సిప్‌ చేద్దాం.. కాస్త కొత్తగా!

షేర్లు - ఫండ్లు

సిప్‌ చేద్దాం.. కాస్త కొత్తగా!

స్టాక్‌ మార్కెట్లో హెచ్చుతగ్గులు కనిపిస్తున్నప్పటికీ... చిన్న మదుపరులు తమ పెట్టుబడులను కొనసాగించడానికి ఆసక్తి చూపిస్తూనే ఉన్నారు. ముఖ్యంగా మ్యూచువల్‌ ఫండ్లలో క్రమానుగత పెట్టుబడి విధానం (సిప్‌) ద్వారా మదుపు చేసేందుకు ప్రయత్నిస్తున్నారు. దీర్ఘకాలిక ఆర్థిక లక్ష్యాలకు ముడిపెట్టి, క్రమశిక్షణతో ఇందులో కొనసాగితే మంచి ఫలితాలు వస్తాయన్న సంగతి చాలా సందర్భాల్లో నిరూపితం అయ్యింది. సాధారణ ‘సిప్‌’ కాకుండా.. కాస్త భిన్నంగా.. అదనపు ప్రయోజనాలు లభించేలా చూసుకుంటే.. మరింత అధిక ప్రయోజనం అందుకోవచ్చు. అదెలాగో చూద్దాం!

చిన్న మొత్తాలతో మ్యూచువల్‌ ఫండ్లలో మదుపు చేయాలనుకునే వారికి క్రమానుగత పెట్టుబడి విధానం ఓ చక్కని మార్గం. అందుకే, చాలామంది మదుపరులు ఇప్పుడు దీన్నే ఎంచుకుంటున్నారు. దాదాపు 2.6 కోట్ల సిప్‌ ఖాతాల నుంచి సగటున నెలకు రూ.8,000 కోట్ల వరకూ మార్కెట్లోకి వస్తున్నాయి. మదుపరుల ఇష్టానుసారం.. ఎంత మొత్తమైనా సిప్‌ చేసేందుకు అవకాశం ఉండటంతో వీటికి ఆదరణ పెరుగుతోందని చెప్పొచ్చు. రూపాయి సగటు ప్రయోజనం లభించడంతోపాటు, చక్రవడ్డీ లాభమూ అందడంలాంటి లాభాలు సిప్‌ ద్వారా లభిస్తాయి. మార్కెట్‌ ఎప్పుడు ఏ విధంగా స్పందిస్తుందో చెప్పడం కష్టమే.. మార్కెట్‌ గమనంతో పనిలేకుండా.. ఎల్లవేళలా మన పెట్టుబడులు ఉన్నాయా లేదా అనేదే ఇక్కడ ప్రధానం.

సిప్‌ గురించీ, అది అందించే ప్రయోజనాల గురించీ చాలామందికి తెలిసిందే. ఇక్కడ గమనించాల్సిదేమిటంటే.. సిప్‌లోనూ ఎన్నోరకాలు, మరెన్నో ఇతర ప్రయోజనాలూ అందుబాటులో ఉన్నాయి. ఆర్థిక ప్రణాళికకు తగ్గట్టు ఏది మనకు ఉపయోగపడుతుందన్నది నిర్ణయించుకోవాలి. దీర్ఘకాలం, క్రమశిక్షణతో మదుపు చేసే అలవాటు సిప్‌ ద్వారా వస్తుంది. అదే సమయంలో దీన్ని ఎప్పటికప్పుడు మీ స్మార్ట్‌ ఫోన్‌లాగా అప్‌డేట్‌ చేసుకోవాలి.

