25 కిలోల బస్తాల్లో ఇసుక

భవన వ్యర్థాల నుంచి తయారు చేసి పునర్వినియోగం

ఈనాడు, హైదరాబాద్‌ : భవన నిర్మాణ వ్యర్థాల నుంచి ఇసుక, కంకరను అధునాతన యంత్రాలతో వేరు చేసి పునర్వినియోగిస్తున్నారు. వీటితో కాంక్రీట్‌ బ్లాక్స్, పేవర్‌ బ్లాక్స్, ఇంట్లో గోడలకు ఉపయోగించే ఇటుకలను తయారు చేస్తున్నారు. జీహెచ్‌ఎంసీతో కలిసి సిటీలో కొన్ని సంస్థలు ఈ ప్లాంట్లను నిర్వహిస్తున్నాయి. శంషాబాద్‌లో ప్లాంట్‌ నిర్వహిస్తున్న ఎస్‌ఎస్‌ఆర్‌ఈసీ సంస్థ వ్యర్థాల నుంచి తీసిన ఇసుకను 25 కిలోల సంచుల్లో అందిస్తోంది. ఇసుకను సంచుల్లో ప్యాక్‌ చేసి ఇవ్వడం శుక్రవారం నుంచి ప్రారంభించామని నిర్వాహకులు తెలిపారు. 25 కిలోల సంచి ఉచితంగానే కావాల్సిన వారి ఇం టికి పంపిస్తున్నామని రవాణా ఛార్జీలు రూ.60 చెల్లించాల్సి ఉంటుందని తెలిపారు. ఇంట్లో యజ్ఞయాగాదులు, చిన్న మరమ్మతులు చేసుకునే వారు అవసరం లేకపోయినా టన్ను ఇసుక కొనాల్సి వస్తుంది. వీరి అవసరాల కోసం సంచుల్లో అందిస్తున్నామని తయారీదారులు అంటున్నారు.

టన్ను సగం ధరకే : మార్కెట్లో ఇసుక ధరలు మండిపోతున్నాయి. సగం ధరకే ఇసుక లభిస్తే సంతోషమే.. వ్యర్థాల నుంచి తీసిన ఇసుకను టన్ను రూ.800 విక్రయిస్తున్నామని.. మార్కెట్లో దొరికే ఇసుక ధరతో పోలిస్తే సగమే అని నిర్వాహకులు తెలిపారు. ఇసుక కావాల్సిన వారు 1800 203 0033 నంబరులో సంప్రదించవచ్చు