆడిన టెయిలెండర్‌ బ్యాటర్ టాడ్ మర్ఫీ (41) పెవిలియన్‌కు చేరాడు. రవిచంద్రన్ అశ్విన్‌ బౌలింగ్‌లో (165.3వ ఓవర్) మర్ఫీ వికెట్ల ముందు దొరికిపోయాడు. అంపైర్ ఔట్‌గా ప్రకటించాడు. అయితే, మర్ఫీ డీఆర్‌ఎస్‌కు వెళ్లాడు. కానీ, అక్కడా సమీక్షలో ‘అంపైర్స్‌ కాల్’గా రావడంతో పెవిలియన్‌ బాట పట్టాడు.

10/03/2023 15:48(IST)

9వ వికెట్‌కు 50+ భాగస్వామ్యం

అహ్మదాబాద్‌ పిచ్‌ బ్యాటింగ్‌కు విపరీతంగా అనుకూలిస్తోంది. భారత బౌలర్లు కట్టుదిట్టంగా వేస్తున్నా సహకారం మాత్రం లభించడం లేదు. ఈ క్రమంలో 9వ వికెట్‌కు లయన్ (29*), మర్ఫీ (41*) అర్ధశతక భాగస్వామ్యం నిర్మించారు. ప్రస్తుతం వీరిద్దరూ కలిసి 66 పరుగులు జోడించారు. దీంతో ఆసీస్‌ 165 ఓవర్లు ముగిసేసరికి ఆసీస్‌ 8 వికెట్ల నష్టానికి 479 పరుగులు చేసింది.

10/03/2023 15:25(IST)

మర్ఫీ దూకుడు

టెయిలెండర్‌ టాడ్‌ మర్ఫీ (34*) కూడా దూకుడుగా ఆడుతున్నాడు. అడపాదడపా బౌండరీలు రాబడుతూ స్కోరుబోర్డును ముందుకు నడిపిస్తున్నాడు. ప్రస్తుతం ఆసీస్‌ 159 ఓవర్లలో 8 వికెట్ల నష్టానికి 458 పరుగులు చేసింది. క్రీజ్‌లో మర్ఫీతో పాటు లయన్ (20*) ఉన్నాడు.

10/03/2023 14:54(IST)

వికెట్‌ కోసం..

కీలకమైన ఉస్మాన్ ఖవాజా ఔటైనప్పటికీ ఆసీస్‌ స్కోరు బోర్డు మాత్రం ముందుకు సాగిపోతూనే ఉంది. టాడ్ మర్ఫీ (9*), నాథన్ లయన్ (10*) భారత బౌలర్లకు విసుగు తెప్పించేలా ఆడుతున్నారు. ప్రస్తుతం ఆసీస్‌ 152 ఓవర్లలో 8 వికెట్ల నష్టానికి 422 పరుగులు చేసింది. అశ్విన్‌, అక్షర్ కట్టుదిట్టంగా బంతులను సంధిస్తున్నా ఆసీస్‌ బ్యాటర్లు ఏమాత్రం రిస్క్‌ తీసుకోకుండా బ్యాటింగ్‌ చేస్తున్నారు.

10/03/2023 14:38(IST)

అలా తొలి బంతికే ఉస్మాన్‌ ఔట్

టీ బ్రేక్‌ విరామంఅనంతరం తొలి బంతికే కీలకమైన ఉస్మాన్ ఖావాజా (180) వికెట్‌ను ఆసీస్‌ కోల్పోయింది. అక్షర్‌ పటేల్‌ వేసిన బంతిని ఆడబోయి వికెట్ల ముందు దొరికిపోయాడు. తొలుత ఫీల్డ్‌ అంపైర్ నాటౌట్‌ అని ప్రకటించగా.. భారత్‌ డీఆర్ఎస్‌కు వెళ్లింది. సమీక్షలో ఔట్‌గా తేలడంతో ఖవాజా నిరాశగా పెవిలియన్‌కు చేరాడు. దీంతో 409 పరుగుల వద్ద ఆసీస్‌ 8వ వికెట్‌ను నష్టపోయింది. దాదాపు 47.4 ఓవర్ల తర్వాత అక్షర్‌కు టెస్టు వికెట్‌ దక్కింది. ఇదే అతడి కెరీర్‌లో అత్యంత వ్యవధితో తీసిన వికెట్‌ కావడం విశేషం. టీ బ్రేక్‌ విరామం తర్వాత రోహిత్ శర్మ మైదానంలోకి రాలేదు. అతడి స్థానంలో పుజారా సారథ్య బాధ్యతలు నిర్వర్తిస్తున్నాడు.

10/03/2023 14:15(IST)

టీ బ్రేక్.. ఆసీస్‌ 409/7

రెండో రోజు ఆటలో రెండో సెషన్‌ ఆట ముగిసింది. టీ బ్రేక్‌ సమయానికి ఆస్ట్రేలియా 146 ఓవర్లలో 7 వికెట్ల నష్టానికి 409 పరుగులు చేసింది. క్రీజ్‌లో ఉస్మాన్ ఖవాజా (180*), నాథన్‌ లయన్ (6*) ఉన్నారు. ఈ సెషన్‌లో ఆసీస్‌ 27 ఓవర్లలో 3 వికెట్లను కోల్పోయి 62 పరుగులు చేసింది. ఈ మూడు వికెట్లను అశ్విన్‌ తీయడం విశేషం.

