న్యూయార్క్‌: తనకు నోబెల్‌ శాంతి బహుమతి ఇప్పటికే రావాల్సిందని అమెరికా అధ్యక్షుడు డొనాల్డ్‌ ట్రంప్‌ వ్యాఖ్యానించారు. ఈ విషయంలో నోబెల్‌ కమిటీ తనకు అన్యాయం చేసిందని ఆరోపించారు. పాకిస్థాన్‌ ప్రధాని ఇమ్రాన్‌ఖాన్‌తో జరిపిన ద్వైపాక్షిక చర్చల సందర్భంగా మంగళవారం ఆయన ఈ వ్యాఖ్యలు చేశారు. తాను శాంతి స్థాపనకోసం చాలా పనులు చేశానని చెప్పుకొచ్చారు. అంతటితో ఆగకుండా.. 2009లో ఒబామాకు నోబెల్‌ దేనికోసం ఇచ్చారంటూ వివాదాస్పద వ్యాఖ్యలు చేశారు. అధ్యక్ష పదవి చేపట్టిన కొన్నిరోజులకే ఆయనకిచ్చారని.. ఎందుకిచ్చారో కూడా ఒబామాకు తెలియదని వ్యాఖ్యానించడం చర్చనీయాంశంగా మారింది. 

ప్రపంచ దేశాల మధ్య సంబంధాలను బలోపేతం చేసే దిశగా పటిష్ఠ చర్యలు చేపట్టినందుకుగానూ ఒబామాకు నోబెల్‌ శాంతి బహుమతి లభించిన విషయం తెలిసిందే. ఇమ్రాన్‌ఖాన్‌తో భేటీ సందర్భంగా కశ్మీర్‌ అంశం చర్చకు వచ్చిన సందర్భంలో ట్రంప్‌ ఈ వ్యాఖ్యలు చేశారు. భారత్‌-పాక్‌ అంగీకరిస్తే కశ్మీర్‌ సమస్యను పరిష్కరించుకోవడంలో తాను సహకరిస్తానని ఈ సందర్భంగా మరోసారి ట్రంప్‌ వ్యాఖ్యానించడం గమనార్హం.