చేపల ఫ్రై మరింత రుచిగా..

మా పిల్లలకి ఫిష్‌ ఫ్రై అంటే చాలా ఇష్టం. కానీ ఇంట్లో చేసింది నచ్చడంలేదు. హోటల్‌ రుచి రావాలంటే ఎలాంటి జాగ్రత్తలు తీసుకోవాలో కాస్త చెప్పండి!

చేప ఫ్రై రుచిగా చేసేందుకు ఈ సూచనలు పాటించండి..

• ముందుగా చేప ముక్కలను 20 నిమిషాలు పాలలో నానబెట్టి, తర్వాత పాలు తీసేయాలి. ఇలా చేయడం వల్ల నీచు వాసన తగ్గడమే కాకుండా అదనపు రుచి వస్తుంది.
• చేపముక్కలకు మసాలా పట్టించేటప్పుడు కొద్దిగా శనగపిండి లేదా బియ్యప్పిండిని జోడిస్తే.. ఫ్రై కరకరలాడుతుంది.
• ఉల్లిపాయల్లో తగినంత తేమ ఉంటుంది కనుక మసాలా పేస్ట్‌ను గ్రైండ్‌ చేసేందుకు నీళ్లు అవసరం లేదు. దానికి బదులు చెంచా నిమ్మరసం ఉపయోగించవచ్చు.
• ఉల్లి, అల్లం, వెల్లుల్లి పేస్టు, పసుపు, కారం, ధనియాల పొడి, జీలకర్ర పొడి, గరం మసాలా, ఉప్పు కలిపి ముద్దలా చేయాలి. చేపముక్కలకి ఈ మిశ్రమాన్ని పట్టించి, అరగంట ఫ్రిజ్‌లో పెట్టాలి.
• ఫిష్‌ ఫ్రై యథాతథంగా చేపలతో చేయొద్దు, చేపలను ముక్కలుగా కోసి చేస్తేనే బాగుం టుంది. దీనికి ఎక్కువ నూనె అవసరం లేదు.
• నూనె మరీ వేడిగా ఉంటే నానబెట్టిన చేప ముక్కలు పాత్రకు అంటుకుంటాయి. తగినంత సెగలో వేయించాలి
• ఎక్కువ మోతాదులో చేయాల్సివస్తే అన్నీ ఒకసారే వద్దు. కొన్ని కొన్ని  ముక్కల చొప్పున వేయించండి. ఎక్కువ మొత్తంలో ముక్కలు వేస్తే నూనె ఎక్కువ పీల్చుకుంటుంది. పైగా ముక్కలు సరిగా వేగవు.
• చేపముక్కలను రెండు వైపులా బంగారు రంగు వచ్చేవరకు వేయించాలి. వహ్వా అనిపించే రుచి రావా లంటే పావుగంట పడుతుంది.

 పవన్‌ సిరిగిరి, చెఫ్‌, హైదరాబాద్‌