10/03/2023 13:53(IST)

400 దాటిన స్కోరు

స్వల్ప వ్యవధిలో వికెట్లు పడినా ఆసీస్‌ స్కోరు మాత్రం ఆగడం లేదు. ఉస్మాన్ ఖవాజా (174*) ఓ వైపు పరుగులు చేసే పనిలో పడిపోయాడు. మరోవైపు నాథన్ లయన్ (4*) క్రీజ్‌లో పాతుకుపోయేందుకు ప్రయత్నిస్తున్నాడు. ప్రస్తుతం 142 ఓవర్లు ముగిసేసరికి ఆసీస్‌ ఏడు వికెట్ల నష్టానికి 401 పరుగులు చేసింది. ఓపెనర్ ఉస్మాన్‌ను ఔట్‌ చేస్తేనే ఆసీస్‌కు అడ్డుకట్ట వేసేందుకు అవకాశం ఉంటుంది.

10/03/2023 13:28(IST)

మరో వికెట్‌

రవిచంద్రన్ అశ్విన్‌ ఖాతాలో మరో వికెట్ పడింది. అశ్విన్‌ వేసిన (135.3వ ఓవర్) బంతిని డిఫెన్స్‌ ఆడబోయిన మిచెల్‌ స్టార్క్‌ (6) షార్ట్‌ లెగ్‌లో శ్రేయస్‌ అయ్యర్‌ అద్భుతంగా క్యాచ్‌ పట్టాడు. దీంతో 387 పరుగుల వద్ద ఆసీస్‌ ఏడో వికెట్‌ను కోల్పోయింది. ప్రస్తుతం ఆసీస్‌ 136 ఓవర్లలో 387/7 స్కోరుతో ఉంది. క్రీజ్‌లో ఖవాజా (165*), లయన్ ఉన్నాడు.

10/03/2023 13:04(IST)

క్యారీ డకౌట్‌

ఆసీస్‌ వికెట్‌ కీపర్ అలెక్స్ క్యారీ (0) మరోసారి విఫమలయ్యాడు. వచ్చీరావడంతోనే దూకుడుగా ఆడేందుకు యత్నించి అశ్విన్ (130.6వ ఓవర్) బౌలింగ్‌లో భారీ షాట్‌కు యత్నించాడు. అయితే అక్షర్‌ పటేల్‌ ఏమాత్రం ఇబ్బంది పడకుండా అతడి క్యాచ్‌ను ఒడిసిపట్టాడు. ప్రస్తుతం 131 ఓవర్లు ముగిసేసరికి ఆసీస్‌ 378/6 స్కోరుతో ఉంది. క్రీజ్‌లో ఖవాజా (162*), స్టార్క్‌ ఉన్నారు.

10/03/2023 13:00(IST)

గ్రీన్‌ ఔట్

దాదాపు 60 ఓవర్ల నుంచి భారత బౌలర్లను ఇబ్బంది పెట్టిన ఆసీస్‌.. ఎట్టకేలకు ఐదో వికెట్‌ను కోల్పోయింది. తొలి సెంచరీ హీరో కామెరూన్‌ గ్రీన్‌ (114) ఔటయ్యాడు. రవిచంద్రన్ అశ్విన్ (130.2వ ఓవర్‌) వేసిన బంతిని ఆడబోయి కీపర్‌ శ్రీకర్‌ భరత్‌కు గ్రీన్‌ క్యాచ్‌ ఇచ్చాడు. దీంతో ఐదో వికెట్‌కు ఉస్మాన్‌ ఖవాజా (162*)తో కలిసి చేసిన 208 పరుగుల భాగస్వామ్యానికి తెరపడింది.

10/03/2023 12:25(IST)

గ్రీన్ తొలి సెంచరీ

ఆసీస్ మిడిలార్డర్‌ ఆటగాడు కామెరూన్ గ్రీన్ (100*) కెరీర్‌లో తొలి సెంచరీ బాదాడు. ఆచితూచి ఆడిన గ్రీన్ 143 బంతుల్లో శతకం మార్క్‌ను తాకాడు. ప్రస్తుతం ఆసీస్‌ 122 ఓవర్లలో 355/4 స్కోరుతో కొనసాగుతోంది. భారత్ వేదికగా టెస్టు కెరీర్‌లో మొదటి సెంచరీ సాధించిన ఆరో ఆసీస్ బ్యాటర్‌గా గ్రీన్‌ అవతరించాడు. క్రీజ్‌లో గ్రీన్‌తోపాటు ఖవాజా (154*) ఉన్నాడు. వీరిద్దరూ ఐదో వికెట్‌కు ఏకంగా 185 పరుగులు జోడించారు.

10/03/2023 11:38(IST)

లంచ్‌ బ్రేక్.. ఆసీస్‌ 347/4

నాలుగో టెస్టు రెండో రోజు తొలి సెషన్‌లో ఆసీస్‌ వికెట్‌ నష్టపోకుండా 88 పరుగులు చేసింది. ఓవర్‌నైట్‌ 255/4 స్కోరుతో ఇన్నింగ్స్‌ను ప్రారంభించిన ఆసీస్‌ లంచ్‌ బ్రేక్‌ సమయానికి నాలుగు వికెట్ల నష్టానికి 347 పరుగులు చేసింది. ఈ సెషన్‌లో ఆసీస్‌ 29 ఓవర్లలో 92 పరుగులు సాధించింది. ఉస్మాన్ ఖవాజా (150*)తోపాటు కామెరూన్ గ్రీన్ (95*) సెంచరీ దిశగా సాగుతున్నాడు.

