గోంగూర మటన్‌ అదుర్స్‌!

మా అబ్బాయికి గోంగూర మటన్‌ అంటే చాలా ఇష్టం. అది చాలా రుచిగా ఉండాలంటే ఎలాంటి టిప్స్‌ పాటించాలో చెప్పండి!

• లేత మాంసం ఎముకలతో ఉన్నది ఎంచుకుంటే ఎక్కువ రుచిగా ఉంటుంది. ముక్కలు మీడియం సైజు ఉండాలి. మరీ చిన్నవి అయితే కూర తయారయ్యేసరికి ఇంకా చిన్నవిగా అయిపోతాయి.
• గోంగూర మాంసానికి నూనె కాస్త ఎక్కువగానే పడుతుంది. నూనె ఉంటేనే జిగురుగా ఉండే గోంగూర నూనెలో మగ్గి రుచిగా ఉంటుంది. ఈ కూరలన్నిటికీ నూనె ఎక్కువే ఉపయోగించాలి.
• ఎర్ర గోంగూర, తెల్ల గోంగూర అని రెండు రకాలు ఉంటాయి కదా! ఎర్రటిది కొంచెం ఎక్కువ పులుపు కనుక అది బాగుంటుంది. మీరు తెల్ల గోంగూర వాడుతున్నట్లయితే కొద్దిగా చింత పండు రసం వేస్తే పులుపు సరిపోతుంది.
• గోంగూర ఆకులు మాత్రమే వాడాలి. కాడలు వేయకండి. ఆకును కచ్చితంగా మూడు సార్లు నీళ్లలో వేసి బాగా కడగాలి. లేదంటే అందులో ఉండే ఇసుక వదలదు.
• మాంసం నిదానంగా ఉడికితేనే చాలా రుచిగా ఉంటుంది. అందుకు సుమారుగా 40 నిమిషాల నుంచి గంట సమయం పడుతుంది.
• సమయం ఎక్కువ లేదు.. వేగంగా అయిపోవాలి అనుకుంటే.. కుక్కర్లో 750 ఎం.ఎల్‌. నీళ్లు పోసి మీడియం ఫ్లేమ్‌ మీద ఉడికించి.. తర్వాత మిగిలిన పద్ధతిలో చేసుకోవచ్చు.
• మటన్‌ జాగ్రత్తగా, తగిన విధంగా ఉడికించాలి. మరీ ఎక్కువ ఉడికితే మాంసంలోని తేమ ఆవిరై.. ముక్కలు గట్టిపడతాయి.