కేక పెట్టించిన కేక్‌ చీర!

పెళ్లంటేనే ఒక అద్భుతం. పెళ్లికి ముందు, తర్వాత కూడా బోలెడన్ని ఆచారాలూ, ఆర్భాటాలూ ఉంటాయి. రంగురంగుల పట్టు వస్త్రాలు, ఆహా అనిపించే విందు భోజనాలతో కనువిందుగా, కోలాహలంగా ఉంటుంది. ఆ వైభవానికి ఇంకాస్త కళాత్మకత జోడించాలనుకున్నారు అబ్బాయి తరపువారు.  కోనసీమ జిల్లా అమలాపురంలో ఒక నిశ్చయార్థం వేడుకలో మగపెళ్లివారు వధువుకు అచ్చం పట్టుచీర లాంటి కేక్‌తో స్వీట్‌ సర్‌ప్రైజ్‌ ఇచ్చారు. ఎరుపు, జరీ బోర్డరుతో ఆకుపచ్చ చీర భేషుగ్గా ఉందనుకుంటే.. దాని మీద అదనపు హంగులుగా జాకెటు ముక్క, తాంబూలం, గాజులు, గొలుసు, పసుపు, కుంకుమ భరిణెలు-  టాపింగ్‌తో అబ్బురపరిచేలా ఉంది. అచ్చం పట్టుచీరను పొలిన కేకు అందర్నీ ఆకట్టుకుంది. ‘చక్కటి మధుర జ్ఞాపకంగా, మనసులో నిలిచిపోయేలా ఉంది’ అంటూ అమ్మాయి తరపువారు సంబరపడిపోతున్నారు. ఈ వార్త వైరల్‌ అయి పాఠకలోకాన్ని కూడా అలరించింది. అమలాపురం వైష్ణవి స్వీట్స్‌ దుకాణంలో ఈ కేకు తయారైంది. నచ్చితే.. మీరూ ఇలాంటిది ప్రయత్నించండి!