10/03/2023 11:25(IST)

ఖవాజా 150..

ఉస్మాన్‌ ఖవాజా (150*) ధాటిగా ఆడుతున్నాడు. మరోవైపు కామెరూన్ గ్రీన్ (85*) కూడా సెంచరీ దిశగా సాగుతున్నాడు. ప్రస్తుతం 117 ఓవర్లు ముగిసేసరికి ఆసీస్‌ నాలుగు వికెట్ల నష్టానికి 337 పరుగులు చేసింది. వీరిద్దరూ ఐదో వికెట్‌కు 167 పరుగులను జోడించారు.

10/03/2023 10:48(IST)

300 దాటిన స్కోరు

భారత్ బౌలర్లు వికెట్ల కోసం తీవ్రంగా శ్రమిస్తున్నారు. అయినా, ఆసీస్‌ బ్యాటర్లు మాత్రం క్రీజ్‌లో పాతుకుపోయారు. రెండో రోజు ఆరంభంలోనూ పట్టువదల్లేదు. ప్రస్తుతం ఆసీస్‌ 109 ఓవర్లలో నాలుగు వికెట్ల నష్టానికి 301 పరుగులు చేసింది. కామెరూన్ గ్రీన్ (66*), ఉస్మాన్ ఖవాజా (133*) ఐదోవికెట్‌కు 131 పరుగులను జోడించారు.

10/03/2023 10:10(IST)

వికెట్ ఇవ్వకుండా... సెంచరీ కొట్టేశారు

IND vs AUS: ఆస్ట్రేలియా తొలి ఇన్నింగ్స్‌లో వంద ఓవర్లు పూర్తయ్యాయి. ఉస్మాన్‌ ఖవాజా (114*), కామెరూన్ గ్రీన్ (59*) ఏమాత్రం పట్టువిడవకుండా ఆడుతున్నారు. భారత బౌలర్లు కట్టుదిట్టంగా బంతులను సంధిస్తున్నా.. వికెట్‌ మాత్రం రావడం లేదు. ప్రస్తుతం ఆసీస్‌ 101 ఓవర్లలో 275/4 స్కోరుతో ఉంది. ఐదో వికెట్‌కు గ్రీన్, ఖవాజా శతక (105*) భాగస్వామ్యం నిర్మించారు.

10/03/2023 09:42(IST)

కామెరూన్ గ్రీన్‌ హాఫ్‌ సెంచరీ (Cameron Green)

ఆసీస్‌ బ్యాటర్ కామెరూన్ గ్రీన్‌ (51*) హాఫ్ సెంచరీ పూర్తి చేశాడు. బ్యాటింగ్‌కు వచ్చినప్పటి నుంచి దూకుడుగా ఆడాడు. ప్రస్తుతం ఆసీస్‌ 92 ఓవర్లు ముగిసేసరికి ఆసీస్‌ నాలుగు వికెట్ల నష్టానికి 260 పరుగులు చేసింది. క్రీజ్‌లో గ్రీన్‌తోపాటు ఉస్మాన్‌ ఖవాజా (107*) ఉన్నాడు.

10/03/2023 09:26(IST)

మరికాసేపట్లో రెండో రోజు ఆట

భారత్ - ఆస్ట్రేలియా (IND vs AUS) జట్ల మధ్య రెండో రోజు ఆట మరికాసేపట్లో ప్రారంభం కానుంది. ఓవర్‌నైట్ 255/4 స్కోరుతో ఆసీస్‌ తన తొలి ఇన్నింగ్స్‌ను కొనసాగించనుంది. క్రీజ్‌లో ఖవాజా (104*), కామెరూన్ గ్రీన్‌ (49*) ఉన్నారు. త్వరగా ఔట్‌ చేస్తేనే ఆసీస్‌ను భారీ స్కోరు చేయకుండా అడ్డుకొనేందుకు అవకాశం ఉంటుంది.

10/03/2023 09:25(IST)

ఇది 1980, 90ల నాటి పిచ్‌లా ఉంది..

అహ్మదాబాద్‌ వేదికగా భారత్,ఆస్ట్రేలియా (IND vs AUS) మధ్య నాలుగో టెస్టు గురువారం ప్రారంభమైంది. మొదటి మూడు టెస్టుల్లో పిచ్‌లు స్పిన్‌కు అనుకూలంగా ఉన్న విషమం తెలిసిందే. నాలుగో టెస్టుకు మాత్రం పిచ్‌ పూర్తిగా బ్యాటింగ్‌కు అనుకూలిస్తోంది. మొదటి రోజు ఆటను చూస్తే ఈ విషయం అర్థమవుతుంది. తొలి రోజు వికెట్లు పడగొట్టడానికి భారత బౌలర్లు చాలా కష్టపడ్డారు. చివరకు నాలుగు వికెట్లు తమ ఖాతాలో వేసుకున్నారు. మొదటి రోజు ఆట ముగిసే సమయానికి ఆసీస్‌ నాలుగు వికెట్ల నష్టానికి 255 పరుగులు చేసింది. ఉస్మాన్‌ ఖవాజా (104*), కామెరూన్ గ్రీన్‌ (49*) క్రీజులో ఉన్నారు. ఈ నేపథ్యంలో అహ్మదాబాద్‌ పిచ్‌ గురించి భారత మాజీ క్రికెటర్‌, మ్యాచ్‌కు కామెంటేటర్‌గా వ్యవహరిస్తున్న సంజయ్‌ మంజ్రేకర్‌ (Sanjay Manjrekar) ఆసక్తికర వ్యాఖ్యలు చేశాడు. పూర్తి వార్త కోసం క్లిక్‌ చేయండి

