దిల్లీ: అంతర్జాతీయ మార్కెట్ల సానుకూలతలతో గత కొన్ని రోజులుగా పసిడి ధర పరుగులు పెడుతోంది. బుధవారం ఒక్కరోజే రూ. 320 పెరగడంతో బంగారం ధర రూ. 34వేల మార్క్‌ను దాటింది. బులియన్‌ మార్కెట్లో నేడు 10 గ్రాముల పుత్తడి రూ. 34,070 పలికింది. అటు వెండి కూడా నేడు బంగారం దారిలోనే పయనించింది. పారిశ్రామిక వర్గాలు, నాణేల తయారీదారుల నుంచి కొనుగోళ్లు డిమాండ్‌ ఊపందుకోవడంతో కేజీ వెండి ధర రూ. 330 పెరిగి రూ. 41,330కి చేరింది.

చైనాకు చెందిన హువావే సంస్థపై క్రిమినల్‌ విచారణకు అమెరికా సిద్ధమైంది. ఈ నేపథ్యంలో అమెరికా-చైనా మధ్య జరిగే వాణిజ్య చర్చలపై అనిశ్చితి ఏర్పడింది. ఈ పరిణామాలపై దృష్టిపెట్టిన మదుపర్లు బంగారంలో పెట్టుబడులు పెట్టడమే శ్రేయస్కరమని భావించారని, తద్వారా పసిడి ధర పెరిగినట్లు మార్కెట్‌ విశ్లేషకులు చెబుతున్నారు.

గత రెండు రోజుల్లో బంగారం ధర రూ. 450 పెరిగింది. అంటే ఈ వారంలో ఇప్పటివరకు 10 గ్రాముల పసిడి ధర రూ. 770 పెరగడం గమనార్హం. అంతర్జాతీయంగా కూడా ఈ లోహాల ధరలు స్వల్పంగా పెరిగాయి. న్యూయార్క్‌ మార్కెట్‌లో ఔన్సు బంగారం ధర 1,314.76 డాలర్లు, ఔన్సు వెండి ధర 15.96 డాలర్లు పలికింది.