ఇడ్లీల్లోకి దోస కారం

వేరుశనగ కారం, కొబ్బరి కారం, పుట్నాల కారం, నువ్వుల కారం, ధనియాల కారం.. ఇలా ఎన్ని రకాల కారప్పొడులో కదా! మా ఇంట్లో దోస గింజలతో కారప్పొడి చేస్తాం. ఇది ఎంత రుచిగా ఉంటుందో అంత ఆరోగ్యం కూడా. దోసకాయ కూర వండి నప్పుడల్లా.. చేదు లేని గింజలైతే.. వాటిని ఎండబెట్టి తడి లేని డబ్బాలో దాచు కోవాలి. కారం చేయాలను కున్నప్పుడు వాటిని తీసుకుంటే సరిపోతుంది. అలా వీలవకుంటే కొనుక్కోవచ్చు కూడా. కానీ ఒక్కోసారి చేదు ఉండే అవకాశం ఉంటుంది జాగ్రత్త. ఇంతకీ దోసగింజలతో కారం ఎలా చేయాలంటే.. కడాయిలో శనగపప్పు, మినప్పప్పు, పల్లీలు, మెంతులు, ఆవాలు, దోసగింజలను సన్న సెగ మీద వేయించాలి. వాటిని ఒక పాత్రలోకి తీసి.. అదే కడాయిలో జీలకర్ర, ధనియాలు, ఎండు మిర్చి, కరివేపాకు వేయించాలి. చల్లారాక అన్నిటినీ కలిపి గ్రైండ్‌ చేయాలి. ఘుమఘుమలాడే ఈ దోస కారం గాలి చొరబడని డబ్బాలో భద్రపరచుకోవాలి. ఈ కమ్మటి కారానికి కాస్త నెయ్యి జోడించారంటే ఇడ్లీలు, దోశల్లోకి చాలా బాగుంటుంది. దోసకారం మీరూ చేసి చూడండి.. చాలా మెచ్చుకుంటారు.

 బొబ్బా ఇందిరాదేవి, హైదరాబాద్‌