10/03/2023 09:22(IST)

ఆస్ట్రేలియాదే ఆరంభం

ఎంత మార్పు! ఈ సారి బంతి గింగిరాలు తిరగలేదు.. అస్థిరమైన బౌన్స్‌ కనిపించలేదు.. అనూహ్యంగా తక్కువ ఎత్తులో దూసుకెళ్లలేదు. గత మూడు టెస్టులతో పోలిస్తే పూర్తి భిన్నంగా బ్యాటింగ్‌కు చక్కగా అనుకూలిస్తున్న పిచ్‌పై నాలుగో మ్యాచ్‌ తొలి రోజు ఆస్ట్రేలియా పైచేయి సాధించింది. నెమ్మదిగా పరుగులు సాధించినా సిరీస్‌లో తొలిసారి కంగారూ బ్యాటర్లు సౌకర్యవంతంగా కనిపించారు. భారత బౌలర్లు క్రమశిక్షణతో బౌలింగ్‌ చేసినా.. ఖవాజా పట్టుదలగా క్రీజులో నిలబడి అజేయ శతకం సాధించాడు. వికెట్ల కోసం టీమ్‌ఇండియా బౌలర్లు చెమటోడ్చినా పెద్దగా ఫలితం దక్కలేదు. పూర్తి వార్త కోసం క్లిక్‌ చేయండి

09/03/2023 16:38(IST)

ఖవాజా సెంచరీ.. ముగిసిన తొలి రోజు ఆట

ఆసీస్‌ బ్యాటర్ ఉస్మాన్ ఖవాజా (104*) శతకం పూర్తి చేశాడు. తొలి నుంచీ అద్భుమైన ఆటతీరుతో అలరించిన ఖవాజా మొదటి రోజు ఆట చివరి ఓవర్‌లో బౌండరీతో సెంచరీని తన ఖాతాలో వేసుకున్నాడు. దాదాపు 13 ఏళ్ల తర్వాత ఇలా ఓ లెఫ్ట్‌ఆర్మ్‌ బ్యాటర్‌ శతకం సాధించిన రెండో ఆసీస్‌ బ్యాటర్‌గా రికార్డు సృష్టించాడు. ఆట ముగిసేసమయానికి ఆసీస్‌ 90 ఓవర్లలో నాలుగు వికెట్ల నష్టానికి 255 పరుగులు చేసింది. క్రీజ్‌లో ఖవాజాతోపాటు కామెరూన్‌ గ్రీన్ (49*) ఉన్నాడు. వీరిద్దరూ ఐదో వికెట్‌కు కేవలం 116 బంతుల్లోనే 85 పరుగులు జోడించారు.

09/03/2023 15:44(IST)

అక్షర్ పటేల్ మెయిడిన్‌

గత ఐదు ఓవర్ల నుంచి వస్తున్న పరుగుల ప్రవాహానికి అక్షర్ పటేల్ అడ్డుకట్ట వేశాడు. ఆరు బంతులను మెయిడిన్‌ చేసి ఒక్క పరుగు కూడా ఇవ్వలేదు. ప్రస్తుతం 77 ఓవర్లు ముగిసేసరికి ఆసీస్‌ నాలుగు వికెట్ల నష్టానికి 198 పరుగులు చేసింది. క్రీజ్‌లో ఉస్మాన్‌ ఖవాజా (86*), కామెరూన్ గ్రీన్ (11*) ఉన్నారు. గత ఆరు ఓవర్లలో28 పరుగులు వచ్చాయి.

09/03/2023 15:13(IST)

హ్యాండ్స్‌కాంబ్ క్లీన్‌బౌల్డ్‌ (Handscomb clean bowled)

స్టీవ్‌ స్మిత్ ఔటైన తర్వాత క్రీజ్‌లోకి వచ్చిన పీటర్ హ్యాండ్స్‌కాంబ్ (17*) దూకుడుగా ఆడేందుకు ప్రయత్నించాడు. అయితే షమీ వేసిన (70.4వ ఓవర్‌) బంతికి క్లీన్‌బౌల్డ్‌గా పెవిలియన్‌కు చేరాడు. దీంతో ఆసీస్‌ 170 పరుగుల వద్ద నాలుగో వికెట్‌ను నష్టపోయింది. అంతకుముందు ఉమేశ్‌ యాదవ్‌ వేసిన (68వ) ఓవర్‌లో హ్యాండ్స్‌కాంబ్‌ వరుసగా రెండు బౌండరీలు బాదాడు. ప్రస్తుతం 71 ఓవర్లు ముగిసేసరికి ఆసీస్‌ స్కోరు 170/4. క్రీజ్‌లో ఖవాజా (69*), కామెరూన్ గ్రీన్ ఉన్నారు.

