తెలంగాణ చికెన్‌ చేసేదెలా?

నాకు తెలంగాణ రెస్టారెంట్‌ స్టైల్‌ చికెన్‌ ఫ్రై అంటే చాలా ఇష్టం. ఇంట్లో అలా కుదరడం లేదు. అందుకు ఎలాంటి జాగ్రత్తలు తీసుకోవాలో కాస్త చెప్పండి!

తెలంగాణ రెస్టారెంట్‌ తరహా చికెన్‌ ఫ్రై చేయడం చాలా తేలిక. ఈ టిప్స్‌ పాటించి చూడండి.. తప్పకుండా నచ్చుతుంది, మీరంతా ఆనందిస్తారు.

• లేత కోడి మాంసాన్నే ఎంచుకోండి. అప్పుడే మంచి రుచి వస్తుంది. వీలైతే నాటుకోడి తెస్తే మరింత బాగుంటుంది.
• చికెన్‌ ముక్కలు మీడియం సైజ్‌లో కట్‌ చేయాలి. పెద్దగా ఉంటే ఉడకవు, చిన్నగా ఉంటే ఎక్కువ వేగుతాయి. తెలంగాణ చికెన్‌ ఫ్రై పూర్తిగా పొడిపొడిగా ఉండదు. ఇది కాస్త గుజ్జుగా సెమీ డ్రైగా ఉంటుంది.
• మసాలా వేసిన తర్వాత చికెన్‌ త్వరగా అడుగంటుతుంది. అలా కాకూడదంటే గరిటతో మెల్లగా కలియతిప్పుతుండాలి. ఇలా చేయడం వల్ల మసాలా పరిమళాలు ముక్కలకు పట్టి రుచిగా తయారవుతుంది.
• ఈ రెసిపీలో ఉల్లిపాయ ముక్కలు కాస్త మందంగా ఉండాలి. అవి ఎర్రగా వేగి ఉప్పు మసాలాతో కలిసి టేస్టీగా ఉంటాయి. సన్నగా తరిగితే ఎక్కువ వేగి రుచి తగ్గుతుంది.
• చికెన్‌ ఫ్రైలో సాధారణంగా చింతపండు ఉపయోగించరు. కానీ కాస్త చింతపండు పులుసు వేస్తే ఎక్కువ రుచి వస్తుంది. ఇలా వద్దనుకున్న వారు చింతపండుకు బదులు చివర్లో కాస్త నిమ్మరసం వేసుకోవచ్చు.
• ఈ వంటకానికి నాన్‌స్టిక్‌ పాన్లు పనికి రావు. ఎందుకంటే దీని రుచి అంతా కింది నుంచి చక్కగా వేగడంలో ఉంది. అది నాన్‌స్టిక్‌ పాన్‌లో సాధ్యం కాదు. అడుగు మందంగా ఉండే ఇనుము లేదా కాస్ట్‌ ఐరన్‌ పాత్రలు ఉపయోగించాలి.