బస్సు ఆపి.. 14 మందిని కాల్చి చంపారు

ఇస్లామాబాద్‌: పాకిస్థాన్‌లోని బలోచిస్థాన్‌లో ఉగ్రవాదులు మరోసారి రెచ్చిపోయారు. గ్వాదర్‌లోని ‌ఓ రహదారిపై 36 మందితో వెళ్తున్న ఓ బస్సును అడ్డుకున్న ఉగ్రవాదులు వారందరినీ బస్సులోంచి దిగాలని బెదిరించారు. అనంతరం వారి గుర్తింపు కార్డులను చూశారు. వారిలో 14 మందిపై కాల్పులు జరిపి, ప్రాణాలు తీశారు. గుర్తింపు కార్డుల ఆధారంగా వారిని లక్ష్యంగా చేసుకుని ఈ ఘాతుకానికి పాల్పడ్డారన్న విషయంపై వివరాలు తెలియలేదని స్థానిక అధికారి మీడియాకు వివరించారు. ఈ ఘటనకు బాధ్యత వహిస్తూ ఇప్పటివరకు ఏ ఉగ్ర సంస్థ ప్రకటన చేయలేదు.

‘ఈ ఘటన వెనుక ఎవరు ఉన్నారన్న విషయం గురించి మాకు స్పష్టత రాలేదు. గ్వాదర్‌ ప్రాంతానికి వెళ్తున్న 36 మందిని బస్సులోంచి దించి కొందరు ఈ దారుణానికి పాల్పడ్డారు’ అని జహంగీర్‌ దస్తీకి చెందిన ఓ అధికారి మీడియాకు తెలిపారు. ‘ఈ దాడికి పాల్పడిన వారు ప్రయాణికుల గుర్తింపు కార్డులు చూసి, బలోచిస్థాన్‌యేతరులను గుర్తించి వారిని మరో ప్రాంతానికి తీసుకెళ్లి, కాల్చి చంపారు’ అని మరో అధికారి మీడియాకు తెలిపారు. వారిలో చాలా మందిపై తలపై కాల్చి చంపారని వివరించారు. వారి అందరి శరీరాల్లో తూటాలు ఉన్నాయని తెలిపారు. అయితే, బలోచ్‌ వేర్పాటు వాదులు ఈ ప్రాంతంలో పదేపదే పాక్‌లోని పంజాబ్‌ వాసులను లక్ష్యంగా చేసుకుని దాడులు జరుపుతున్నట్లు తెలిసింది.