09/03/2023 14:43(IST)

ఆసీస్‌ కెప్టెన్‌ ఔట్‌ (Smith Bowled)

సుదీర్ఘ విరామం తర్వాత భారత్‌ ఖాతాలో మరో వికెట్ పడింది. నిలకడగా ఆడుతున్న ఆసీస్‌ కెప్టెన్ స్టీవ్‌ స్మిత్ ( 38:135 బంతుల్లో) రవీంద్ర జడేజా బౌలింగ్‌లో (63.4వ ఓవర్‌) బౌల్డ్‌ అయ్యాడు. దీంతో ఉస్మాన్‌ ఖవాజాతో కలిసి మూడో వికెట్‌కు నిర్మించిన 79 పరుగుల భాగస్వామ్యానికి తెరపడింది. దాదాపు 40 ఓవర్ల తర్వాత ఆసీస్‌ మూడో వికెట్‌ను కోల్పోయింది. ప్రస్తుతం 64 ఓవర్లు ముగిసేసరికి ఆసీస్‌ స్కోరు 152/3. క్రీజ్‌లో హ్యాండ్సకాంబ్ (1*), ఖవాజా (67*) ఉన్నారు.

09/03/2023 14:15(IST)

వికెట్‌ లేకుండానే..

తొలి రోజు ఆటలో రెండో సెషన్‌ ముగిసింది. టీ బ్రేక్ సమయానికి ఆసీస్‌ 62 ఓవర్లలో రెండు వికెట్ల నష్టానికి 149 పరుగులు చేసింది. ఈ సెషన్‌లో ఒక్క వికెట్‌ పడలేదు. ఆసీస్‌ మాత్రం 74 పరుగులను జోడించింది. క్రీజ్‌లో ఉస్మాన్ ఖవాజా (65*), స్టీవ్ స్మిత్ (38*) ఉన్నారు. వీరిద్దరూ మూడో వికెట్‌కు ఇప్పటి వరకు 238 బంతుల్లో 77 పరుగుల భాగస్వామ్యం నిర్మించారు.

09/03/2023 13:35(IST)

ఉస్మాన్‌ ఖవాజా హాఫ్ సెంచరీ (Usman Half Century)

ఆసీస్‌ బ్యాటర్ ఉస్మాన్‌ ఖవాజా హాఫ్ సెంచరీ సాధించాడు. ఆరంభం నుంచి ఎంతో నిలకడగా ఆడిన ఖవాజా (56*) భారత బౌలర్లకు కొరకరాని కొయ్యగా మారాడు. ఇది కెరీర్‌లో అతడికి 22వ అర్ధశతకం. ప్రస్తుతం 51 ఓవర్లు ముగిసేసరికి ఆసీస్‌ 2 వికెట్ల నష్టానికి 132 పరుగులు చేసింది. క్రీజ్‌లో ఖవాజాతోపాటు స్మిత్ (30*) ఉన్నారు. వీరిద్దరూ మూడో వికెట్‌కు అర్ధశతక (60) భాగస్వామ్యం నిర్మించారు.

09/03/2023 13:16(IST)

వికెట్‌ కోసం తంటాలు (No Wicket)

వికెట్‌ కోసం భారత బౌలర్లు శ్రమిస్తున్నారు. పిచ్‌ సహకరిస్తున్నప్పటికీ.. ఆసీస్ బ్యాటర్లు పట్టు వదలకుండా ఆడుతున్నారు. దీంతో 24 ఓవర్ల నుంచి భారత్‌కు మరో వికెట్‌ మాత్రం దక్కడంలేదు. ప్రస్తుతం ఆసీస్‌ 46 ఓవర్లు ముగిసేసరికి ఆసీస్ 110/2 స్కోరుతో ఉంది. క్రీజ్‌లో ఉస్మాన్ ఖవాజా (48*) అర్ధశతకం దిశగా సాగుతుండగా.. స్మిత్ (16*) క్రీజ్‌లో పాతుకుపోయాడు.

09/03/2023 12:56(IST)

ఒక్కొక్క పరుగే..

అహ్మదాబాద్‌ పిచ్‌ కాస్త బౌలింగ్‌కు అనుకూలంగా మారడంతో భారత బౌలర్లు కట్టుదిట్టంగా వేస్తున్నారు. గత ఆరు ఓవర్లలో ఐదింటిలో కేవలం ఒక్కో పరుగు మాత్రమే ఇచ్చారు. దీంతో ఆసీస్‌ స్కోరు 41 ఓవర్లు ముగిసేసరికి 99/2కి చేరింది. క్రీజ్‌లో స్మిత్ (11*), ఉస్మాన్ ఖవాజా (42*) ఉన్నారు.

09/03/2023 12:36(IST)

ఉస్మాన్‌ ఖవాజా దూకుడు

లంచ్‌ బ్రేక్‌ తర్వాత ఆసీస్‌ బ్యాటర్లు కాస్త దూకుడు ప్రదర్శిస్తున్నారు. మరీ ముఖ్యంగా క్రీజ్‌లో పాతుకుపోయిన ఉస్మాన్ ఖవాజా (40*) బౌండరీలు రాబడుతూ స్కోరు బోర్డున నడిపిస్తున్నాడు. మరోవైపు కెప్టెన్ స్టీవ్ స్మిత్ (8*) ఆచితూచి ఆడుతున్నాడు. ప్రస్తుతం 35 ఓవర్లు ముగిసేసరికి ఆసీస్ రెండు వికెట్ల నష్టానికి 94 పరుగులు చేసింది.

