ఘాటు తక్కువ.. ఘుమాయింపు ఎక్కువ..

చికెన్‌ బటర్‌ మసాలాను హోటల్‌ స్టయిల్లో చేసేందుకు కొన్ని చిట్కాలు చెప్పండి!

• బటర్‌ చికెన్‌కు బోన్‌, బోన్‌లేస్‌ ఏదైనా వాడుకోవచ్చు. సంప్రదాయ పద్ధతిలో బోన్స్‌ ఉన్నదాన్ని గ్రిల్‌ చేసి వాడతారు. కానీ దీనికి బోన్లెస్‌ ఎక్కువ బాగుంటుంది.
• చికెన్‌కు మసాలాలు పట్టించి రాత్రంతా ఫ్రిజ్‌లో ఉంచితే ఎక్కువ రుచి వస్తుంది.
• చికెన్‌ను గ్రిల్‌ చేయడానికి గ్రిల్‌ పాన్‌ వాడాలి. పాన్‌ మీద పెట్టి.. కదిలించకుండా 5 నిమిషాలు వదిలేస్తే.. ఒక వైపు చక్కగా గ్రిల్‌ అవుతుంది. తర్వాత రెండో వైపు తిప్పి 80% గ్రిల్‌ చేయాలి.
• అవెన్లో గ్రిల్‌ చేసేట్లయితే 220 డిగ్రీల వద్ద 20 నిమిషాలు గ్రిల్‌ చేయాలి.
• బటర్‌ చికెన్‌ కేలరీస్‌ ఉన్న రెసిపీ.. తరచూ తింటే మంచిది కాదు. అరుదుగానే కనుక.. అసలైన రుచి ఆస్వాదించాలంటే వెన్న ఎక్కువే వేయాలి.
• ఫ్లేవర్స్‌ని బ్యాలెన్స్‌ చేయడానికి.. చివర్లో కొద్దిగా తేనె వేయాలి. తేనె నచ్చదనుకున్నా.. అందుబాటులో లేకున్నా.. పంచదార వేయొచ్చు.
• బాగా ఘుమాయించాలంటే.. కూర దించేశాక.. ఇంకాస్త నెయ్యి వేయాలి. అలాగే కాలుతున్న బొగ్గును ఒక కప్పులో పెట్టి, దాన్ని కూర మధ్యలో ఉంచి.. గరం మసాలా చల్లి, 3 నిమిషాల తర్వాత కప్పును తీసేయాలి.
• ఇది మామూలు మసాలా చికెన్‌ కర్రీలా ఘాటుగా ఉండదు. కారం తక్కువగా, వెన్న సువాసనతో ఉంటుంది.