టాపప్‌ చేసుకోండి..
ఒకే మొత్తాన్ని ఏళ్ల తరబడి పెట్టుబడి పెడతామంటే.. ప్రస్తుతం ఉన్న పరిస్థితుల్లో ఉపయోగం ఉండదు. ద్రవ్యోల్బణం పెరుగుతున్న నేపథ్యంలో ఎప్పటికప్పుడు మన పెట్టుబడుల్లోనూ వృద్ధి కనిపించాలి. ఆదాయం తక్కువగా ఉన్నప్పుడు స్వల్ప మొత్తంతో పెట్టుబడి ప్రారంభిస్తుంటాం. క్రమంగా ఆదాయం పెరిగినప్పుడు.. ఆ నిష్పత్తిలోనే సిప్‌నూ పెంచుకోవాల్సిన అవసరం ఉంటుంది. దీనికోసం టాపప్‌ లేదా స్టెప్‌ అప్‌ విధానాన్ని అనుసరించాలి. నిర్ణీత కాలం తర్వాత మీరు చెప్పిన శాతం చొప్పున సిప్‌ మొత్తం పెరుగుతూ ఉంటుంది. దీర్ఘకాలంలో మంచి మొత్తాన్ని సాధించేందుకు ఈ పద్ధతి ఎంతగానో తోడ్పడుతుంది. మంచి రాబడి వచ్చే పథకాలను ఎంచుకొని, వాటిలో మీ లక్ష్యం నెరవేరేదాకా మదుపు చేయండి. అధిక మొత్తం పెట్టుబడి పెట్టినప్పుడు.. దాని నుంచి మంచి రాబడిని ఆర్జించేందుకూ వీలవుతుంది.

జీవిత బీమాతో..
మ్యూచువల్‌ ఫండ్లలోని కొన్ని పథకాల్లో సిప్‌ చేసినప్పుడు.. ఎలాంటి అదనపు ప్రీమియం చెల్లించకుండానే.. జీవిత బీమా పాలసీని కూడా అంతర్లీనంగా అందిస్తుంటాయన్న సంగతి చాలామందికి తెలియదనే చెప్పొచ్చు. కొన్ని పథకాల్లో మదుపు చేసినప్పుడు.. అవి తమ మదుపరుల రక్షణ కోసం బృంద జీవిత బీమాను అందిస్తుంటాయి. ఇది ఒక అదనపు ప్రయోజనం. కొన్ని పథకాలు.. రూ.50లక్షల వరకూ జీవిత బీమా రక్షణ కల్పించేవీ ఉన్నాయి. మదుపు చేసినంత కాలం లేదా మదుపరి వయసు 60 ఏళ్ల వరకూ ఈ బీమా అందుబాటులో ఉంటుంది. ఈక్విటీల్లోనూ, డెట్‌లో మదుపు చేసినప్పుడూ ఈ జీవిత బీమా అందుబాటులో ఉంటోంది.

వైవిధ్య పథకాల్లో..
ఒకే సిప్‌ మొత్తంతో ఒకటికి మించి పథకాల్లో మదుపు చేసే వీలూ ఉంటుంది. ఎలాంటి ఇబ్బందులూ లేకుండా వైవిధ్యమైన ఫండ్లలో మదుపు చేయొచ్చు. ఒకే ఫండ్‌ సంస్థకు చెందిన పలు పథకాల్లో మదుపు చేసినప్పుడు ఇది మరింత ఉపయోగకరంగా ఉంటుంది. ఉదాహరణకు.. ఒక సంస్థకు చెందిన పలు పథకాల్లో మదుపు చేసేందుకు ఒక ఫారాన్ని ఉపయోగించడంతోపాటు, ఒకేసారి నిర్ణీత మొత్తం చెల్లిస్తే.. ఆయా పథకాల్లో మీరు పేర్కొన్న నిష్పత్తి మేరకు పెట్టుబడి వెళ్లిపోతుంది. దీనివల్ల అనవసర కాగితం పని తప్పుతుంది.