09/03/2023 11:32(IST)

లంచ్‌ బ్రేక్‌.. ఆసీస్‌ 75/2

నాలుగో టెస్టు తొలి రోజు ఆటకు లంచ్‌ బ్రేక్‌ సమయానికి ఆసీస్‌ రెండు వికెట్ల నష్టానికి 29 ఓవర్లలో 75 పరుగులు చేసింది. ప్రస్తుతం క్రీజ్‌లో ఉస్మాన్‌ ఖవాజా (27*), స్టీవ్‌ స్మిత్ (2*) ఉన్నారు. ఇన్నింగ్స్‌లోని 24వ ఓవర్‌ నుంచి 29 వరకు ఆరు ఓవర్లలో ఐదు మెయిడిన్లు కావడం విశేషం.

09/03/2023 11:08(IST)

షమీకి వికెట్‌ (Shami).. లబుషేన్‌ క్లీన్‌బౌల్డ్ (OUT)

మహమ్మద్ షమీ తొలి స్పెల్‌లో అద్భుతంగా వేసినా వికెట్‌ మాత్రం దక్కలేదు. ఇప్పుడు రెండో స్పెల్‌కు వచ్చిన షమీ మూడో బంతికే వికెట్ పడగొట్టాడు. లబుషేన్‌ (3)ను క్లీన్‌బౌల్డ్‌ చేశాడు. దీంతో 72 పరుగుల వద్ద (22.3వ ఓవర్) ఆసీస్‌ రెండో వికెట్‌ను కోల్పోయింది. ఆఫ్‌సైడ్‌ వేసిన బంతిని ఆడిన లబుషేన్‌ బ్యాట్‌ ఎడ్జ్‌ తీసుకోవడంతో బౌల్డయ్యాడు. ప్రస్తుతం 23 ఓవర్లు ముగిసేసరికి ఆసీస్‌ 2 వికెట్ల నష్టానికి 73 పరుగులు చేసింది. క్రీజ్‌లో ఖవాజా (26*), స్మిత్ (1*) ఉన్నారు.

09/03/2023 11:05(IST)

ఖవాజా బౌండరీలు

భారత బౌలర్లు కట్టుదిట్టంగా బంతులను సంధిస్తున్నా.. ఆసీస్‌ బ్యాటర్ ఉస్మాన్‌ ఖవాజా (26*) మాత్రం అడపాదడపా బౌండరీలు రాబడుతున్నాడు. అశ్విన్‌ వేసిన వరుస ఓవర్లలో రెండు ఫోర్లు బాదాడు. ప్రస్తుతం 22 ఓవర్లు ముగిసేసరికి వికెట్‌ నష్టానికి 72 పరుగులు చేసింది.

09/03/2023 10:43(IST)

హెడ్‌ దొరికేశాడు (Travis Head)

దూకుడుగా ఆడుతున్న ట్రావిస్‌ హెడ్ (32) ఎట్టకేలకు పెవిలియన్‌కు చేరాడు. ఆరంభంలో ఆచితూచి ఆడినప్పటికీ.. కాస్త కుదురుకున్నాక వరుసగా బౌండరీలు బాదేశాడు. ఇదే క్రమంలో అశ్విన్‌ (15.3వ ఓవర్‌) వేసిన బంతిని షాట్‌ కొట్టబోయి జడేజా చేతికి చిక్కాడు. దీంతో ఉస్మాన్ ఖవాజా (18*)తో చేసిన 61 పరుగుల తొలి వికెట్‌ భాగస్వామ్యానికి తెరపడింది. ప్రస్తుతం 16 ఓవర్లు ముగిసేసరికి ఆసీస్‌ స్కోరు 62/1. క్రీజ్‌లో ఖవాజాతోపాటు లబుషేన్ (1*) ఉన్నాడు.

09/03/2023 10:23(IST)

హెడ్‌ క్యాచ్‌ డ్రాప్‌

ఉమేశ్‌ యాదవ్‌ వేసిన ఇన్నింగ్స్‌ 6వ ఓవర్‌లో ట్రావిస్‌ హెడ్ (Catch Drop) ఇచ్చిన క్యాచ్‌ను కీపర్ శ్రీకర్‌ భరత్‌ నేలపాలు చేశాడు. లైఫ్ దొరకడంతో హెడ్ (19*) దూకుడు పెంచాడు. ప్రస్తుతం ఆసీస్ 12 ఓవర్లు ముగిసేసరికి వికెట్ నష్టపోకుండా 40 పరుగులు చేసింది. క్రీజ్‌లో హెడ్‌తోపాటు ఖవాజా (10*) ఆచితూచి ఆడుతున్నాడు.

09/03/2023 09:54(IST)

బైస్‌ రూపంలోనే రెండు బౌండరీలు

IND vs AUS: భారత బౌలర్లు కట్టుదిట్టంగానే బంతులను సంధిస్తున్నారు. అయితే, ఆసీస్‌ బ్యాటర్లకు అదృష్టం కలిసొస్తోంది. ప్రస్తుతం 5 ఓవర్లు ముగిసేసరికి వికెట్ నష్టపోకుండా ఆసీస్‌ 17 పరుగులు చేసింది. అయితే ఇందులో 11 పరుగులు అదనంగా వచ్చినవే. రెండు బౌండరీలు అయితే బైస్‌ రూపంలోనే రావడం గమనార్హం. షమీ బౌలింగ్‌లో బంతి విపరీతంగా స్వింగ్‌ కావడంతో ఫీల్డర్లు అయోమయానికి గురవుతున్నారు. క్రీజ్‌లో ఉస్మాన్ ఖవాజా (5*), ట్రావిస్‌ హెడ్ (1*) ఉన్నారు. ఉమేశ్ యాదవ్‌ రెండు ఓవర్లను మెయిడిన్‌ చేశాడు.

