మళ్లీ పెరిగిన పాజిటివిటీ రేట్‌

కొత్తగా 13,474 కొవిడ్‌ కేసుల నమోదు

ఈనాడు, అమరావతి: కొవిడ్‌ పాజిటివిటీ రేట్‌ మళ్లీ పెరిగింది. బుధవారం ఉదయం 9 నుంచి గురువారం ఉదయం 9 గంటల మధ్య 41,771 నమూనాలు పరీక్షించారు. వీటిద్వారా 13,474 మందికి వైరస్‌ సోకినట్లు తేలింది. పాజిటివిటీ రేట్‌ 32.2%గా నమోదైంది. బుధవారం 49,143 నమూనాలు పరీక్షించగా 13,618 కొవిడ్‌ కేసులు రికార్డయ్యాయి. పాజిటివిటీ రేట్‌ 27.7%గా నమోదైంది. మంగళవారం 46,929 నమూనాలు పరీక్షించగా 13,819 కేసులతో పాజిటివిటీ రేట్‌ 29.44%గా రికార్డయింది. గడిచిన 24 గంటల్లో కొవిడ్‌తో రాష్ట్ర వ్యాప్తంగా తొమ్మిది మంది ప్రాణాలు విడిచారు. అత్యధికంగా కర్నూలు జిల్లాలో 1,835, తక్కువగా శ్రీకాకుళం జిల్లాలో 259 కొవిడ్‌ కేసులు నమోదయ్యాయి.