ఏ రోజైనా..
గతంలో.. మ్యూచువల్‌ ఫండ్‌ సంస్థలు కొన్ని నిర్ణీత తేదీల్లో మాత్రమే పెట్టుబడులను స్వీకరించేవి. ఇప్పుడు ఆ పరిస్థితి మారింది. 1 నుంచి 28 వరకూ ఏ తేదీనైనా పెట్టుబడి పెట్టేందుకు అవకాశం కల్పిస్తున్నాయి. అంటే, మీ ఇష్టానుసారం ఏ రోజు పెట్టుబడి వెళ్లాలన్నది మీరే నిర్ణయించుకోవచ్చు. ఉదాహరణకు మీకు ప్రతి నెలా జీతం ఏడో తేదీన వస్తుందనుకుందాం. పెట్టుబడి పెట్టే తేదీని మీరు 8 లేదా 9గా నిర్ణయించుకోవచ్చు. ఒకవేళ మీకు వ్యాపారం లేదా ఇతర మార్గాల్లో ఆదాయం వస్తుందనుకుందాం.. మీ వీలును బట్టి, నెలాఖరులో సిప్‌ తేదీని ఎంచుకోవచ్చు.

ఇష్టమున్నంతకాలం..
సిప్‌ను ఎప్పుడు ప్రారంభించాలి.. ఎప్పటి వరకూ కొనసాగించాలి.. అనేది ముందే నిర్ణయించుకోవాలి. ఉదాహరణకు మీరు పదేళ్ల పాటు సిప్‌ చేస్తామని తెలియజేయవచ్చు. ఒకసారి ఈ వ్యవధి ముగిసిన తర్వాత.. దాన్ని పునరుద్ధరించుకోకపోతే.. కొత్తగా పెట్టుబడులు సాధ్యం కాదు. దీనివల్ల మార్కెట్‌ లాభాలను కోల్పోయే అవకాశం ఉంది. దీనికి బదులుగా ఇష్టమున్నంత కాలంపాటు సిప్‌ను కొనసాగించే వీలూ ఉంది. సిప్‌ను ఎంచుకునేప్పుడు.. ఎలాంటి వ్యవధిని పేర్కొనకుండా ఉండే అవకాశమూ ఉంది. వీలైనంత ఎక్కువ కాలం పెట్టుబడి కొనసాగించాలనుకున్నప్పుడు దీన్ని ఎంపిక చేసుకోవడం మంచిది. మీ ఆర్థిక లక్ష్యాన్ని చేరుకున్న రోజున ఫండ్‌ నుంచి పెట్టుబడిని ఉపసంహరించుకోవచ్చు.

రూ.100తోనూ..
స్పల్ప ఆదాయం ఉన్నవారు.. తక్కువ మొత్తంతో పెట్టుబడిని ప్రారంభించాలనుకున్నప్పుడు కనీసం రూ.100తోనూ మదుపు చేయొచ్చు. దీనిని మైక్రో సిప్‌ అంటారు. తొలిసారి మార్కెట్లోకి ప్రవేశించాలనుకునే వారు.. కాస్త అనుభవం వచ్చేదాకా ఇలా స్వల్ప మొత్తంతో ప్రయత్నించవచ్చు. మార్కెట్‌ పరిస్థితులు అర్థం చేసుకున్న తర్వాత మదుపు మొత్తాన్ని పెంచుకోవచ్చు.

సిప్‌లో ఉండే ప్రయోజనాలను అర్థం చేసుకోవడంతోపాటు, కాస్త భిన్నంగా మదుపు చేయడానికి ప్రయత్నించాలి. మార్కెట్లో పెట్టుబడి పెట్టేప్పుడు మర్చిపోకూడని మరో విషయం.. స్వల్పకాలిక హెచ్చుతగ్గులకు ఆందోళన చెందకూడదు. దీర్ఘకాలంలో ఇవన్నీ సర్దుకొని, మంచి రాబడిని అందుకునే అవకాశాలుంటాయని గుర్తించాలి

- ఎ.బాలసుబ్రమణియన్‌. సీఈఓ, ఆదిత్య బిర్లా సన్‌ లైఫ్‌ ఎఎంసీ

Tags :

మరిన్ని

జిల్లా వార్తలు

చదువు సుఖీభవ ఈ-నాడు మకరందం రయ్.. రయ్ సిరి ఈ తరం హాయ్! ఆహా హాయ్ బుజ్జీ స్థిరాస్తి రుచులు