09/03/2023 09:31(IST)

ఆసీస్‌ బ్యాటింగ్‌ ప్రారంభం

సిరీస్‌ను సమం చేయాలంటే తప్పక గెలవాల్సిన మ్యాచ్‌లో ఆసీస్‌ తొలుత బ్యాటింగ్‌ ప్రారంభించింది. ఓపెనర్లుగా ట్రావిస్‌ హెడ్, ఉస్మాన్ ఖవాజా క్రీజ్‌లోకి వచ్చారు. మొదటి ఓవర్‌ను భారత బౌలర్ మహమ్మద్ షమీ ఆరంభించాడు.

09/03/2023 09:22(IST)

ఆసీస్‌ ప్రధానికి జ్ఞాపిక

నరేంద్ర మోదీ స్టేడియంలోని విశేషాలను భారత ప్రధాని మోదీ, ఆస్ట్రేలియా ప్రధాని ఆంథోనీకి రవిశాస్త్రి వివరించి చెప్పారు. ఇరు జట్ల మధ్య జరిగిన విశేషాలను తెలియజేశాడు. అంతకుముందు ఇరు దేశాల మధ్య 75 ఏళ్ల స్నేహానికి గుర్తుగా బీసీసీఐ తరఫున అధ్యక్షుడు రోజర్ బిన్నీ ఆస్ట్రేలియా ప్రధానికి ప్రత్యేక మెమొంటోను అందజేశారు.

09/03/2023 09:10(IST)

చిక్కేనా సిరీస్‌?

ప్రపంచ టెస్టు ఛాంపియన్‌షిప్‌ ఫైనల్లో స్థానం ఊరిస్తోంది. కానీ తొలి రెండు టెస్టుల్లో గెలిచినా.. ఒక్క ఓటమితో జట్టు బలహీన పడ్డట్లు కనిపిస్తోంది. బ్యాటర్ల ఫామ్‌ కూడా గొప్పగా లేదు. ఈ నేపథ్యంలో బోర్డర్‌-గావస్కర్‌ సిరీస్‌లో టీమ్‌ఇండియా ఆఖరి సమరానికి సిద్ధమైంది. నేటి నుంచే ఆస్ట్రేలియాతో నిర్ణయాత్మక నాలుగో టెస్టు. సిరీస్‌ సమం చేయాలన్న తపన కంగారూలది. సిరీస్‌ విజయంతో పాటు డబ్ల్యూటీసీ ఫైనల్‌ బెర్తునూ ఒకేసారి సాధించాలన్న పట్టుదల భారత్‌ది. అహ్మదాబాద్‌లో రసవత్తర పోరు ఖాయం. పూర్తి వార్త కోసం క్లిక్‌ చేయండి

08/03/2023 11:15(IST)

ఆసీస్‌తో నాలుగో టెస్టు.. శ్రీకర్‌ భరత్‌కు మద్దతుగా నిలిచిన ద్రవిడ్‌

తెలుగు కుర్రాడు శ్రీకర్‌ భరత్‌ (KS Bharat) ప్రస్తుతం ఆస్ట్రేలియాతో నాలుగు టెస్టుల సిరీస్‌లో (IND vs AUS) ఆడుతున్నాడు. అయితే గత మూడు టెస్టుల్లో 8, 6, 23*, 17, 3 పరుగులు మాత్రమే చేశాడు. దీంతో నాలుగు టెస్టుకు అతడిపై వేటు తప్పదనే వ్యాఖ్యలు వినిపిస్తున్నాయి. అందుకు తగ్గట్లుగానే మరో యువ బ్యాటర్ ఇషాన్ కిషన్‌ అహ్మదాబాద్‌ టెస్టు కోసం తీవ్రంగా సాధన చేస్తున్న ఫొటోలు సోషల్‌ మీడియాలో దర్శనమిచ్చాయి. అతడి శిక్షణను టీమ్‌ఇండియా ప్రధాన కోచ్ రాహుల్ ద్రవిడ్ (Rahul Dravid) దగ్గరుండి పర్యవేక్షించినట్లు వార్తలు వచ్చాయి. దీంతో గురువారం నుంచి ప్రారంభమయ్యే టెస్టుకు తుది జట్టులో భరత్‌కు బదులు ఇషాన్ వస్తాడని అనుకుంటున్న వేళ.. రాహుల్‌ ద్రవిడ్‌ మాత్రం భరత్‌కు మద్దతుగా మాట్లాడాడు. పూర్తి వార్త కోసం క్లిక్‌ చేయండి

08/03/2023 11:14(IST)

