క్రిటికల్‌ ఇల్‌నెస్‌ తీసుకుంటున్నారా?

ప్రస్తుత జీవన శైలితో ఎందరో చిన్న వయసులోనే తీవ్ర వ్యాధుల బారినపడుతున్నారు.. పెరుగుతున్న వైద్య చికిత్స ఖర్చుల నేపథ్యంలో ఆర్థిక భారం మోస్తున్నారు. గుండె జబ్బులు.. కేన్సర్‌ వంటివి వచ్చినప్పుడు దీర్ఘకాలంపాటు చికిత్స అవసరం అవుతుంది. ఆరోగ్య బీమా ఉన్నప్పటికీ.. ఆసుపత్రిలో చేరినప్పుడే ఉపయోగపడుతుంది. ఆ తర్వాత అయ్యే ఖర్చును తట్టుకోవాలంటే ఏక మొత్తంలో పరిహారం చెల్లించే క్రిటికల్‌ ఇల్‌నెస్‌ పాలసీల్లాంటివి తీసుకోవడం మేలు. అయితే, ఈ పాలసీలను తీసుకునేటప్పుడు ముఖ్యంగా మూడు ప్రశ్నలకు సమాధానం తెలుసుకోవాల్సి ఉంటుంది..
ఏ వ్యాధులకు వర్తిస్తుంది?
క్రిటికల్‌ ఇల్‌నెస్‌ పాలసీని తీసుకునేటప్పుడు అత్యధిక వ్యాధులకు రక్షణ కల్పించే పాలసీని ఎంచుకోండి. సాధారణంగా వచ్చే తీవ్ర వ్యాధులు ఆ జాబితాలో తప్పనిసరిగా ఉండాలి. ఎన్ని వ్యాధులకు పరిహారం ఇస్తారనే దాని ఆధారంగానే ప్రీమియమూ ఉంటుంది. తీవ్ర వ్యాధులకు ఆయా బీమా సంస్థలు ఇచ్చిన నిర్వచనాలూ తెలుసుకోవాలి. మినహాయింపులేమైనా ఉన్నాయా అన్నదీ చూసుకోవాలి.
ఎంత కాలానికి?
చాలా బీమా సంస్థలు తీవ్ర వ్యాధి సోకిన తర్వాత ఎన్ని రోజుల తర్వాత పరిహారం ఇవ్వాలనే అంశంపై వేర్వేరు నిబంధనలు పాటిస్తున్నాయి. అంటే, తీవ్ర వ్యాధి సోకిన తర్వాత పాలసీదారుడు కనీసం కొన్ని రోజులు జీవించి ఉండాలన్నమాట. అప్పుడే క్రిటికల్‌ ఇల్‌నెస్‌ పరిహారం అందుతుంది. ఈ జీవించి ఉండే కాలం.. ఒక్కో వ్యాధికి ఒక్కో రకంగా ఉంటుంది. కాబట్టి, పాలసీని ఎంపిక చేసుకునేప్పుడే ఈ విషయంలో స్పష్టత ఉండాలి. సాధారణంగా చాలా పాలసీలు తీవ్ర వ్యాధి సోకిన తర్వాత 30 రోజులు జీవించిన తర్వాతే పరిహారం ఇస్తామని చెబుతుంటాయి.
ఎంత మొత్తానికి?
ఒక వ్యక్తి ఆదాయాన్ని బట్టి, ఎంత మొత్తానికి ఈ పాలసీని ఎంపిక చేసుకోవాలన్నది నిర్ణయించుకోవాలి. అనుకోకుండా..తీవ్ర వ్యాధి బారినపడితే.. ఎంత ఆదాయాన్ని కోల్పోతాం అనే అంచనాతో ఈ పాలసీ మొత్తాన్ని తీసుకోవాలి. ఆరోగ్య బీమా పాలసీకి అదనంగా ఈ పాలసీ ఉండేలా చూసుకోవాలి.

శ్రీరాజ్‌ దేశ్‌పాండే, చీఫ్‌ ఆపరేటింగ్‌ ఆఫీసర్‌, ఫ్యూచర్‌ జెనరాలి ఇండియా ఇన్సూరెన్స్‌

Tags :

మరిన్ని

జిల్లా వార్తలు

చదువు సుఖీభవ ఈ-నాడు మకరందం రయ్.. రయ్ సిరి ఈ తరం హాయ్! ఆహా హాయ్ బుజ్జీ స్థిరాస్తి రుచులు

మరిన్ని

రుచులు

App