మనోళ్లు ఆ టెక్నిక్‌ వాడితే..: సునీల్ గావస్కర్ కీలక సూచనలు

అహ్మదాబాద్‌లో నాలుగో టెస్టులో ప్రత్యర్థి స్పిన్నర్లను ఎదుర్కొనేటప్పుడు భారత బ్యాటర్లు బ్యాట్‌ హ్యాండిల్‌ను కొద్దిగా చివర్లో పట్టుకుని ఇంకాస్త వంగి ఆడాలని సూచించాడు. ఇందౌర్‌లో జరిగిన మూడో టెస్టులో బంతి గిర్రున తిరగడంతో భారత బ్యాటర్లు ఆసీస్‌ స్పిన్నర్లకు తలవంచిన నేపథ్యంలో అతడిలా అన్నాడు. 1987లో చిరకాల ప్రత్యర్థి పాకిస్థాన్‌పై బెంగళూరులో తానాడిన ఇన్నింగ్స్‌ను ఈ సందర్భంగా ఉదహరించాడు. పూర్తి వార్త కోసం క్లిక్‌ చేయండి

08/03/2023 11:13(IST)

నాలుగో టెస్టుకు మోదీ.. ఆస్ట్రేలియా ప్రధానితో కలిసి మ్యాచ్‌ వీక్షణ

బోర్డర్‌-గావస్కర్‌ ట్రోఫీలో భాగంగా శుక్రవారం భారత్‌-ఆస్ట్రేలియా మధ్య అహ్మదాబాద్‌లో ఆరంభమయ్యే ఆఖరిదైన నాలుగో టెస్టుకు ప్రధానమంత్రి నరేంద్ర మోదీ ప్రత్యేక అతిథిగా హాజరు కానున్నారు. ఆస్ట్రేలియా ప్రధాని ఆంటోని ఆల్బనీస్‌తో కలిసి ఆయన మ్యాచ్‌ను వీక్షించబోతున్నారు. ప్రపంచంలోనే పెద్దదైన నరేంద్ర మోదీ స్టేడియం సామర్థ్యం 1,32,000. కానీ ఒక మ్యాచ్‌కు హాజరైన అభిమానుల లెక్కల్లో మెల్‌బోర్న్‌ స్టేడియం (1,00,024)ది ఇప్పటిదాకా రికార్డుగా ఉంది. పూర్తి వార్త కోసం క్లిక్‌ చేయండి

08/03/2023 11:12(IST)

అహ్మదాబాద్‌లో స్పిన్నెంత?

సొంతగడ్డపై ఆడుతుందంటే స్పిన్నే టీమ్‌ఇండియా ఆయుధం. ఇప్పుడు బోర్డర్‌-గావస్కర్‌ సిరీస్‌లోనూ అదే అస్త్రాన్ని సంధించింది. గిరా గిరా తిరిగే పిచ్‌లతో తొలి రెండు టెస్టులను ఖాతాలో వేసుకుంది. కానీ తర్వాతే వ్యూహం బెడిసి కొట్టింది. మరింత విపరీతంగా సహకరించిన ఇందౌర్‌ పిచ్‌పై బోల్తా కొట్టడం రోహిత్‌సేన వంతయింది. నాణ్యత విషయంలో తొలి రెండు టెస్టుల పిచ్‌లకు పాసు మార్కులతో సరిపెట్టిన ఐసీసీ.. మూడో టెస్టు పిచ్‌పై పెదవి విరిచింది. పేలవ రేటింగ్‌ ఇచ్చింది. ‘‘పిచ్‌ మరీ పొడిగా ఉంది. బ్యాట్‌కు, బంతికి సమతూకం లేదు. పిచ్‌ ఆరంభం నుంచే స్పిన్నర్లకు సహకరించింది. మ్యాచ్‌ ఆసాంతం బౌన్స్‌ అతిగా, అస్థిరంగా ఉంది’’ అని రిఫరీ క్రిస్‌ బ్రాడ్‌ తన నివేదికలో పేర్కొన్నాడు. తొలి రోజు నుంచే స్పిన్‌కు విపరీతంగా సహరించడమేంటని మాజీ ఆటగాళ్లూ విమర్శించారు. ఈ నేపథ్యంలో నిర్ణయాత్మక నాలుగో టెస్టుకు ఎలాంటి పిచ్‌ ఉండబోతుందన్న ఆసక్తి పెరిగింది. పూర్తి వార్త కోసం క్లిక్‌ చేయండి

App

IND vs AUS Fourth Test: నాలుగో టెస్టు డ్రా.. 2-1తో భారత్‌దే సిరీస్‌

తాజా వార్తలు (Latest News)

Polavaranm-CM Jagan: పోలవరంలో సీఎం జగన్‌ పర్యటన

Ukraine: ఉక్రెయిన్‌పై భారీ దాడి.. నోవా కఖోవ్కా డ్యామ్‌ పేల్చివేత..!

Abhishek Banerjee: నన్ను, నా భార్యాపిల్లల్ని అరెస్టు చేసినా.. తలవంచను..: అభిషేక్ బెనర్జీ

Shubman Gill: అతడి ప్రశంసలకు గిల్‌ పూర్తి అర్హుడు: పాక్‌ మాజీ కెప్టెన్

USA: మీరు దిల్లీ వెళ్లి చూడండి.. భారత్‌ చైతన్యవంతమైన ప్రజాస్వామ్యం: అమెరికా

JEE Advanced: జేఈఈ అడ్వాన్స్‌డ్‌.. సికింద్రాబాద్‌లో స్మార్ట్‌ కాపీయింగ్‌

సుఖీభవ

చదువు